މަސްކިރުމުގެ އޮޕަރޭޝަންތަކުގައި މިފްކޯއިން ބޭނުންކުރަމުން އަންނަ ބޯޓްތަކުގެ ތެރޭގައި ހިމެނޭ "ރަންދި 27" ވިއްކާލުމަށް އިއުލާނުކޮށްފިއެވެ.

މިކަމާ ގުޅޭގޮތުން މިފްކޯއިން ބޯޓު ވިއްކާލުމަށް ކުރި އިއުލާނުގައި ބުނެފައިވަނީ، އެކުންފުނިން މިދިޔަ އަހަރު ނޮވެމްބަރުމަހުގެ 25 ވަނަ ދުވަހު ވިއްކާލުމަށް އިއުލާނުކުރި ރަނދި 27 ގަތުމަށް އެއްވެސް ފަރާތަކުން ޝަޢުޤުވެރިކަން ފާޅުކޮށްފައި ނުވާތީ އެއިޢުލާނު ބާތިލްކުރުމަށްފަހު އަލުން އެ ބޯޓު ސިޓީލާ ނީލަމުގައި ވިއްކާލުމަށް ނިންމާފައިވާކަމަށެވެ. ރަންދި 27 މިހާރު އޮތީ ފެލިވަރު ބަނދަރުގައެވެ. މި ބޯޓު ނީލަން ފަށާ އަގަކީ 400،000 ރުފިޔާއެވެ.

ފައިބަރުން ބަނދެފައިވާ މި ބޯޓު މިފްކޯގެ އޮޕަރޭޝަންތަކުގައި ބޭނުންކުރަމުން އައިސްފައިވަނި، 2018 ވަނަ އަހަރުގެ އޮކްޓޯބަރުމަހުން ފެށިގެންނެވެ. ރަންދި 27 މި ބޯޓަކީ 50 މެޓްރިކްޓަނުގެ ބޯޓެކެވެ. ބޯޓުގެ އޮޕަރޭޝަންތައް މިދިޔަ އަހަރުގެ ޖެނުއަރީމަހުގެ 5 ވަނަ ދުވަހުން ފެށިގެން އޮތީ ހުއްޓާލާފައެވެ. ބޯޓުގެ އިންޖީނު ހަލާކުވެފައިވާއިރު، ދެންހުރި ވަސީލަތްތައްވެސް ހުރީ ރަނގަޅުކުރަން ވެފައެވެ.

މިފްކޯއިން ވަނީ މިދިޔަ އަހަރުތަކުގައި އެކުންފުނީގެ އޮޕަރޭޝަންތަކުގައި ބޭނުންކުރުމަށް މަސްކިރާ އާ ބޯޓުތަކެއް ގެނެސްފައެވެ. އެގޮތުން ގެނައި ބޯޓުތަކުގެ ތެރެއިން ބައެއް ބޯޓުތަކަކީ ދުވާލަކު 60 ޓަނުގެ މަސް ގަނޑުކުރެވޭ އަދި 200 މަސް ރައްކާކުރުމުގެ ގާބިލުކަން ލިބިގެންވާ ބޯޓުތަކެކެވެ.