މިދިޔަ އަހަރާ އަޅާބަލާއިރު، މިއަހަރުގެ މިހާތަނަށް ފޮރިން އިންވެސްޓްމަންޓް ރަޖިސްޓްރީކުރި އަދަދު އިތުރުވެފައިވާކަމަށް ދައުލަތުގެ ޓެކްސް އިދާރާގެ ތަފާސްހިސާބުތަކުން ދައްކައިފިއެވެ.

މޯލްޑިވްސް އިންލަންޑް ރެވެނިއު އޮތޯރިޓީން ނެރެފައިވާ ތަފާސްހިސާބުތަކުން ދައްކާގޮތުގައި އަހަރުގެ މިހާތަނަށް ފޮރިން އިންވެސްޓްމަންޓް ރަޖިސްޓްރީ ފީގެ ގޮތުގައި 130،000 ޑޮލަރު ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 40،000 ޑޮލަރުގެ އިތުރުވުމެކެވެ. 

ތަފާސްހިސާބުތަކަށް ބަލާއިރު، އަހަރުގެ މިހާތަނަށް ރަޖިސްޓްރކުރި ފޮރިން އިންވެސްޓްމަންޓްގެ އަދަދު އުޅެނީ 26 ގައެވެ. ރާއްޖޭގައި ފޮރިން އިންވެސްޓެއް ކުރާނަމަ އެޑްމިނިސްޓްރޭޓިވް ފީއެއްގެ ގޮތުގައި ދައުލަތުގެ ޓެކްސް އިދާރާއަށް 5،000 ޑޮލަރުގެ އަދަދެއް ދައްކަން ޖެހެއެވެ. ބޭރުގެ ފަރާތްތަކުން ރާއްޖޭގައި އެންމެ ގިނައިން އިންވެސްޓްކުރާ އެއް ސިނާއަތަކީ ފަތުރުވެރިކަމުގެ ސިނާއަތެވެ. 

ތަފާސްހިސާބުތަކަށް ބަލާއިރު، މިދިޔަ އަހަރާ އަޅާބަލާއިރު މިއަހަރުގެ މިހާތަނަށް ޓޫރިޒަމް ރަޖިސްޓްރޭޝަން އަދި ލައިސަންސް ފީގެ ގޮތުގައި ލިބުނު އާމްދަނީ ވަނީ އިތުރުވެފައެވެ. ޓޫރިޒަމް ރަޖިސްޓްރޭޝަން އަދި ލައިސަންސް ފީގެ އަހަރުގެ މިހާތަނަށް 199,660 ޑޮލަރު ލިބިފައިވާއިރު، މިދިޔަ އަހަރުގެ މި މުއްދަތުގެ ތެރޭގައި ލިބިފައިވަނީ، 107,965 ޑޮލަރެވެ.

ރާއްޖެއަށް ބޭރުގެ އިންވެސްޓްމަންޓްތައް ގެނައުމަށް ސަރުކާރުން މިދިޔަ އަހަރު އަވައްޓެރި އިންޑިއާ އަދި ދުބާއީގައި އިންވެސްޓްމަންޓް ފޯރަމެއް ބޭއްވިއިރު، މިއަހަރު މެލޭޝިއާގައިވެސް ވަނީ އެފަދަ ފޯރަމެއް ބާއްވާފައެވެ.