މިއަދާއި މާދަމާ އެންޑަމަން ޖަޒީރާތަކުގެ މަތިން ވައިގެ ދަތުރުފަތުރުކުރުން ވަގުތީ ގޮތުން އިންޑިއާއިން މަނާކޮށްފައިވަނީ މިސައިލެއް ޓެސްޓްކުރަންކަމަށް ބެލެވޭކަމަށް މުހައްލިލުން ބުނެފިއެވެ.
މެއި މަހުގެ 16 ވަނަ ދުވަހު އިންޑިއާގެ ކަމާ ބެހޭ ފަރާތްތަކުން ނެރުނު ނޯޓިސް ޓު އެއަރމެންގައި ވަނީ މިއަދާއި މާދަމާ، ކޮންމެ ދުވަހަކު 3 ގަޑިއިރަށް އެންޑަމަން އެންޑް ނިކޮބަރ އައިލެންޑްސްގެ މަތިންނާއި، ބޭ އޮފް ބެންގޯލް އަދި އެންޑަމަން ކަނޑުގެ ވަކި ސަރަހައްދެއް މަދަނީ ވައިގެ އުދުހުންތަކަށް ބޭނުން ނުކުރެވޭނެކަމަށެވެ. ރާއްޖޭގެ އިރުމަތިން އޮންނަ އެންޑަމަން ޖަޒީރާތަކަކީ އިންޑިއާއިން މީގެ ކުރިންވެސް އިސްތިރާޖީ ބައެއް މިސައިލްތަކާއި ވައިގެ އަސްކަރީ ނިޒާމުތައް ޓެސްޓްކުރުމަށް ބޭނުންކުރާ ރަށްތަކެކެވެ.
މިއަހަރުގެ ޖެނުއަރީ މަހުވެސް އެންޑަމަން އައިލެންޑްސްގައި އިންޑިއާއިން ވަނީ ބްރާމޯސް މިސައިލެއް ޓެސްޓްކޮށްފައެވެ. އެހެންކަމުން މިއަދާއި މާދަމާވެސް އިންޑިއާގެ އަސްކަރިއްޔާއިން މަސައްކަތްކުރަނީ މިސައިލެއް ނުވަތަ ވައިގެ އަސްކަރީ ނިޒާމެއް ޓެސްޓްކުރުމަށްކަމަށް ބެލެވޭކަމަށް މުހައްލިލުން ބުނެއެވެ.
އިންޑިއާއިން އަންނަނީ އެގައުމުގެ ހަތިޔާރު ކޮށާރު ޒަމާނީކޮށް ތަރައްގީކުރުމަށް ގިނަ މަސައްކަތްތަކެއް ކުރަމުންނެވެ.
Advertisement
This content is created and paid for by advertisers and does not involve Voice Journalists
