ޖިއްދާ އެއާޕޯޓްގެ އިމިގްރޭޝަން ކިއުގައި ގިނަ ވަގުތު މަޑުކުރަންޖެހޭ ޖެހުމަކީ ހައްޖުގެ އަޅުކަމަށް ކުރާ ދަތުރުގައި މިހާތަނަށް ދިވެހި ހައްޖާޖީން ކުރަމުން އައި ތަޖުރިބާއެކެވެ. ހައްޖުގެ އަޅުކަން އަދާކުރުމަށް ދާ މީހުންގެ ތެރޭގައި، އެންމެ ގިނައީ މެދު އުމުރުން މަތީ މީހުންނާއި އުމުރުން ދުވަސްވީ މީހުންނެވެ. މީގެ އިތުރުން އެކި ބަލިތައް ތަހައްމަލުކުރަމުންދާ މީހުންވެސް މީގެ ތެރޭގައި ހިމެނޭކަން ފާހަގަކޮށްލެވެއެވެ.

ހައްޖަށް ދާއިރު ޖިއްދާ އެއާޕޯޓް އިމިގްރޭޝަން ކިއުގައި ގިނަވަގުތު މަޑުކުރަން ޖެހުމަކީ ހާއްސަ ގޮތެއްގައި އުމުރުން ދުވަސްވީ މީހުންނާއި، ބައެއްކަހަލަ ބަލިތައް ތަހައްމަލުކުރަުންދާ މީހުންނަށް އެހާ ފަސޭހަކަމަކަށް ނުވެއެވެ. އާއްމު ހާލަތުގައިވެސް 5 ވަރަކަށް ގަޑިއިރު މަތިންދާބޯޓުގައި ހޭދަކޮށް ގިނައިރުތަކެއްވަންދެން އިމިގްރޭޝަން ކިއު އާއި ލަގޭޖަށް މަޑުކުރަންޖެހުމަކީ ތަކްލީފެކެވެ.

ރާއްޖެއިން މިފަހަރު ހައްޖަށްދާ މީހުނަށް އޮތް އެންމެ ބޮޑު ހިތްހަމަ ޖެހުމަކީ ދިވެހިރާއްޖެ މައްކާ ރޫޓުގައި ހިމެނުމެވެ. މިއަދު ވަނީ މައްކާ ރޫޓު އިނީޝިއޭޓިވްގައި ރާއްޖެއިން ބައިވެރިވިކަން ރަސްމީކޮށް އިފްތިތާހްކޮށްފައެވެ. މައްކާ ރޫޓު އިނީޝިއޭޓިވްއަކީ ހައްޖުވެރިން އަމިއްލަ ޤައުމުން ފުރުމުގެ ކުރިން، ދެ ޤައުމުގެ އިމިގްރޭޝަނުން ކުރަންޖެހޭ ކަންކަން އަމިއްލަ ޤައުމުގެ އެއަރޕޯޓްގައި ތިބެ ނިންމައިގެން ފުރުމެވެ. ނަތީޖާއަކީ ޖިއްދާގެ އެއާޕޯޓްގެ އިމިގްރޭޝަންގައި ޙައްޖުވެރިން މަޑުކުރަން ނުޖެހި ހޮޓަލަށް ދެވޭގޮތަށް ކަންކަން އިންތިޒާމް ވެގެން ދިއުމެވެ. މައްކާރޫޓް މިއަދު އިފްތިތާހްވެގެން ދިއުމާއެކު ދިވެހި ހައްޖުވެރިންގެ ލަގެޖްތައް ހޯދުމަށް އެއާޕޯޓްގައި މަޑުކުރަން ނުޖެހި ލަގެޖްތައް ލިބޭނީ ހައްޖާޖީން ތިބޭ ހޮޓަލުންނެވެ.

މައްކާރޫޓް އިނީޝިއޭޓިވް އަކީ ހައްޖުވެރިންނަށް ލުއިފަސޭހަ ހިދުމަތެއް ފޯރުކޮށްދިނުމަށް ސައުދީ ރަސްގެފާނު ސަލްމާން ބިން ޢަބްދުލްޢަޒީޒާއި ޕްރިންސް މުޙައްމަދު ބިން ސަލްމާންގެ ސިޔާސަތުގެ ދަށުން ކުރިއަށްގެންދާ ޕްރޮގްރާމެކެވެ.

މައްކާ އިނީޝިއޭޓިވްގައި ހިމެނޭ ސައުދީ އޮފިޝަލުން ވީއައިއޭގައި... ފޮޓޯ: އިސްލާމިކް މިނިސްޓްރީ

މައްކާ ރޫޓް އިނީޝިއޭޓިވް އިފްތިތާހް ކުރެއްވުމަށްފަހު މިއަދު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ، މިއީ ވަރަށް ތާރީހީ ކަމެއްކަމަށާއި، މިކަމުގެ ސަބަބުން ހައްޖާޖީން ސައުދީއަށްކުރާ ދަތުރުތަކަށް އިންގިލާބީ ބަދަލެއް އަންނާނޭ ކަމަށެވެ. މިއީ ސައުދީއާ ރާއްޖެއާ ދެމެދު އޮތް އަހުވަންތަ ގުޅުން ދައްކުވައިދޭ ކަމެއްކަމަށްވެސް ރައީސް ވިދާޅުވިއެވެ. 

އާއްމު ގޮތެއްގައި ސައުދީން މައްކާ ރޫޓް އިނީޝިއޭޓިވް ހިދުމަތްދެނީ ހައްޖައްދާ މީހުންގެ އަދަދު 20،000 ހާހަށް އަރާނަމައެވެ. ނަމަވެސް ރާއްޖެއަށް މި ފުރުސަތު ސައުދީން ދީފައިވަނީ ހާއްސަ ހަދިޔާއެއްގެ ގޮތުންކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު މިއަދު ވަނީ ވިދާޅުވެފައެވެ. 

އިސްލާމިކް މިނިސްޓްރީން ބުނެފައިވަނީ، މިފަހަރު ރާއްޖެއިން 1،000 މީހުން ހައްޖުގެ އަޅުކަން އަދާކުރުމަށް ދަތުރުކުރާނޭކަމަށެވެ. މައްކާ އިނީޝިއޭޓިވްގެ އިތުރުންވެސް ސަރުކާރުން މިފަހަރު ވަނީ ދިވެހި ހައްޖާޖީނަށް ލުއިފަސޭހަ ވާނޭހެން ކަންކަން އިންތިޒާމުކޮށްފައެވެ. މީގެ ތެރޭގައި މިނާގައި ތިބޭ ފޭލިގޭގެ ފެންވަރު ރަނގަޅުކުރުމާއި، ދިވެހިންނަށް ހާއްސަ ކްލިނިކެއް ޤާއިމްކުރުން ހިމެނެއެވެ.