މާލެ ސިޓީ ކައުންސިލުން 66 މިލިއަން ރުފިޔާ ނުދައްކާ އެބައޮތް ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފި އެވެ.
ވެމްކޯ އިން މިކަން ހާމަކުރީ އެ ކުންފުނީގެ މުވައްޒަފުންގެ ޕެންޝަން ފައިސާ ޖަމާނުކުރާ ކަމަށް ބުނާ ވާހަކަ ދޮގުކޮށް ނެރުނު ބަޔާނެއްގަ އެވެ. އެ ކުންފުންޏަށް އޮތް އެންމެ ބޮޑު ދައްޗަކީ އާމްދަނީގެ ގޮތުގައި ލިބެން ޖެހޭ ފައިސާ ގިނަ ތަންތަނުން ނުލިބޭތީ ކަން ފާހަގަކޮށްފައިވެ އެވެ.
އެ ގޮތުން އެންމެ ގިނަ ފައިސާ ލިބެން އޮތީ މާލެ ސިޓީ ކައުންސިލުންކަން ފާހަގަކޮށްފައިވެ އެވެ.
އެ ބަޔާނުގައި ބުނީ މާލެ ސިޓީ ކައުންސިލުން އެ ކޯޕަރޭޝަނަށް މިހާރު ވެސް ދައްކަން ޖެހި ނުދައްކާވާ 66 މިލިއަން ރުފިޔާ އެބަ އޮތް ކަމަށެވެ. ނަމަވެސް އެއީ ކޮން ދުވަސްވަރަކުން ފެށިގެން ނުލިބިވާ ފައިސާ ކަމެއް ނުބުނެ އެވެ.
ސިޓީ ކައުންސިލްގެ މިހާރުގެ މޭޔަރުގެ ކުރީން އެ މަގާމު ފުރުއްވީ ރައީސް ޑރ. މުހައްމަދު މުއިއްޒު އެވެ. އެ ދުވަސްވަރު ސިޓީ ކައުންސިލްގެ އިދާރީ ހިންގުމުގެ އެންމެ އިސްވެރިއަކަށް -- ސެކްރެޓަރީ ޖެނެރަލް އަކަށް ހުންނެވީ ވެމްކޯގެ މިހާރުގެ މެނޭޖިން ޑިރެކްޓަރު މުޖްތަބާ އެވެ.
Advertisement
This content is created and paid for by advertisers and does not involve Voice Journalists
