ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ދެ މުއައްޒަފެއް, މާސްޓާސް ހެދުމަށް ކޮމިޝަނުން ހަރަދުކުރި ފައިސާ ނުލިބޭތާ އެތައް އަހަރެއް ވެފައިވާކަމަށް އޮޑިޓަރ ޖެނެރަލް އޮފީހުން ބުނެފިއެވެ.

އޮޑިޓަރ ޖެނެރަލް މިއަދު ނެރުއްވާފައިވާ އެޗްއާރުސީއެމްގެ 2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ބުނެފައިވަނީ، އެ ކޮމިޝަނުގެ ދެ މުއައްޒަފަކު 2013 އަދި 2014 ވަނަ އަހަރު "މާސްޓާސް އިން ހިއުމަން ރައިޓްސް އެންޑް ޑިމޮކްރަޓައިޒޭޝަން" ކޯހަށް ކޮމިޝަނުން ކޮށްފައިވާ ހަރަދުގެ ތެރެއިން އެއްވެސް ފައިސާއެއް 2023 ވަނަ އަހަރުގެ ނިޔަލަށް ލިބިފައި ނުވާކަމަށެވެ. އެޗްއާރުސީއެމުން ވަނީ އެ ދެ މުއައްޒަފުގެ ކިޔެވުމަށް 612,958 ރުފިޔާ ހޭދަކޮށްފައެވެ.

މިގޮތުން އެއް މުއައްޒަފަކަށް 2013 ވަނަ އަހަރު ހަރަދު ކޮށްފައިވާ ހަރަދުން ލިބެންޖެހޭ 430,073 ފައިސާ ހޯދުމަށް ސިވިލްކޯޓުގައި 2023 ވަނަ އަހަރުގެ ފެބުރުއަރީމަހުގެ 8 ވަނަ ދުވަހު މައްސަލަ ރަޖިސްޓްރީކުރެވުނު ނަމަވެސް އަދި މިހާތަނަށް މައްސަލަ ކުރިއަށްގޮސްފައި ނުވާކަމަށެވެ. އަދި 2014 ވަނަ އަހަރު އެހެން މުއައްޒަފަކު ކޯސް ހެދުމަށް ހޭދަވި ހަރަދު އަނބުރާ ހޯދުމަށް ކޯޓަށް މައްސަލަ 2023 ވަނަ އަހަރުގެ ނޮވެމްބަރުމަހުގެ 16 ވަނަ ދުވަހު ކޯޓަށް ހުށަހެޅިނަމަވެސް، އެ މައްސަލަވެސް އަދި ނިމިފައިނުވާކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

Advertisement

އޮޑިޓަރ ޖެނެރަލް ވަނީ އެ ފައިސާ އެކަށީގެންވާ އަވަސް މުއްދަތެއްގެ ތެރޭގައި ހޯދުމަށް އަވަސް ފިޔަވަޅުތަކެއް އެޅުމަށް އެޗްއާރުސީއެމަށް އަންގާފައެވެ.

އެޗްއާރުސީއެމްގެ 2023 ވަނަ އަހަރު ކުރި ހަރަދުތަކާ ގުޅޭގޮތުން އޮޑިޓަރ ޖެނެރަލްގެ ރިޕޯޓްގައި ވިދާޅުވެފައިވަނީ ކޮމިޝަނުން ހޭދަކޮށްފައިވަނީ ދައުލަތުގެ މާލިއްޔަތު ޤަވައިދުގެ ހަމަތަކާ އެއްގޮތަށް ކަމަށެވެ.