އަތޮޅުތެރޭގައި ޤާއިމްކޮށްފައިވާ އޭޓީއެމްތަކުން މިއަހަރުގެ ފުރަތަމަ 4 މަސްދުވަހުގެ ތެރޭގައި 1.3 ބިލިއަން ރުފިޔާގެ މުއާަމަލާތް ކޮށްފައިވާކަމަށް ބޭންކް އޮފް މޯލްޑިވްސްއިން ހާމަކޮށްފިއެވެ.
ބީއެމްއެލްއިން މިއަދު ވަނީ ނ.އަތޮޅުގެ ބައެއް ރަށްތަކުގައި އޭޓީއެމްގެ ހިދުމަތް ދޭން ފަށާފައެވެ. މިގޮތުން ކުޑަފަރީ އަދި ކުޑަފަރީ އަދި މަގޫދޫގައި މިއަދު ވަނީ ރަސްމީކޮށް އޭޓީއެމްގެ ހިދުމަތްތައް ފަށާފައެވެ. ނއަތޮޅުގެ ރަށްތަކުގައި އޭޓީއެމްގެ ހިދުމަތް ފެށުމުގެ ގޮތުން ވާހަކަދައްކަވަމުން ބީއެމްއެލް ސީއީއޯ މުހައްމަދު ޝަރީފް ވިދާޅުވީ، އޭޕްރިލްމަހުގެ ނިޔަލަށް އަތޮޅުތެރޭގެ އޭޓީއެމްތަކަށް 1.3 ބިލިއަން ރުފިޔާ ޖަމާކޮށްފައިވާކަމަށެވެ.
ޝަރީފް ވިދާޅުވީ، އަތޮޅުތެރޭގެ ރަށްރަށަށް އޭޓީއެމްގެ ހިދުމަތް ލިބެންފެށުމާއެކު، ދަތުރު ކުރަން ނުޖެހި ޚިދުމަތް ލިބުމުގެ އިތުރުން ރައްޔިތުން އަތުގައި ހުރި ފައިސާ ބޭންކިން ނިޒާމަށްވެސް ވަންނަމުންދާކަމަށެވެ. ކޮންމެ ރަށެއްގައި އޭޓީއެމް ގާއިމްކުރުމަކީ ފަސޭހަކަމެއް ނޫން ނަމަވެސް އެއީ ކޮންމެހެން ބޭނުންތެރިކަމެއްކަމަށާއި ބޭންކުގެ އަމާޒަކީ އެއްވެސް ރައްޔިތެއް އަދި އެއްވެސް ރަށެއް ބާކީ ނުކުރުންކަމަށް އޭނާ ވިދާޅުވިއެވެ.
ނ. ކުޑަފަރީގައި ބީއެމްއެލް އޭޓީއެމްގެ ޚިދުމަތް ފެށުން.. ފޮޓޯ: އިކޮނޮމިކް މިނިސްޓްރީ
އަތޮޅުތެރޭގައި ޤާއިމްކުރި އޭޓީއެމް ހިދުމަތް ބޭނުންކުރެވެމުންދާ މިންވަރާ ގުޅޭގޮތުން ޝަރީފް ވިދާޅުވީ، އިންޓަރނެޓް މެދުވެރިކޮށް ކުރާ މުއާމަލާތުގެ އަދަދު ބޮޑު އިންސައްތައެއް ހިއްސާކުރިނަމަވެސް އޭޓީއެމްތަކުން ކުރާ މުއާމަލާތްތައްވެސް އިތުރުވަމުން އަންނަ ކަމަށެވެ. މިގޮތުން ބީއެމްއެލް އޭޓީއެމްތަކުން ދުވާލެއްގެ މައްޗަށް ކުރާ މުއާމަލާތް 38 ހާހަށް އަރާކަމަށް ވިދާޅުވިއެވެ.
ޝަރީފް ވިދާޅުވީ މީގެ ދެ މަހެއްހާ ދުވަސް ކުރިން ދ. އަތޮޅުގައި ބަހައްޓާފައިވާ އޭޓީއެމްތަކަށް މިދިޔަ އޭޕްރީލްގެ ނިޔަލަށް 14 މިލިއަން ރުފިޔާ ޖަމާކޮށްފައިވާކަމަށެވެ. އެއީ 2000 އަށްވުރެ ގިނަ މުއާމަލާތްކަން ފާހަގަކުރައްވަމުން ޝަރީފް ވިދާޅުވީ، އޭޓީއެމް ހިދުމަތް ލިބެން ނެތްނަމަ އެއީ ހިދުމަތް ހޯދުމަށް ކުރަންޖެހޭ 2000 ދަތުރު ކުރަންޖެހޭނޭ ކަމަށެވެ.
މިދިޔަ ރޯދަމަސްތެރޭ އަޅުގަނޑުމެން ވާނީ ހއ އަތޮޅުގެ ހުރިހާ ރަށެއްގައި އޭޓީއެމް ހިދުމަތް ފަށާފަ. ހއ. އަތޮޅުގައި ބަހައްޓާފައިވާ އޭޓީއެމްތަކުން މިދިޔަ އޭޕްރީލް މަހުގެ ނިޔަލަށް ފައިސާ ޖަމާކުރުމަށް ވަނީ 8000 މުއާމަލާތް ހިންގާފަ. އެއީ 45 މިލިއަން ރުފިޔާގެ މުއާމަލާތްތައް. އެ އަތޮޅުގައި ފައިސާ ނެގުމަށް ވަނީ 27,000 މުއާމަލާތް ކޮށްފަ. އެއީ 52 މިލިއަން ރުފިޔާގެ މުއާމަލާތް. މިއީ ގާތްގަނޑަކަށް 5 ހަފްތާތެރޭ ކޮށްފައިވާ މުއާމަލާތްތައް
ބީއެމްއެލްގެ ސީއީއޯ ޝަރީފް ވިދާޅުވިއެވެ
ބީއެމްއެލްގެ އޭޓިއެމް ހިދުމަތުގެ މުއާމަލާތްތަކާ ގުޅޭގޮތުން ޝަރީފް ވިދާޅުވީ، މުޅި ރާއްޖެއިންވެސް ފެނިގެންދަނީ އޭޓީއެމްގެ ހިދުމަތުގެ މުއާމަލާތްތައް އިތުރުވަމުންދާތަން ކަމަށެވެ.
ބީއެމްއެލްގެ އަމާޒަކީ މިއަހަރު ނިމެންވާއިރަށް 100 އަށްވުރެ ގިނަ ރަށުގައި އޭޓިއެމް ބެހެއްޓުމެވެ. އެއާއެކު މުޅި ރާއްޖޭގައި ބީއެމްއެލްގެ 250 ހަށްވުރެ އޭޓީއެމް ގާއިމްކުރެވިގެންދާނޭކަމަށް ބީއެމްއެލުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
