މިއަހަރުގެ ފުރަތަމަ ކުއާޓަރުގައި ބޭންކް އޮފް މޯލްޑިވްސްއަށް ސާފްފައިދާގެ ގޮތުގައި 497 މިލިއަން ރުފިޔާ ލިބިއްޖެއެވެ.

ޤައުމީ ބޭންކުގެ ފުރަތަމަ ކުއާޓަރުގެ މާލީބަޔާނުގައި ވާގޮތުން މި ކުއާޓަރުގައި އެ ބޭންކަށް އާމްދަނީގެ ގޮތުގައި ވަނީ، 1.3 ބިލިއަން ރުފިޔާ ލިބިފައެވެ. އިންޓަރެސްޓްގެ ގޮތުގައި މި ކުއާޓަރުގައި ބީއެމްއެލްއަށް 752.2 މިލިއަން ރުފިޔާ ލިބިފައިވާއިރު، ފީ އާއި ކޮމިޝަނުގެ ގޮތުގައި 508.2 މިލިއަން ރުފިޔާ ވަނީ ލިބިފައެވެ. 

މި ކުއާޓަރުގައި ހިންގުމުގެ ފައިދާގެ ގޮތުގައި 698 މިލިއަން ރުފިޔާ ލިބިފައިވާއިރު، ޕްރޮވިޝަންއަށް ވަނީ، 17.1 މިލިއަން ރުފިޔާ އަދި އިންކަމް ޓެކްސްއަށް ވަނީ 183.8 މިލިއަން ރުފިޔާ ކަނޑާފައެވެ.

Advertisement

ވޭތުވެދިޔަ ކުއާޓަރގައި ބީއެމްއެލް އިން އަމިއްލަ ފަރުދުންނާއި ވިޔަފާރިތަކަށް އަލަށް 1.7 ބިލިއަން ރުފިޔާގެ ލޯނު ދޫކޮށްފައިވާއިރު މިއީ މިދިޔަ އަހަރުގެ މި މުއްދަތާ އަޅާބަލާއިރު 72 އިންސައްތައިގެ ކުރިއެރުމެކެވެ. މި ކުއާޓަރގައި ބޭންކުން ލޯނު ދޫކޮށްފައިވާ އަދަދުވަނީ 470 މިލިއަނަށް ވުރެ އިތުރުވެފައެވެ. ކެޕިޓަލް އަދި ލިކުއިޑިޓީ ރޭޝިއޯ ވަނީ ގާނޫނު ލާޒިމްކުރާ މިންވަރަށްވުރެ މަތީގައި ދެމެހެއްޓިފައިވާކަމަށްވެސް ބީއެމްއެލުން ބުނެއެވެ.

މާލީބަޔާނާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ ވޭތުވެދިޔަ އަހަރުގައި ހަރުދަނާ މާލީ ނަތީޖާއެއް ހޯދުމަށްފަހު، މި އަހަރުގެ ފުރަތަމަ ކުއާޓަރގައިވެސް މި ދުވެލި ދެމެހެއްޓިގެން ދިޔުމަކީ ލިބިގެންދާ ވަރަށްބޮޑު އުފަލެއް ކަމަށެވެ. 

މުޅި ރާއްޖެ ހިމެނޭ ބޭންކިންގ ވިއުގަޔަކާއެކު ބީއެމްއެލުން މިހާރު ވަނީ، 20 އަތޮޅެއްގައި 39 ބަރާންޗް 107 ސެލްފް ސަރވިސް ބޭންކިންގ ސެންޓަރ، އަދި 165 އޭޓީއެމް ޤާއިމްކޮށްފައެވެ.