އިންޑިއާއިން ޕާކިސްތާނަށް ދިން ހަމަލާއަކީ ފިނޑި އަދި ޣައްދާރު ޢަމަލެއްކަމަށް ބުނެ، މި ހަމަލާއަށް ރައްދުދެއްވާނެކަމަށް ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވިދާޅުވެއްޖެއެވެ.

އިންޑިއާއާއި ޕާކިސްތާނާ ދެމެދު އުފެދިފައިވާ ހަމަނުޖެހުން ތަކުގެ ތެރެއިން އިންޑިއާއިން ޕާކިސްތާނުގެ ކޮންޓްރޯލްގައިވާ ކަޝްމީރުގެ ސަރަޙައްދުތަކަށް ރޭ ދިން މިސައިލް ހަމަލާތަކެއްގައި މަދުވެގެން 8 މީހުން ޝަހީދުކޮށްލައި، އެތައް ބަޔަކު ވަނީ ޒަޚަމްކޮށްލާފައެވެ. 

އެ ހަމަލާއާ ގުޅިގެން ޕާކިސްތާނު ބޮޑުވަޒީރު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މި ހަމަލާއަށް ރައްދު ދިނުމުގެ ހައްގު ޕާކިސްތާނަށް ލިބިގެންވާ ކަމަށާއި، މިހާރުވެސް ޖަވާބުދާރީވުމުގެ މަސައްކަތް ފަށައިފައިވާ ކަމަށެވެ. އަދި މުޅި ގައުމު ސިފައިންނާއެކު ވަރުގަދައަށް ތިބިކަމަށާއި، އެއްވެސް ބިރުވެރިކަމެއް ނެތްކަމަށް ވިދާޅުވިއެވެ.

ބޮޑުވަޒީރު ޝެހެބާޒް ޝަރީފް އިތުރަށް ވިދާޅުވެފައިވަނީ ޕާކިސްތާނުގެ ރައްޔިތުންނާއި ސިފައިން މިފަދަ ކޮންމެ ނުރައްކަލަކާ ކުރިމަތިލުމަށް ތައްޔާރަށް ތިބިކަމަށެވެ. އަދި ދުޝްމަނުންނަށް އެމީހުންގެ ނުބައި މަގުސަދު ހާސިލުކުރުމުގެ ފުރުސަތެއް ނުދޭއްވާނެކަމަށްވެސް ވިދާޅުވިއެވެ.

ޕާކިސްތާނުގެ އިންޓަރ-ސަރވިސަސް ޕަބްލިކް ރިލޭޝަންސް (އައިއެސްޕީއާރު) ގެ ޑައިރެކްޓަރ ޖެނެރަލް ލެފްޓިނަންޓް ޖެނެރަލް އަހްމަދު ޝަރީފް ޗައުދުރީ ވިދާޅުވެފައިވަނީ އިންޑިއާގެ ހަމަލާގައި މަދުވެގެން 8 މީހުން މަރުވެފައިވާ ކަމަށާއި، 35 މީހުން ޒަޚަމްވެފައިވާފައިވާ ކަމަށެވެ. އަދި ޕާކިސްތާނުގެ 6 ސަރަހައްދަކަށް ޖުމްލަ 24 ހަމަލާ ދީފައިވާކަމަށްވެސް ވިދާޅުވިއެވެ.

އެންމެ ބޮޑު ހަމަލާ ދީފައިވަނީ ޕަންޖާބު ސޫބާގެ ބަހަވަލްޕޫރު ސިޓީ ކައިރީގައިވާ އަހްމަދުޕޫރު ޝަރުގިއާ އަށް ކަމަށާއި، މިތަނުގައި ހުރި މިސްކިތަކަށް ހަމަލާދީ 5 މީހުން މަރުވެފައިވާ ކަމަށް ޗައުދުރީ ވިދާޅުވިއެވެ. މީގެ ތެރޭގައި 3 އަހަރުގެ ކުޑަކުއްޖެއްވެސް ހިމެނޭކަމަށް ވިދާޅުވިއެވެ.

މީގެ އިތުރުން މުރީދްކޭ ސިޓީ، ސިޔާލްކޯޓް ސިޓީ ކައިރީގައިވާ ރަށެއް، އަދި ޝަކަރްގަރު އަށްވެސް ހަމަލާދީފައިވާ ކަމަށް ޗައުދުރީ ވިދާޅުވިއެވެ. އަދި ޕާކިސްތާނުގެ ބެލުމުގެ ދަށުގައިވާ ކަޝްމީރުގެ މުޒައްފަރާބާދު އަދި ކޯޓްލީ އަށްވެސް ހަމަލާދީ، 2 މިސްކިތް ހަލާކުކޮށްލާފައިވާ ކަމަށް ވިދާޅުވިއެވެ. މި ހަމަލާގައި 16 އަހަރުގެ އަންހެން ކުއްޖަކާއި 18 އަހަރުގެ ފިރިހެން ކުއްޖެއް މަރުވެފައިވާ ކަމަށްވެސް ވިދާޅުވިއެވެ.

ޕާކިސްތާނުގެ ދިފާއީ ވަޒީރު ޚަވާޖާ މުހައްމަދު އާސިފް ވިދާޅުވެފައިވަނީ އިންޑިއާއިން ހަމަލާދިން ހުރިހާ ތަނަކީވެސް އާންމު ރައްޔިތުން ދިރިއުޅޭ ސަރަހައްދުތަކެއް ކަމަށާއި، ހަތިޔާރު ގްރޫޕްތަކުގެ އެއްވެސް ތަނަކަށް ހަމަލާ ދީފައި ނުވާކަމަށެވެ. އަދި އިންޑިއާއިން ބުނާ ގޮތަށް "ޓެރަރިސްޓުންގެ ކޭމްޕްތަކަކަށް" ހަމަލާދިން ކަމުގެ ދަޢުވާއަކީ ދޮގު ވާހަކައެއް ކަމަށްވެސް އާސިފް ވިދާޅުވިއެވެ.

މިދިޔަ މަހު އިންޑިއާގެ ބެލުމުގެ ދަށުގައިވާ ކަޝްމީރުގައި ހިނގި އަނިޔާވެރި ހާދިސާއެއްގައި 26 މީހުން މަރުވުމާ ގުޅިގެން އިންޑިއާއިން ވަނީ އެކަމުގެ ޒިންމާ ޕާކިސްތާނުގެ މައްޗަށް އަޅުވާފައެވެ. އަދި އެކަމަށް ޖަވާބުދާރީވާނެ ކަމަށް ބުނެފައެވެ. ނަމަވެސް ޕާކިސްތާނުން ވަނީ އެ ހާދިސާއާ އެ ގައުމުގެ އެއްވެސް ގުޅުމެއް ނެތް ކަމަށް ބުނެފައެވެ. އަދި އިންޑިއާއިން ޕާކިސްތާނަށް ހަމަލާދޭން ރާވަމުންދާކަމުގެ އިންޓެލިޖެންސް މަޢުލޫމާތު ލިބިފައިވާ ކަމަށްވެސް ބުނެފައެވެ.