ސަރުކާރުން ސަބްސިޑީއަށް ކުރަމުން އަންނަ ހޭދަ ދަށްވަމުން އަންނަކަމަށް މާލީ ވުޒާރާއިން ބުނެފިއެވެ.

ދައުލަތުގެ މާލިއްޔަތުގެ އެންމެފަހުގެ ތަފާސްހިސާބުތަކާ ގުޅޭގޮތުން މާލީ ވުޒާރާއިން ބުނީ، މިހިނގާ މެއިމަހުގެ 8 ވަނަ ދުވަހުގެ ނިޔަލަށް ސަބްސިޑީގެ ގޮތުގައި ކުރެވުނު ހޭދަ، މިދިޔަ އަހަރުގެ މި މުއްދަތާ އަޅާބަލާއިރު 21.2 އިންސައްތަ ދަށަސް ގޮސްފައިވާކަމަށެވެ. އަހަރުގެ މިހާތަނަށް ސަބްސިޑީގެ ގޮތުގައި ހޭދަކޮށްފައިވަނީ ގާތްގަނޑަކަށް އެއް ބިލިއަން ރުފިޔާއެވެ. ނަމަވެސް މިދިޔަ އަހަރުގެ މި މުއްދަތުގެ ތެރޭގައި ސަބްސިޑީއަށް ވަނީ 1.4 ބިލިއަން ރުފިޔާ ހޭދަކޮށްފައެވެ.

ފިނޭންސުން ބުނީ، ފަތުރުވެރިކަމާ އެކު ދިވެހިރާއްޖޭގެ މުޅި އިޤުތިޞާދަށްވެސް އެދެވޭ ކުރިއެރުމެއް އަންނަމުންދާކަމަށެވެ. މިގޮތުން އަހަރުގެ މިހާތަނަށް ޓޫރިޒަމުން ލިބުނު ކުރިއެރުމާއެކީ ޓެކުހުގެ ގޮތުގައި ދައުލަތަށް ލިބޭ އާމްދަނީ އިތުރުވެ، 14.2 ބިލިއަން ރުފިޔާއަށް އަރާފައިވާއިރު، ދައުލަތުން ކޮށްފައިވާ ޚަރަދު ދަށްވެ، ދައުލަތުގެ ބަޖެޓުގެ އޯވަރއޯލް ސަރޕްލަސް މިވަނީ 1.9 ބިލިއަން ރުފިޔާއަށް އިތުރުވެފައެވެ. ނިމިގެންދިޔަ އަހަރުގެ މި މުއްދަތުގެ ނިޔަލަށް ބަޖެޓުގެ އޯވަރއޯލް ބެލެންސްގެ ގޮތުގައި ރެކޯޑްކޮށްފައިވަނީ 2.4 ބިލިއަން ރުފިޔާގެ ޑެފިސިޓެއްކަން  ފިނޭންސުން ފާހަގަކުރިއެވެ.

އެ ވުޒާރާއިްނ އިތުރަށް ބުނެފައިވަނީ، 2025 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓުގައި، މި އަހަރުގެ ތެރޭގައި ދައުލަތަށް ލިބޭނެކަމަށް އަންދާޒާކޮށްފައިވާ އާމްދަނީއާއި ހިލޭ އެހީގެ 35.8 އިންސައްތަ، މިހިނގާ މެއިމަހުގެ 08 ވަނަ ދުވަހުގެ ނިޔަލަށް ދައުލަތަށް ލިބިފައެވެ. މިއީ މިދިޔަ އަހަރަށް ވުރެ 6.8 އިންސައްތަ އިތުރު އަދަދެކެވެ.

