ވިޔަފާރި ބޭންކުތަކުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ބޭރުފައިސާ ވިއްކާ ނިސްބަތް އިތުރުކުރަން ލާޒިމްކޮށްފިއެވެ.

ބޭރުފައިސާ ގަނެވިއްކުމުގެ އުސޫލަށް އެންމެފަހުން ގެނައި ބަދަލާއެކު، ޑޮލަރުން އާމްދަނީ ލިބޭ ޓޫރިޒަމް ވިޔަފާރިތަކަށް ވަނީ، ބޭންކް ތަކަށް ޑޮލަރު މާރުކުރަންޖެހޭގޮތަށް ހަމަޖައްސާފައެވެ. އެމްއެމްއޭއިން މިހާތަނަށް ބޭންކްތަކަށް ލާޡިމްކޮށްފައި އޮންނަނީ ބޭރު ފައިސާއިން އާމްދަނީ ލިބޭ ފަރާތްތަކުން، ބޭންކުތަކަށް މާރުކުރާ ފައިސާގެ ތެރެއިން 60 އިންސައްތަ އެ އޮތޯރިޓީއަށް މާރުކުރާ ގޮތަށެވެ. 

އެމްއެމްއޭއިން މިއަދު ނެރެފައިވާ ބަޔާނެއްގައި ބުނެފައިވަނީ، ކޮންމެ ހަފްތާއަކު ބޭންކުތަކުން އޮތޯރިޓީއަށް ވިއްކަންޖެހޭ ބޭރު ފައިސާ އަންނަ ޖޫންމަހުގެ އެއްވަނަ ދުވަހުން ފެށިގެން %60 އިން %90 އަށް އިތުރުކުރުމަށް ނިންމާފައިވާކަމަށެވެ. މި ބަދަލު ގެންނަން ޖެހުނު މައިގަނޑު ސަބަބަކީ، އެމްއެމްއޭއިން ބޭންކުތަކަށް ކޮންމެ ހަފްތާއަކު ވިއްކާ ބޭރު ފައިސާ މެދުވެރިކޮށް، މިހާރަށްވުރެ ހަރުދަނާ ގޮތެއްގައި، ވިޔަފާރިތަކަށް ބޭނުންވާ ބޭރު ފައިސާ ބޭންކުތަކުން ހަމަޖައްސައިދިނުމަށް މަގުފަހިކުރުމަށްކަމަށް އެ އޮތޯރިޓީން ބުންޏެވެ.

އެމްއެމްއޭއިން ބޭރުފައިސާ މާރުކުރުމުގެ ޤަވާއިދަށް ގެނައި އިސްލާހާ ގުޅިގެން ޓޫރިޒަމް ވިޔަފާރިކުރާ ކުންފުނިތަކުން މިހާރު، މަހެއްގެ މައްޗަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ އާމްދަނީގެ 20 އިންސައްތަ ޑޮލަރު މާކުރަން ޖެހެއެވެ. ގެސްޓްހައުސްތަކުން މާރުކުރަންޖެހެނީ ބޮލަކަށް 25 ޑޮލަރު، ނުވަތަ އެފަރާތަކަށް މަހެއްގެ މައްޗަށް ލިބޭ އާމްދަނީގެ 20 އިންސައްތަ ޑޮލަރެވެ.

ބޭރުފައިސާ މާރުކުރުމުގެ ގަވައިދަށް ގެނައި ބަދަލާ ގުޅިގެން ރައީސް ޑރ.މުހައްމަދު މުއިއްޒު ވިދާޅުވެފައިވަނީ، ދައުލަތުގެ ބައިތުލްމާލަށް ލިބޭ ޑޮލަރުގެ މަންފާ ކުރިއަށްއޮތްތަނުގައި ދިވެހި ރައްޔިތުންނަށް ލިބޭނޭކަމަށެވެ. ޑޮލަރު މާރުކުރުމުގެ ގަވާއިދު ހަރުދަނާކުރިފަހުން ބޭންކަށް ޑޮލަރު ލިބޭ އަދަދަދު އިތުރުވެފައިވާއިރު، ރޯދަމަހު އުމްރާއަށްދިޔަ މީހުނަށް ބޭންކް ރޭޓްގައި ކުރިއަށްވުރެ ފަސޭހަގޮތެއްގައި ޑޮލަރު ދޫކުރިކަން ފާހަގަކޮށްލެވެއެވެ. މީގެ އިތުރުން ޤައުމީ ބޭންކުން ވަނީ މިފަހަރު ހައްޖަށްދާ މީހުންނަށް ޑެބިޓު ކާޑުތަކުން ބޭރު ފައިސާގެ މުއާމަލާތްކުރެވޭނެ މިންވަރު 2،000 ޑޮލަރަށް ލިމިޓް އިތުރުކޮށްފައެވެ.