އިސްރާއީލް ސިފައިން އަނެއްކާވެސް ޢައްޒާސިޓީގެ ސުކޫލަކަށް އަމާޒުކޮށް ބޮމުގެ ހަމަލާއެއް ދީފިއެވެ.

ބޮމުގެ ހަމަލާ އަމާޒުކުރި މި ސުކޫލަކީ ޤައްޒާގެ ރައްޔިތުން ހިޔާވަހިކަން ހޯދަމުންދިޔަ ސުކޫލެކެވެ. ޔަހޫދީ ސިފައިން ޢައްޒާއަށް ދެމުންދާ ހަމަލާތައް ފަލަސްތީނުގެ އާއްމު ރައްޔިތުންގެ ގެދޮރަށް އަމާޒުކުރަމުންދިއުމާ ގުޅިގެން ގިނަ އަދަދެއްގެ ރައްޔިތުން ހިމާޔަތް ހޯދުމުގެ ގޮތުން އުޅެމުން އަންނަނީ ސްކޫލްތަކުގައެވެ. 

މީޑިޔާތަކުން ރިޕޯޓްކޮށްފައިވާ ގޮތުގައި އެންމެފަހުން ސްކޫލަށް ދިން މި ހަމަލާގައި 36 މީހުންވަނީ ޝަހީދުވެފައެވެ. މީގެ ތެރޭގައި 18 ކުޑަކުދިންވެސް ހިމެނެއެވެ. މިފަހަރު މި ދިން ހަމަލާއާ ގުޅޭގޮތުން ޔަހޫދީ ސިފައިން އަދި ވަކިއެއްޗެކޭ ނުބުނެއެވެ. ޔަހޫދީ ސިފައިން ވަނީ މީގެ 2 ދުވަސް ކުރިންވެސް ސްކޫލަކަށް އަމާޒުކޮށް ހަމަލާތަކެއް ދީފައެެވެ.

އިސްރާއީލުން ބުނާގޮތުގައި ސްކޫލްތަކަށް ހަމަލާތައް ދެނީ ހަނގުރާމަވެރިން ފިލުމަށް އެތަންތަން ބޭނުންކުރާތީއެވެ. ނަމަވެސް އެކަން އިސްރާއީލް ސިފައިންނަށް މިހާތަނަށްވެސް އޮތީ ޔަގީންކޮށް ނުދެވިއެވެ.

މި ހަމަލާއަށްފަހު ޢައްޒާގެ ހެލްތް މިނިސްޓްރީން ބުނެފައިވަނީ، 2023 ވަނަ އަހަރުގެ އޮކްޓޫބަރު މަހުން ފެށިގެން އިސްރާއީލުން ފެށި ހަމަލާތަކުގައި މިހާތަނަށް ފަލަސްތީނުގެ 53,939 މީހުން ޝަހީދުކޮށްލައި، 122,797 މީހުން ޒަހަމް ކޮށްލާފައިވާކަމަށެވެ. ކަމާބެހޭ ފަރާތްތަކުން ލަފާކުރާގޮތުގައި މިއަދަދު 61,700 އަށް ވުރެ މަތިވާނެއެވެ. ސަބަބަކީ ބިމާ ހަމަވެފައިވާ އިމާރަތްތަކުގެ ދަށުގައިވެސް އެތަކެއް ބަޔަކު ތާށިވެފައިވާތީއާއި އަދި އެއިމާރަތްތަކުގެ ދަށުގައި ތާށިވެފައިތިބި ގިނަމީހުން ދުނިޔޭގައި ހުންނާނެ ކަމުގެ އެއްވެސް އުންމީދެއް މިހާރު ނެތުމުންނެވެ.

ޢައްޒާގައި މިހާރު އިންސާނީ ކާރިސާއެއްގެ ހާލަތު ކުރިމަތިވެފައިވާކަމަށް އދ އާއި އިންސާނީ ހައްގުތަކަށް މަސައްކަތްކުރާ އެހެނިހެން ޖަމިއްޔާ ޖަމާއަތްތަކުންވެސް ވަނީ ބުނެފައެވެ. ޢައްޒާގެ ހާލަތު އިތުރަށް ގޯސްވީ، އިސްރާއީލުން ޢައްޒާއަށް ކާބޯތަކެއްޗާއި ސިއްހީ ފަރުވާދިނުމަށް ބޭނުންކުރާ އާލާތްތައް ވެއްދުމަށް ހުަރަސްއެޅުމުންނެވެ. އެހީގެ ޓްރަކްތައް އައްޒާއަށް ވަނުމަށް ކިއު ހަދާލާފައި އޮތްނަމަވެސް އިސްރާއީލް ސިފައިންގެ ހުއްދަ ދީގެން ނޫނީ ޓްރަކްތަކަކަށް ޢައްޒާ ތެރެއަށް ނުވަދެވެއެވެ.