އޭޕްރިލްމަހުގެ 18 ވަނަ ދުވަހު މާލޭގެ ގެއެއްގެ ފުރާޅުމަތީގައި ހައްވާ ޔުމްނު ނަމަކަށް ކިޔާ 21 އަހަރުގެ ޒުވާން އަންހެނަކު ވެއްޓިފައި އޮއްވައި ފެނުނު މައްސަލަ އާއި ގުޅޭ ފަހުގެ އަދާހަމަ ފޯރުކޮށްދީ، މައްސަލައާއި ގުޅުންހުރި ސުވާލު ކުރުމަށް ބޭނުންވާ ފަރާތްތަކަށް އެ ފުރުޞަތު ފަހިކޮށްދިނުމަށް ހާއްސަ ޕޯޓަލެއް ޤާއިމްކޮށް ޢާއްމުންނަށް ހުޅުވާލައިފިއެވެ.

މި ޕޯޓަލެއް ފަރުމާކޮށް ނިންމައި، ހުޅުވާލާފައިވަނީ މިއަދުއެވެ.

މިކަން ހާމަކޮށް އިންކުއަރީ ކޮމިޝަނުން އެކްސްގައި ކުރި ޕޯސްޓެއްގައި ބުނީ، ޔުމްނު ވެއްޓުނު ހާދިސާއާ ގުޅޭގޮތުން، އެއްވެސް މަޢުލޫމާތެއް، ފޮޓޯ/ވީޑިއޯ ނުވަތަ އެނޫންވެސް އެއްވެސް ލިޔުމެއް އެ ކޮމިޝަނާ ޙިއްސާކުރަން ބޭނުންވާ ނަމަ ނުވަތަ އެ ކޮމިޝަނުގެ މަސައްކަތާ ގުޅޭގޮތުން އެއްވެސް ސުވާލެއް ކުރަން ބޭނުން ނަމަ ޕޯޓަލް މެދުވެރިކޮށް ކުރެވޭނެ ކަމަށެވެ.

ޕޯޓަލްގެ ލިންކު: https://inquirycommission.gov.mv/

ޔުމްނު ވެއްޓުނު މައްސަލަ އާއި ގުޅިގެން އުފެއްދި ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮމިޝަންގެ ރައީސް ޑރ. މުނައްވަރު ވަނީ، އެ ޕޯޓަލް ޤާއިމް ކުރަނީ މައްސަލައާއި ގުޅޭ މައުލޫމާތު އާއްމުންނަށް ފަސޭހަ ކަމާއެކު ހިއްސާ ކުރުމުގެ ފުރުސަތު ފަހި ކޮށްދެއްވުމަށް ކަމަށް ވިދާޅުވެފައެވެ. 

”އެ ޕޯޓަލް މެދުވެރިކޮށް ރައްޔިތުންނަށް މައުލޫމާތު ދެވޭނެ. ސުވާލުވެސް ކުރެވޭނެ. އަދި ސުވާލު ކުރެވުނީމަ، އޭގައި ހުންނަ އާއްމު ސުވާލުތަކަށް އަޅުގަނޑުމެން ޖަވާބު ދެމުން، އަދި، އިންޑިވިޖުއަލް ބޭފުޅުން ކުރާ ސުވާލު ތަކަށްވެސް ޖަވާބު ދެމުން، އަޅުގަނޑުމެން ކުރާ މަސައްކަތް ދުވަހުން ދުވަހަށް ފެންނަ ގޮތަށް ގެންދާނީ.“ މުނައްވަރު ވިދާޅުވިއެވެ. 

ކަންމިހެން ހުރި ނަމަވެސް، އެ މައްސަލާގައި، ޖިނާޢީ ކުށެއް ކުރެވުނު ކަމުގެ ތުހުމަތާއި ގުޅޭ ތަހުގީގެއް ކަމަށް ވާތީ، އެ ތަހުގީގު ފުރިހަމަވުމުން ހާމަކުރެވޭނެ ބައެއް ކަންކަންވެސް ހުންނާނެ ކަން މުނައްވަރު ފާހަގަކުރެއްވިއެވެ.

އެނޫން އެހެން ހުރިހާ މަސައްކަތަކާއި ގުޅޭ މައުލޫމާތުތައް ޕޯޓަލް މެދުވެރިކޮށް ހިއްސާ ކުރެވޭނެ ކަމަށް މުނައްވަރު ވިދާޅުވިއެވެ.