މ.މުއްޔާއި ނާލާފުށި ގުޅުވާލެދޭ ކޯޒްވޭ މަޝްރޫޢުގެ އަމަލީ މަސައްކަތް މިއަދު ރަސްަމީކޮށް ފަށައިފިއެވެ.
އެ ދެރަށުގެ ކޯޒްވޭގެ އަމަލީ މަސައްކަތް ރަސްމީކޮށް ފައްޓަވައިދެއްވީ، މިހާރު މުއްޔަށް ކުރައްވަމުންގެންދަވާ ދަތުރުފުޅުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ.
މި މަޝްރޫޢު ފެއްޓެވުމުގެ ކުރިން މިއަދު މުލި އެއާޕޯޓް ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ މިއަދު އަމަލީ މަސައްކަތް ފެށިގެންދާ ކޯޒްވޭގެ މަސައްކަތަކީ އިޤްތިސާދީ މަޝްރޫޢުއެއް ކަމަށެވެ. މި މަޝްރޫޢުގެ ސަބަބުން ދެ ރަށުގެ ރައްޔިތުންނަށްވެސް ފައިދާތަކެއް ލިބިގެންދާނޭކަމަށް ރައީސް ވިދާޅުވިއެވެ.
ކޯޒްވޭގެ މަސައްކަތް ކުރަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ނެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ، 600 ދުވަހުގެ ތެރޭގައި ނިންމާގޮތަށް 125.58 މިލިއަން ރުފިޔާއަށެވެ. މި މަޝްރޫޢުގެ ދަށުން 655 މީޓަރު ދިގުމިނުގެ ކޯޒްވޭއެއް އަޅާނެއެވެ. އެއާއެކު 112 މީޓަރުގެ ރިވެޓްމެންޓް ޖެހުމާއިއެކު 15 މީޓަރުގެ ގްރޮއިން ޖެހުމަށް ވަނީ ހަމަޖެހިފައެވެ. މީގެ އިތުރުން ކޯޒްވޭގެ މަގުގައި ތާރުއެޅުމާއި މަގުބައްތި ޖެހުންވެސް މި މަސައްކަތުގެ ތެރޭގައި ހިމެނެއެވެ.
ރައީސް ޑރ. މުއިއްޒު ވިދާޅުވީ ކޯޒްވޭ އެޅުމަށް އެމްޓީސީސީއަށް ދީފައިވާ 600 ދުވަހުގެ ކުރިން އެކުންފުނިން އެ މަސައްކަތް ނިންމާނޭކަމަށް އުއްމީދު ކުރާަކަމަށާއި މިއީ ވަރަށް މުހިއްމު މަޝްރޫޢުއެއް ކަމަށެވެ.
Advertisement
This content is created and paid for by advertisers and does not involve Voice Journalists
