މިދިޔަ އަންގާރަދުވަހުގެ ނިޔަލަށް މިހާތަނަށް ރާއްޖެއަށް 923,390 ފަތުރުވެރިން ޒިޔާރަތްކޮށް އެއް މިލިއަން ފަތުރުވެރިން އައުމާ ގާތަށް ޖެހިލައިފިއެވެ.

ޓޫރިޒަމް މިނިސްޓްރީން ނެރެ އާއްމުކޮށްފައިވާ ތަފާސްހިސާބުތަކަށް ބަލާއިރު، މިހާތަނަށް 923,390 ފަތުރުވެރިން ޒިޔާރަތްކުރިއިރު މިއީ މިދިޔަ އަހަރުގެ މި މުއްދަތާ އަޅާބަލާއިރު، 8 އިންސައްތަ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ، 854,928 ފަތުރުވެރިންނެވެ. އަދި އޭގެ ކުރީ އަހަރު ޒިޔާރަތްކޮށްފައިވަނީ، 768,668 ފަތުރުވެރިންނެވެ. ރާއްޖެއަށް އެއްމިލިއަން ފަތުރުވެރިން ޒިޔާރަތްކުރުމަށް މަދުވަނީ 76،610 ފަތުރުވެރިންނެވެ. މަހެއްގެ މައްޗަށް ރާއްޖެއަށް ލައްކައަކަށްވުރެ ގިނަ ފަތުރުވެރިން ޒިޔާރަތްކުރާއިރު، ރާއްޖެއަށް އެއް މިލިއަން ފަތުރުވެރިން އައުމަށް ހިފާފައިވާ އަމާޒަށް އަންނަމަހުގެ ތެރޭގައި ވާސިލްވެވޭނޭކަމަށް ވަނީ ބެލެވެއެވެ.

ތަފާސްހިސާބަށް ބަލާއިރު ރާއްޖެއަށް މިއަހަރު އެންމެގިނައިން ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. 

- ޗައިނާ:  107,544

- ރަޝިއާ: 99,681

- އިނގިރޭސިވިލާތް: 94,671

- އިޓަލީ:  80,423

- ޖަރުމަނުވިލާތް:  71,005

މިމަހުގެ މިހާތަނަށް ރާއްޖެއަށް 92,646 ފަތުރުވެރިން ޒިޔާރަތްކޮށްފައިވައިރު، ޖުމްލަގޮތެއްގައި ރާއްޖެއަށް ދުވާލެއްގެ މައްޗަށް ޒިޔާރަތްކުރާ ފަތުރުވެރިންގެ އަދަދު އުޅެނީ، 4,632 ގައެވެ. ރާއްޖެއަށް ޒިޔާރަތްކުރާ ފަތުރުވެރިން އެންމެ ގިނއިން ރިސޯޓްތަކުގައި ޗުއްޓީ ހޭދަކުރާއިރު، މިއަހަރު ރިސޯޓްތަކުގައި ޗުއްޓީ ހޭދަކުރި ފަތުރުވެރިްނގެ އަދަދު އުޅެނީ 657,289 އެވެ. ގެސްޓްހައުސްތަކަށް ޒިޔާރަތްކުރި ފަތުރުވެރިްނގެ އަދަދަު 215,494 ގައި އުޅޭއިރު، ފަތުރުވެރިން ދެން އެންމެގިނައިން ޗުއްޓީ ހޭދަކުރުމަށް ދިޔައީ ހޮޓާތަކަށާއި ސަފާރީތަކަށެވެ.

ހިނގަމުން މިހާރު މިދަނީ ރާއްޖޭގެ ފަތުރުވެރިކަމުގެ ލޯ ސީޒަނެވެ. ސަރުކާރުން މިއަހަރަށް އަމާޒު ހިފާފައިވަނީ ރާއްޖެއަށް 2.3 މިލިޔަން ފަތުރުވެރިން ގެނައުމަށެވެ