ސުޕްރީމް ކޯޓުގެ ދެ ފަނޑިޔާރުން ކަމަށްވާ، މަހާޒު އަލީ ޒާހިރާއި ޑރ. އަޒްމިރަލްދާ ޒާހިރު ވަކިކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ފޮނުވާފައިވާ މައްސަލާގައި އެ މައްސަލައާއި ގުޅޭ ހުރިހާ ލިޔެކިޔުންތައް ދިރާސާކޮށް، ދެ ފަނޑިޔާރުން ހާޒިރުކުރުމާ މެދު ފަހުން ގޮތެއް ނިންމާ ގޮތަށް ޖުޑީޝަރީ ކޮމިޓީން ފާސްކޮށްފިއެވެ.

ދެ ފަނޑިޔާރުން ވަކިކުރުމަށް އިއްޔެ ޖޭއެސްސީން ފާސްކޮށް އެ މައްސަލަ ދިރާސާ ކުރުމުގެ މަސައްކަތް މިއަދު މަޖިލީހުގެ ކޮމިޓީގައި ވަނީ ކުރިއަށް ގެންގޮސްފައެވެ. 

މިއަދުގެ ކޮމިޓީގެ ބައްދަލުވުމުގައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވަނީ މައްސަލައާއި ގުޅޭ ލިޔެކިޔުންތައް ދިރާސާ ކުރަން ވަގުތު ބޭނުންވާކަން ފާހަގަކުރައްވާފައެވެ. 

Advertisement

އެއާއެކު ފަރެސްމާތޮޑާ ދާއިރާގެ ޕީއެންސީ މެންބަރު އަޝްރަފް ރަޝީދުވެސް ވަނީ އެކަން ފާހަގަކުރައްވައި، މައްސަލާގައި ގޮތެއް ނިންމުމަށް ވަރަށް ގިނަ ކަންކަން ބަލަންޖެހޭ ކަމަށް ވިދާޅުވެފައެވެ. އަދި އޭނާ ވަނީ ފުރަތަމަ ލިޔެކިޔުންތައް ދިރާސާކުރުމަށް ފަހު ގޮތެއް ނިންމުމަށް ހުށަހަޅުއްވާފައެވެ.

ޖުަޑިޝަރީ ކޮމިޓީގެ ބައްދަލުވުމުގެ ތެރެއިން: ފޮޓޯ/ މަޖިލިސް

އެއާއެކު ކެންދޫ ދާއިރާގެ މެންބަރު މަޢުރޫފް ޒާކިރު ވަނީ، އެ މަސައްކަތް އަވަސް ކުރުމަށް މައްސަލައާއި ގުޅޭ ހުރިހާ ފަރާތެއް ކޮމިޓީއަށް ހާޒިރުކުރަން ހުށަހަޅުއްވާފައެވެ. އެގޮތުން ޖޭއެސްސީގެ މައްސަލަ ތަހުގީގު ކުރި ކޮމިޓީގެ މެންބަރުންނާއި، ތުހުމަތު ކުރެވޭ ފަނޑިޔާރުންވެސް ކޮމިޓީއަށް ހާޒިރުކޮށް ސުވާލު ކުރުމަށް ހުށަހަޅުއްވާފައެވެ. 

އެ ހުށަހެޅުމާއި ގުޅިގެން ކޮމިޓީގެ ޗެއާ ވަނީ މިފަދަ މައްސަލަތައް މީގެ ކުރިން 19 ވަނަ މަޖިލީހުންވެސް ނިންމާފައިވާއިރު، މަޖިލީހުގެ ކޮމިޓީއަށް ހާޒިރު ކިރެވުނީ އެންމެ ފަމޑިޔާރެއް ކަމަށެވެ. ނަމަވެސް އިތުރު 8 ފަނޑިޔާރެއް މަގާމުން ވަކިކުރީ ފަނޑިޔާރުން ކޮމިޓީއަށް ހާޒިރު ނުކޮށްކަން އޭނާ ފާހަގަކުރެއްވިއެވެ. 

އެހެންކަމުން ކޮމިޓީން ފާސްކުރީ ވެރިކަންކުރާ ޕީއެންސީގެ މެންބަރު އަޝްރަފް ހުށަހަޅުއްވައި، ފޭދޫ ދާއިރާގެ މެންބަރު އިސްމާއީލް ނިޒާރު ތާއީދުކުރެއްވި ގޮތަށްލިޔެކިޔުންތައް ދިރާސާ ކުރުމަށްފަހު މީހަކު ހާޒިރުކުރަން ޖެހޭތޯ ނޫންތޯ ކޮމިޓީން ވަކި ބައްދަލުވުމެއްގައި ފަހުން ގޮތެއް ނިންމާ ގޮތަށެވެ.