ދައުލަތުގެ އާމްދަނީގެ 78.0 އިންސައްތަ ޓެކުހުގެ ގޮތުގައި ލިބިފައިވާ އާމްދަނީން ޙިއްސާކުރާއިރު، މިއަހަރުގެ މިހާތަނަށް ޓެކުހުގެ ގޮތުގައި ދައުލަތަށް ވަނީ 11.1 ބިލިއަން ރުފިޔާ ލިބިފައެވެ. އެގޮތުން ޓެކްސް އާމްދަނީގެ 79.2 އިންސައްތައަކީ މުދަލާއި ޚިދުމަތުގެ އަގުން ނަގާ ޓެކުހާއި، ކޯޕަރޭޓް އިންކަމް ޓެކުހާއި، އިމްޕޯޓް ޑިއުޓީގެ ގޮތުގައި ދައުލަތަށް ލިބިފައިވާ އާމްދަނީއެވެ.

ފިނޭންސުން ބުނީ މެއިމަހުގެ 8 ވަނަ ދުވަހުގެ ނިޔަލަށް ދައުލަތުގެ ޖުމުލަ ޚަރަދުގެ ގޮތުގައި މިއަހަރުގެ ތެރޭގައި ހިނގާނެކަމަށް އަންދާޒާކޮށްފައިވާ ޢަދަދުގެ 25.0 އިންސައްތަ ހޭދަކުރެވިފައިވާކަމަށެވެ. މިއީ މިދިޔަ އަހަރާ އަޅާބަލާއިރު 21.8 އިންސައްތަ ދަށް އަދަދެކެވެ.

ނިމިގެންދިޔަ ހަފްތާގެ ނިޔަލަށް ދައުލަތުގެ ބަޖެޓުން ހިނގާފައިވާ ޖުމުލަ ޚަރަދުގެ 91.7 އިންސައްތަ ރިކަރަންޓް ޚަރަދުގެ ގޮތުގައި ރިކޯޑްކޮށްފައިވާއިރު، ދައުލަތުގެ ބަޖެޓުން މުވައްޒަފުންނަށް ހިނގާ ޚަރަދު މި މުއްދަތުގެ ތެރޭގައި 7.9 އިންސައްތައިން އިތުރުވެފައިވީ ނަމަވެސް ޖުމްލަ ރިކަރަންޓް ހަރަދާއި، ސަބްސިޑީ ދިނުމަށް ދައުލަތުގެ ބައިތުލްމާލުން ކުރާ ހޜދަ ވަނީ 21.2 އިންސައްތަ ދަށްވެފައެވެ.

ހަމަ އެހެންމެ ީގެއިތުރުން، މިއަހަރުގެ ތެރޭގައި ކެޕިޓަލް ޚަރަދާ ގުޅޭ ސިޔާސަތުތައް އިތުރަށް ހަރުދަނާކުރުމަށް ކުރަމުންދާ މަސައްކަތްތަކާއި، ނިމިގެންދިޔަ އަހަރުގެ ފުރަތަމަ ކުއާޓަރުގެ ތެރޭގައި، ބޮޑެތި އުމްރާނީ މަޝްރޫޢުތަކަށް ހިނގާފައިވާ ފޮރިން ޑިސްބަރސްމަންޓްތައް އިތުރުވެފައިވުމުގެ ސަބަބުން، ޖުމުލަ ކެޕިޓަލް ޚަރަދު، ފާއިތުވި އަހަރުގެ މި މުއްދަތާ އަޅައިބަލާއިރު 73.2 އިންސައްތަ ދަށްކުރެވިފައިވާކަމަށް ފިނޭންސުން ބުނެއެވެ.

ސަބްސިޑީއަށް ސަރުކާރުން ކުރާ ހަރަދުތައް އިތުރުވަުންދާ މައްސަލާގައި އައިއެމްއެފް އަދި ވަރލްޑް ބޭންކުން ވަނީ ރާއްޖޭގައި ސަބްސިޑީ ދިނުމަށް ގެންގުޅެމުންދާ އުސޫލުތައް މުރާޖައާކޮށް، ސަބްސިޑީއަށް ކުރާ ހޭދަ ދަށްކުރުމަށް ގޮވާލާފައެވެ.