މުލަކު އަތޮޅުގައި ތަރައްގީކުރި ފުރަތަމަ އެއާޕޯޓް، މ. މުލި އެއާޕޯޓް ރަސްމީކޮށް ހުޅުވައިފި އެވެ.

މުލި އެއާޕޯޓް ރަސްމީކޮށް ހުޅުވައިދެއްވީ މިއަދު އެރަށުގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.

އެތެރޭގެ އުދުހުންތަކަށް ހާއްސަ މި އެއާޕޯޓަކީ 1،200 މީޓަރު ދިގު، 30 މީޓަރު ފުޅާ ރަންވޭ އަކާއި، ޓެކްސީވޭއަކާއި އޭޕްރަން ގާއިމުކޮށްފައިވާ އެއާޕޯޓެކެވެ. އެއާޕޯޓް ހިންގަނީ ރީޖަނަލް އެއާޕޯޓްސް ކޮމްޕެނީން އިންނެވެ.

އެ އެއާޕޯޓަށް ޓެސްޓް ފްލައިޓް ޖައްސާފައިވަނީ މި އަހަރުގެ އޭޕްރީލް މަހުގައެވެ.

މުލީގައި ބިންހިއްކުމުގެ މަސައްކަތްކުރަން އެމްޓިސީސީ އާއި ހަވާލުކޮށް ސޮއި ކުރެވުނީ، މިހާރުގެ ރައީސް ޑރ. މުހައްމަދު މުއިއްޒު ހައުސިން މިނިސްޓަރު ކަމުގައި ހުންނެވި އިރު 2014 ވަނަ އަހަރު އެވެ.

މި މަޝްރޫއުގެ ދަށުން 14 ހެކްޓަރުގެ ބިން ހިއްކާއި، 1،812 މީޓަރުގެ ސަރަހައްދެއްގައި ގޮނޑުދޮށް ހިމާޔަތް ކުރުމުގެ މަސައްކަތް ކޮށްފައިވެ އެވެ.

މި މަޝްރޫއަށް ދިވެހި ދައުލަތުގެ ބަޖެޓުން 540 މިލިއަން ރުފިޔާ ހަރަދުކޮށްފައިވާ ކަމަށް ކޮންސްޓްރަކްޝަން މިނިސްޓަރ އަބްދުالله މުއްޠަލިބު ވަނީ ވިދާޅުވެފައެވެ.