މޯލްޑިވްސް ސްޓޮކް އެކްސްޗޭންޖުގައި އެސްޓީއޯގެ ހިއްސާގެ މުއާމަލާތްތަކުގެ އަގުތައް ވަރަށްބޮޑަށް އުފުލިއްޖެއެވެ.

އެމްއެސްއީގެ ޑެއިލީ ޓްރޭޑިންގ ބޯޑަށް ބަލާއިރު، މިއަހަރު ފެށުނުނީއްސުރެ އެސްޓީއޯގެ ހިއްސާގެ އަގުތައް ވަނީ ވަރަށްބޮޑަށް އުފުލިފައެވެ. މިގޮތުން މިއަދު ސްޓޮކް އެކްސްޗޭންޖްގެ ބޯޑަށް ބަލާއިރު، ހިއްސާގެ ބާޒާރުގައި ލިސްޓްކޮށްފައިވާ ކުންފުނިތަކުގެ ތެރެއިން ހިއްސާގެ އަގު އެންމެ މަތީގައި އުޅެނީ އެސްޓީއޯކަން ފާހަގަކޮށްލެވެއެވެ.

އެސްޓީއޯގެ ހިއްސާ ވިއްކުމަށް އެންމެ މަތީއަގެއްގެ ގޮތުގައި 2،090 ރުފިޔާ ހުށަހަޅާފައިވާއިރު، އެންމެ ދަށް އަގެއްގެ ގޮތުގައި ހުށަހަޅާފައިވަނީ 1،895 ރުފިޔާއެވެ. އެސްޓީއޯގެ ހިއްސާ ގަތުމަށް އެންމެ މަތީ އަގަކަށް 1،820.07 ރުފިޔާ ހުށަހަޅާފައިވާއިރު ގަތުމަށް އެންމެ ދަށް އަގެއްގެ ގޮތުގައި ހުށަހަޅާފައިވަނީ، 1،820.06 ރުފިޔާއެވެ.

އަހަރުގެ މިހާތަނަށް މޯލްޑިވްސް ސްޓޮކް އެކްސްޗޭންޖުގައި 101 ހިއްސާ ގަނެވިއްކުމުގެ މުއާމަލާތް ކުރިއިރު، އެ މުއާމަލާތްތަކުގެ އަގު 142،225.5 ރުފިޔާއަށް އަރައެވެ. ސެކަންޑްރީ މާކެޓްގައި އެސްޓީއޯގެ ހިއްސާގެ އަގު އުފުލެން ފަށާފައިމިވަނީ މާލީގޮތުން އެކުންފުނި ހޯދަމުންދާ ކުރިއެރުންތަކުގެ ސަބަބުންނެވެ. އެސްޓީއޯއިން ވަނީ މިދިޔަ އަހަރުގެ ވިޔަފާރީގެ ފައިދާއިން ހިއްސާއަކަށް 80 ރުފިޔާ ބަހާފައެވެ. މިދިޔަ އަހަރުވެސް އެސްޓީއޯއިން ވަނީ ހިއްސާގެ ފައިދާގެ ގޮތުގައި އެ އަދަދު ބަހާފައެވެ.