ޔޫނިއަންތަކާއި އެސޯސިއޭޝަންތަކުން އިސްވެ މޭޑޭ ރެލީ ބާއްވައިފި އެވެ.

މިއަދަކީ ދުނިޔޭގެ މަސައްކަތްތެރީންގެ ދުވަހެވެ. މި ދުވަހާއި ދިމާކޮށް މަސައްކަތްތެރީންގެ ހައްގުތައް ކަށަވަރުކޮށް ދިނުމަށް ގޮވާލާ ކޮންމެ އަހަރަކު ވެސް ރެލީތައް ބާއްވަ އެވެ.

މި އަހަރުގެ ރެލީ ބޭއްވީ ޔޫނިއަންތަކާއި އެސޯސިއޭޝަންތަކުން އިސްވެ އެވެ. އޭގެ ތެރޭގައި ޕޯޓް ވޯކާސް ޔޫނިއަން އާއި ޑްރައިވާސް އެސޯސިއޭޝަނާއި ބޮޑުކަންނެލި މަސްވެރިންގެ ޔޫނިއަން އަދި ޓޫރިޒަމް އެމްޕްލޯއީ އެސޯސިއޭޝަން ހިމެނެ އެވެ.

ރެލީ އޮތީ ރަސްފަންނު ސަރަހައްދުގަ އެވެ. އެ މީހުން ބޭނުންވީ ރެލީ މަޖީދީމަގުގައި ކުރިއަށް ގެންދާށެވެ. ނަމަވެސް ފުލުހުން އެ ފުރުސަތު ދީފައެއް ނުވެ އެވެ.

ފުލުހުން ބުނީ ‏މަސައްކަތްތެރިންގެ ދުވަހާ ގުޅިގެން ރޭވި ރެލީ، އަމީނީމަގުން ކުރިއަށް ގެންދިއުމުގެ ހުއްދަ އެކަން އިންތިޒާމް ކުރާ ފަރާތްތަކަށް ދިން ކަމަށެވެ. އަދި ރެލީއަށް ސަލާމަތާއި ރައްކާތެރިކަން ފޯރުކޮށްދީ، އެކަމަށް މަގުފަހިކޮށްދޭނެކަންވެސް އެފަރާތަށް އެންގި ކަމަށެވެ.

ރެލީގައި ބައިވެރިވި ފަރާތްތަކުން ވަނީ ރިސޯޓްތަކުގައި އަންހެން މުވައްޒިފުންނަށް ބުރުގާ އެޅުމުގެ ހައްގު ދިނުމަށާއި މަސައްކަތުގެ މާހައުލުގައި ތަފާތު ކުރުން ނުގެން ގުޅުމަށް ގޮވާލާފަ އެވެ.

އަދި ސަރުކާރުން ޓެކްސީ ހިދުމަތް ފަށާ ޓެކްސީ ޑްރައިވަރުންގެ މަސައްކަތް ހަލާކުކޮށް ނުލުމަށް ގޮވާލި އެވެ. މަސްވެރިކަމުގެ ސިނާއަތަށް އޮތް ބޭއިންސާފު ނައްތާލުމަށް ވެސް ގޮވާލި އެވެ.

އެ މީހުން ތިބީ ތަފާތު ޝުއޫރުތައް ލިޔެފައިވާ ފޮތިގަނޑުތަކާއި ބެނާތައް ވެސް ހިފައިގެންނެވެ.