އިޖުތިމާޢި ތަރައްޤީއާ ބެހޭ ވުޒާރާގެ މުވައްޒަފަކު ކުޑަކުއްޖަކަށް ޖިންސީ ގޯނާ ކުރި ކަމަށް ބުނާ މައްސަލަ ބަލަމުންދާ ކަމަށް އެ ވުޒާރާއިން ބުނެފިއެވެ. އެ ވުޒާރާއި ބުނިގޮތުގައި މައްސަލަ ބަލަމުންދަނީ އެ ވުޒާރާގެ އިސްނެގުމުގެ ދަށުންނެވެ. 

ނ. މަނަދޫގައި ހުންނަ އިޖްތިމާޢި ތަރައްޤީއާ ބެހޭ ވުޒާރާގައި މަސައްކަތް ކުރާ މުވައްޒަފަކު ކުޑަ ކުައްޖަކަށް ޖިންސީ ގޯނާ ކުރި ކަމަށް ތުހުމަތުކޮށް އެ ކުއްޖާގެ ބޮޑުބޭބެއެއް ކުރި ޕޯސްޓެއް މީސްމީޑިއާގައި އަންނަނީ ދައުރުވަމުންނެވެ.

އެ ޕޯސްޓުގައި ކުއްޖާގެ ބޮޑުބޭބެ ބުނެފައިވާގޮތުން، އެ ކުއްޖާއަށް ޖިންސީ ގޯނާ ކުރީ ކުއްޖާގެ ދޮން ބައްޕަ އާއި، ބޮޑުބޭބެގެ ދައްތައެއްގެ ފިރިމީހާއެވެ. އަދި ބޮޑު ބޭބެގެ ދައްތަގެ ފިރިމީހާ އަކީ މަނަދޫގައި ހުންނަ އިޖްތިމާޢި ތަރައްޤީއާ ބެހޭ ވުޒާރާގެ މުވައްޒަފެއްކަންވެސް އޭނާ ފާހަގަކޮށްފައިވެއެވެ.

Advertisement

މީގެ އިތުރުން، އެކުއްޖާގެ ބޮޑުބޭބެ ބުނެފައިވާ ގޮތުން، ކުއްޖާގެ މަންމަ އާއި، ބޮޑުބޭބެގެ ދައްތަ މަސައްކަތް ކުރަމުންދަނީ އެ ދެމީހުންގެ (ޖިންސީ ގޯނާ ކުރި ކަމަށް ތުހުމަތުވާ ދެމީހުން) ދިފާޢުކޮށް، ކުއްޖާއަށް ތުހުމަތުތައް ކުރަމުންނެވެ. 

އަދި އެ މައްސަލާގައި ހަނު ހުރުމަށް އޭނާ ގާތުގައިވެސް ބުނަމުންދާ ކަމަށާ އެހެން ނަމަވެސް ހަނު ނުހުންނާނެ ކަމަށާ މައްސަލަ މިހާރު ކަމާބެހޭ އިދާރާ ތަކަށް ހުށަހަޅާފައިވާނެ ކަމަށް އޭނާ ބުންޏެވެ. 

ނަމަވެސް މައްސަލަ ކުރިއަށްދާ ސްޕީޑް ލަސްކަން ފާހަގަކޮށް އޭނާ ވަނީ ކުއްޖާއަށް އިންސާފު ހޯދައިދިނުމަށް އެދި ޕެޓިޝަނެއްގައި ސޮއި ކުރަން ފަށާފައެވެ. 

މި މައްސަލައާއި ގުޅިގެން އިޖްތިމާޢި ތަރއްޤީއާ ބެހޭ ވުޒާރާއިން ބުނީ އެ ވުޒާރާގެ ސްޓާފެއްގެ ފަރާތުން ކުއްޖަކަށް އެއްވެސް ބާވަތެއްގެ އަނިޔާއެއް ލިބޭކަން ނުވަތަ ސްޓާފަކު ކުޑަ ކުއްޖަކަށް އިހުމާލެއްވާކަން މިނިސްޓްރީއަށް ފާހަގަކުރެވޭ ހާލަތުގައި މިނިސްޓްރީގެ އަމިއްލަ އިސްނެގުމުގެ ދަށުން އެ މައްސަލަ ބަލައި، ޤާނޫނީ އިމުގެ ތެރެއިން މަސައްކަތްކުރަމުން ގެންދާނެކަމަށެވެ.

އަދި މަނަދޫގެ އެ މައްސަލަ މިނިސްޓްރީން ބަލަމުންދާ ކަމަށްވެސް ބުންޏެވެ.