ނ.މާފަރު އިންޓަރނޭޝަނަލް އެއާޕޯޓަށް ފުރަތަމަ ފަހަރަށް ބޮއިން 777 މަރުކާގެ ބޯޓެއް މިއަދު ޖައްސައިފިއެވެ.
މާފަރު އެއާޕޯޓަށް ޖައްސާފައިވަނީ އެމިރޭޓްސް އެއާލައިނުގެ ބޯޓެކެވެ. އެމިރޭޓްސްގެ މި ވައިޑްބޮޑީ އެއާކްރާފުޓް މާފަރަށް ޖައްސާފައިވަނީ, އެފަދަ ބޮޑެތި މަތިންދާބޯޓު ޖެއްްސޭނެ ފެންވަރު ހުރިތޯ ޔަގީންކުރުމަށް ކުރިއަށްގެންދާ ސެޓިފިކޭޝަން ޕްރޮސެސްގެ ތެރެއިންނެވެ. އެގޮތުން ބެލި ކަންކަމުގެ ތެރޭގައި ހިމެނެނީ:
- ބޯޓު ޖެއްސުމާއި ފުރުމުގައި ރަންވޭގެ ފެންވަރު ވަޒަންކުރުން
- ދަތުރުވެރިންނަށް ހިދުމަތްދިނުމާއި، ތެއޮ އެޅުމުގެ އިތުރުން ގްރައުންޑް ހޭންޑްލިން އެސެސްމަންޓްތައް ހެދުން
- ނެވިގޭޝަނާއި އެއާ ޓްރެފިކް ކޮންޓްރޯލް އިވެލުއޭޝަންތައް ހެދުން
މާފަރު އިންޓަރނޭޝަނަލް އެއާޕޯޓަސް ބޮޑެތި ބޯޓުފަހަރު ޖެއްސޭގޮތަށް އެއާޕޯޓްގެ ރަންވޭ ބޮޑުކުރުމުގެ މަސައްކަތް މިދިޔަ އަހަރު ވަނީ ކުރިއަށްގެންގޮސްފައެވެ. މާފަރު އެއާޕޯޓް ރަންވޭ އިތުރަށް ތަރައްޤީކުރުމަށް ފެށި މަޝްރޫޢުގެ ދަށުން ވަނީ، 650 މީޓަރު އިތުރުކުރެވި، ރަންވޭގެ ދިގުމިން 2800 މީޓަރަށް ބޮޑުކޮށްފައެވެ. އެއީ ބޮއިން 777 މަރުކާގެ ބޯޓު ޖެއްސުމަށް ބޭނުންވާ މިންގަނޑެވެ.
މާފަރު އިންޓަރނޭޝަނަލް އެއާޕޯޓަކީ ވެލާނާ އިންޓަރނޭޝަނަލް އެއާޕޯޓް ފިޔަވައި ދެން އެންމެ ގިނަ އަދަދަކަށް ޕްރައިވެޓް ޖެޓް ޖައްސާ އެއާޕޯޓެވެ. މާފަރު އެއާޕޯޓަށް މިދިޔަ އަހަރުވެސް ވަނީ ރެކޯޑް އަދަދަކަށް ޖެޓް ޖައްސާފައެވެ.
Advertisement
This content is created and paid for by advertisers and does not involve Voice Journalists
