ސުޕްރީމް ކޯޓުގެ ފަނޑިޔާރުންނަށް ޖަވާބުދާރީވުމުގެ ފުރުސަތު ނުދީ މަގާމުން ވަކިކުރަން ނިންމާފައިވާ ކަމަށް ބުނެ އެމްޑީޕީ ބައެއް މަޖިލިސް މެންބަރުންނާއި އާއްމުން މަޖިލިސް ކައިރީގައި އިހުތިޖާޖު ކުރަން ފަށައިފިއެވެ. 

ޖޭއެސްސީން ސަސްޕެންޑް ކޮށްފައިވާ ސްޕްރީމް ކޯޓުގެ ދެ ފަނޑިޔާރުން ކަމަށްވާ އަޒްމިރަލްދާ ޒާހިރު އާއި މަހާޒު ޢަލީގެ މައްސަލަ މަޖިލީހުގެ ޖުޑިޝަރީ ކޮމިޓީން ބަލަމުންދާއިރު އެ ކޮމިޓީން ވަނީ އެމްޑީޕީގެ ހުށަހެޅުމާ ޚިލާފަށް ދެ ފަނޑިޔާރުން ކޮމިޓީއަށް ހާޒިރު ނުކޮށް މައްސަލަ ކުރިއަށް ގެންދިޔުމަށް ނިންމާފައެވެ. 

އަދި މިއަދު ކުރިއަށް ގެންދިޔަ ކޮމިޓީގެ ބައްދަލުވުން ވަކި ހިސާބަކުން ސިއްރު ކުރަންވެސް ކޮމިޓީން ވަނީ ނިންމާފައެވެ. އެއާއެކު ކޮމިޓީގައި ހިމެނިވަޑައިގަންނަވާ އެމްޑީޕީ ދެ މެންބަރުން ކަމަށްވާ، އެމްޑީޕީ ޕީޖީ ލީޑަރ އިބްރާހީމް ނާޒިލް އަދި ކެންދޫ ދާއިރާގެ މެންބަރު މަޢުރޫފް ޒާކިރު ވަނީ ބައްދަލުވުން ބޯއިކޮޓް ކުރައްވައި ނުކުންނަވާފައެވެ. 

އެއަށްފަހު އެމްޑީޕީ އާއްމު މެންބަރުންނާއެކު މަޖިލިސް ބައެއް މެންބަރުން މަޖިލިސް ކައިރީ މުޒާހަރާ ކުރަން ވަނީ ފަށާފައެވެ. 

އެކަމާއި ގުޅޭ ގުޅޭގޮތުން މީޑިއާތަކަށް މައުލޫމާތު ދެއްވަމުން، ނާޒިލް ވިދާޅުވީ، ޖޭއެސްސީން ފަނޑިޔާރުންގެ މައްސަލަ ބެލިއިރުވެސް އެ ފަނޑިޔާރުންގެ ވަކީލުންނަށް ޖަވާބުދާރީ ވުމުގެ ފުރުސަތު ނުދޭ ކަމަށެވެ. އެކަމުގެ ޝަކުވާ ޖުޑިޝަރީ ކޮމިޓީގައި ކޮށްފައި ވަނިކޮށް، ކޮމިޓީންވެސް ފަޑިޔާރުންނަށް ޖަވާބުދާރީ ވުމަށް ފުރުސަތު ނުދޭން ނިންމި ކަމަށެވެ.

އަދި ޖޭއެސްސީން ކަންކުރި ގޮތާމެދު އެމްޑީޕީ މެންބަރުން ނުރުހުން ފާޅު ކުރެއްވުމުން ޕީއެންސީއަށް ނިސްބަތްވެވަޑައިގަންނަވާ ކޮމިޓީގެ މުޤައްރިރު، ކޮމިޓީ ސިއްރުކުރައްވަން ނިންމަވައި، ބައްދަލުވުމަށް ހާޒިރުވެވަޑައިގެން ތިއްބެވި ކޮމިޓީ މެންބަރުން ނޫން އެހެން މެންބަރުންވެސް ބޭރުކޮށްފައިވާކަން އޭނާ ފާހަގަކުރެއްވިއެވެ. 

ސުޕްރީމް ކޯޓުގެ ދެ ފަނޑިޔާރުންގެ މައްޗަށް ސުލޫކީ މައްސަލައެެއް ސާބިތުވާ ކަމަށް ކަނޑައަޅައި، އެ ދެ ފަނޑިޔާރުން މަގާމުން ވަކިކުރަން ރައްޔިތުންގެ މަޖިލީހަށް ފޮނުވީ އަޒްމިރަލްދާގެ ފިރިކަލުން ޑރ. އިސްމާއިލް ލަތީފް ބަންދުން ދޫކޮށްލަން ދަށު ކޯޓުގެ ގާޒީންނަށް އެ ދެ ފަނޑިޔާރުން ނުފޫޒު ފޯރުވި ކަމަށް ބުނާ މައްސަލައިގަ އެވެ.

އެ މައްސަލަ އާއި ގުޅޭ ގޮތުން މިއަދު ކޮމިޓީ ބައްދަލުވުމުގައި ވާަހަކަދައްކަވަމުން ނާޒިލް ވިދާޅުވީ އަޒަމިރަލްދާގެ ފިރިކަލުން ޑރ. އިސްމާއިލް ހައްޔަރުކުރީ ބަރަހަނާ ހާލަތުގައި ކަމަށް ޖޭއެސްސީގެ ރިޕޯޓްގައި ބަޔާންކޮށްފައި އޮތް ނަމަވެސް، އެއީ ފުލުހުންގެ ތަހުގީގުގައި އަދި ބަންދު މަޖިލީހުގައި ބުނެފައިވާ ގޮތް ނޫންކަމަށެވެ.

ނާޒިލް އެ ވާހަކަ ދައްކަވާތީ، ހުޅުދޫ ދާއިރާގެ މެންބަރު މުހައްމަދު ޝާހިދު ވަނީ ލައިވްކޮށް ކުރިއަށްދާ ބައްދަލުވުމެއްގައި އެފަދަ ވާހަކަތަކެއް ދެއްކުމަކީ ރަނގަޅު ކަމެއް ނޫން ކަމަށް ވިދާޅުވެ، ބައްދަލުވުން ސިއްރު ކުރަން ހުށަހަޅުއްވައިފަ އެވެ. 

އެއާއެކު ކޮމިޓީން ވަނީ ބައްދަލުވުން ސިއްރުކުރަން ނިންމާފައެވެ.