ނިމިގެންދިޔަ ފުރަތަމަ ކުއާޓަރުގައި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑިސީ) އަށް ސާފްފައިދާގެ ގޮތުގައި 3.4 މިލިއަން ރުފިޔާ ލިބިއްޖެއެވެ.

ސަރުކާރާއި ރައްޔިތުން ހިއްސާވާ ޓޫރިޒަމް ކުންފުނިން ނެރެފައިވާ ފުރަތަމަ ކުއާޓަރުގެ މާލީބަޔާނަށް ބަލާއިރު، މި ކުއާޓަރުގައި އާމްދަނީގެ ގޮތުގައި ވަނީ 1.3 މިލިއަން ޑޮލަރު ނުވަތަ 20 މިލިއަން ރުފިޔާ ލިބިފައެވެ. މި ކުއާޓަރުގައި ޖުމްލަ ހަރަދުގެ ގޮތުގައި 6.9 މިލިއަން ރުފިޔާ ހޭދަވިއިރު، ވިޔަފާރި ހިންގައިގެން މި މުއްދަތުގެ ތެރޭގައި ވަނީ 4.7 މިލިއަން ރުފިޔާގެ ފައިދާއެއް ވެފައެވެ.

ފުރަތަމަ ކުއާޓަރުގައި ޓެކްސްއަށް ކެނޑުމުގެ ކުރިން އެމްޓީޑީސީގެ ފައިދާއަކީ، 3.9 މިލިއަން ރުފިޔާއެވެ. ނަމަވެސް ޓެކްސްއަށް ކަނޑުމަށްފަހު، ފުރަތަމަ ކުއާޓަރުގައި ސާފްފައިދާގެ ގޮތުގައި ރެކޯޑްކޮށްފައިވަނީ، 3.4 މިލިއަން ރުފިޔާއެވެ.

އެމްޓީޑީސީގެ ވިޔަފާރީގެ އޮޕަރޭޝަންތަކަށް ބަލާއިރު، އެކުންފުނިން ހދ އަތޮޅުގައި ތަރައްޤީކުރަމުން އަންނަ ނާގޯށި ރިސޯޓް އަދިވެސް އޮތީ ހުއްޓިފައެވެ. ނަމަވެސް ހުޅުމާލޭގައި ތަރައްޤީކުރަމުންގެންދާ އެމްޓީޑީސީގެ ހެޑްއޮފީހުގެ މަސައްކަތް ކަނޑައެޅިފައިވާ ތާވަލާއެއްގޮތަށް ކުރިއަށްދާކަމަށް އެކުންފުނިން ފާހަގަކުރެއެވެ.

އެމްޓީޑީސީން ފުރަތަމަ ކުއާޓަރުގެ ރިޕޯޓްނެރެފައިމިވަނީ ޕަބްލިކް ކުންފުނިތަކުން، ނުވަތަ ހިއްސާގެ ބާޒާރުގައި ލިސްޓްކޮށްފައިވާ ކުންފުނިތަކުން ރިޕޯޓް ނެރުމަށް ދީފައިވާ މުހުލަތު ފަހަނައަޅައި ދިޔަފަހުންނެވެ. ލިސްޓްކޮށްފައިވާ ކުންފުނިތަކުން ކޮންމެ ކުއާޓަރެއް ނިމޭތާ 30 ދުވަހުގެ ތެރޭގައި އެ ކުއާތަރެއްގެ މާލީބަޔާން އާއްމުކުރަން ޖެހެއެވެ. އެމްޓީޑީސީ މީގެ ކުރިން ފާހަގަކުރެވެނީ މާލީބަޔާންތައް އެންމެފަހުން އާއްމުކުރާ ކުންފުނީގެ ގޮތުގައެވެ. މާލީބަޔާން ހުށަހެޅުން ލަސްވެގެން ސީއެމްޑީއޭއިން މިހާތަނަށް އެންމެގިނައިން އިންޒާރުދިން ކުންފުނިތަކުގެ ތެރޭގައި އެމްޓީޑީސީއަކީ އެންމެ ކުރީގައި އުޅޭ އެއް ކުންފުންޏެވެ. 

އެމްޓީޑީސީއަކީ ފަތުރުވެރިކަމުގެ މަންފާ ދިވެހި ރައްޔިތުންނަށް ސީދާ ގޮތެއްގައި ފޯރުކޮށްދިނުމަށް ސަރުކާރުން 2006 ވަނަ އަހަރު އުފެއްދެވި ކުންފުންޏެކެވެ. ނަމަވެސް އަދި މިހާހިސާބަށް އާއިރުވެސް އެމްޓީޑީސީ އުފެއްދި ހަގީގީ މަޤްސަދު ހާސިލްވަމުން ނުދާކަމަށް އެކުންފުނީގެ ހިއްސާދާރުން ފާހަގަކުރެއެވެ.