ލިޔެލާޖެހުމާއި ލާފެންކުރުމުގެ ބައިން ވަނަހޮވުމުގައި އިންސާފެއްނެތް: ތުޅާދޫ ކައުންސިލް
ދިވެހިންގެ އުފެއްދުންތެރިކަމުގެ ޤައުމީ މައުރަޒުގައި ބައިވެރިކުރި ދިވެހި އުފެއްދުންތަކުގެ ތެރެއިން "ލިޔެލާޖެހުމާއި ލާފެންކުރުމުގެ" ބައިން ވަނަ ހޮވުމުގައި ފަނޑިޔާރުން އިންސާފުން އެއްކިބާވެފައިވާކަމަށް މި މައުރަޒުގައި އެންމެ ގިނައިން ތަކެތި ބައިވެރިކުރި ބ.ތުޅާދޫ ކައުންސިލުން ބުނެފިއެވެ.
އުފެއްދުންތެރިކަމުގެ މައުރަޒުގެ ނަތީޖާ މިމަހުގެ 22 ވަނަ ދުވަހުގެ ރޭ ބާއްވާފައިވާއިރު، "ލިޔެލާޖެހުމާއި ލާފެންކުރުމުގެ" ބައިން އެއްވަނަ ހޯދާފައިވަނީ، ލ.ފޮނަދޫއަށް ނިސްބަތްވާ ޖަމއިްޔާއެއްކަމަށްވާ ވިމެން އެންހޭސްމެންޓް ޖަމިއްޔާއިން ބައިވެރިކުރި ލިޔެލާޖެހި ވާސް ނުވަތަ ޓުކުރި ނަމަކަށް ކިޔާ އުފެއްދުމެކެވެ. އެބައިން ދެވަނަ ލިބުނީ ތުޅާދޫއިން ބައިވެރިކުރި މީހެއްގެ އިސްކޮޅަށްވުރެ ދިގު ވާސް އަށެވެ.
އެތަކެއްޗަށް ވަނަދިން ގޮތުން ތުޅާދޫ އާއި ފޮނަދޫއަށް ނިސްބަތްވާ ބައެއް ފަރާތްތަކާ ދެމެދު ވަނީ ބަހުގެ ހަމަލާތަކެއްވެސް ބަދަލުކޮށްފައެވެ.
މިކަމާ ގުޅޭގޮތުން ތުޅާދޫ ކައުންސިލުން ނެރެފައިވާ ބަޔާނުގައި ބުނެފައިވަނީ، އުފެއްދުންތެރިކަމުގެ ޤައުމީ މައުރަޒުގެ ލަކުޑީގެ މަސައްކަތުގެ ތެރޭގައި ހިމެނޭ "ލިޔެލާޖެހުމާއި ލާފެންކުރުމުގެ" ބައިން ވަނަ ދިންގޮތް ގަބޫލު ނުކުރާހާލު، ނުހަނު ކަންބޮޑުވާ ކަމަށެވެ. ވަނަ ދިންގޮތް ސާފްކުރުމަށް ކައުންސިލުން އޮޅޫންފިލުވުމަށް ކުރި މަސައްކަތުން މިއަދާ ހަމަޔަށްވެސް އެދެވޭ ޖަވާބެއް ލިބިފައިވާކަން ފާހަގަކުރަމުން ތުޅާދޫ ކައުންސިލުން ބުނެފައިވަނީ، ލިޔެލާޖެހުމަކީ، ތުޅާދޫއަށް ހާއްސަ ތުޅާދޫގެ ފަހުރެއްކަމަށެވެ.
ތުޅާދޫ ކައުންސިލުން ބުނީ އެރަށުގެ ހުނަރުވެރި ފަންނުވެރިން ތައްޔާރުކުރި އުފެއްދުންތައް ހުއްޓައި ކަމުގެ އާޖުފާޖު ނުވެސް ދަންނަ ބަޔަކު ހަދާފައިވާ އެއްޗަކަށް އެ ގިންތިން އެއްވަނަ ލިބުން ވެގެންދިޔައީ މުޅި ގައުމުވެސް ސިހިގެންދިޔަ ކަމެއް ކަމަށެވެ. ތުޅާދޫ ކައުންސިލުން ވަނީ މައުރަޒަށް އިންސާފްކުރުމަށް އެކުލަވާލެވުނު ފަނޑިޔާރުންގެ ކޮމިޓީއަށް ސިޔާސީ ނުފޫޒު ވަދެފައިވާކަމަށް ދެކޭކަމަށް ތުހުމަތުކޮށްފައެވެ.
ލ.ފޮނަދޫ ވިމެންސް އެންހޭންސްމަންޓް ޖަމިއްޔާއިން ބައިވެރިކުރި ތަކެތި. މެދުގައި އެއްވަނައަށް ދިޔަ އުފެއްދުން... ފޮޓޯ: ވޮއިސް
މިފަދަ މައުރަޒެއްގެ ފަނޑިޔާރުންގެ ބެންވުގައި މިކަމުގެ ވައްޓަފާޅިއާއި އާޖުފާޖު ދަންނަ ހުނަރުވެރި ފަންނުވެރިން ހިމަނަން ޖެހޭނޭކަމަށާއި އެހެންނޫނީ މިފަދަ ކަވި ބުރަ މަސައްކަތަކަށް އިންސާފްވެރިކަމާއެކު މާކްސް ދޭން އެނގޭނެކަމަށް ގަބޫލު ނުކުރާކަމަށްވެސް ތުޅާދޫ ކައުންސިލުން ވަނީ ބުނެފައެވެ.
މި މައްސަލާގައި ލ.ފޮނަދޫ ވިމެންސް އެންހޭންސްމަންޓް ޖަމިއްޔާއިންވެސް ވަނީ ވާހަކަދައްކާފައެވެ. އެޖަމިއްޔާގެ އޮފިޝަލަކު މީޑިއާގައި ބުނެފައިވަނީ، ފޮނަދޫގައި ވީ ކްރިއޭޓިވް ޓްރެއިނިން ސެންޓަރުގެ ނަމުގައި ތަނެއް ރަޖިސްޓްރީކޮށް ގިނަ އަދަދެއްގެ ބަޔަކު އެ ދާއިރާއިން ތަމްރީނުކުރެވިފައިވާކަމަށެވެ. އެގޮތުން މައުރަޒުން އެއްވަނަ ލިބުނު އެ އުފެއްދުމަކީ ސީދާ އެރަށުގެ އުފެއްދުމެއްކަން އޮފިޝަލް ވަނީ ފާހަގަކޮށްފައެވެ.
Advertisement
This content is created and paid for by advertisers and does not involve Voice Journalists
