އިޒްރޭލުގެ ޔަހޫދީ ސިފައިން އަނެއްކާވެސް ޢައްޒާގެ ރެފިއުޖީ ކޭމްޕަކަށް އަމާޒުކޮށް ބޮމުގެ ހަމަލާއެއް ދީފިއެވެ.
އިޒްރޭލުން ރެފިއުޖީ ކޭމްޕަށްދިން މި ހަމަލާގައި 23 މީހަކު ވަނީ ޝަހީދުކޮށްލާފައެވެ. މީޑިޔާތަކުން ރިޕޯޓްކޮށްފައިވާ ގޮތުގައި އިއްޔެ އެކަނިވެސް ޢައްޒާއަށް ދިން ހަމަލާތަކުގައި ޖުމުލަ 55 ފަލަސްޠީނު ރައްޔިތުން ވަނީ ޝަހީދުކޮށްލާފައެވެ.
މީގެ ތިން ދުވަސް ކުރިންވެސް އިޒްރޭލުގެ ސިފައިން ވަނީ ޢައްޒާގެ ރައްޔިތުން ހިޔާވަހިކަން ހޯދަމުންދިޔަ ސްކޫލަކަށް އަމާޒުކޮށް ބޮމުގެ ހަމަލާއެއް ދީފައެވެ. އެހަމަލާގައި ވަނީ ޖުމުލަ 36 ފަލަސްޠީނު ރައްޔިތުން ޝަހީދުކޮށްލާފައެވެ. އިޒުރޭލުން ބުނާގޮތުގައި މިފަދަ ތަންތަނަށް ހަމަލާދެނީ ހަމާސްގެ ހަނގުރާމަވެރިން ފިލުމަށް އެތަންތަން ބޭނުންކުރާތީއެވެ. އެހެންނަމަވެސް ހަމާސްއިން އިޒްރޭލުގެ އެ ތުހުމަތުތައް ދޮގުކުރެއެވެ. އިޒްރޭލުން އެފަދަ ތުހުމަތުތައް ކުރަމުންދިޔަ ނަމަވެސް ޔަހޫދީ ސިފައިންނަށްވެސް އެބާވަތުގެ ތުހުމަތުތައް އޮތީ ޔަގީންކޮށް ނުދެވިއެވެ. ފަލަސްޠީނުގެ ހައްޤުތައް ހިމާޔަތްކުރުމަށް ވަކާލާތުކުރާ ފަރާތްތަކުން ބުނާގޮތުގައި، އިޒްރޭލުން ފަލަސްޠީނުގެ ރައްޔިތުންނާ ދެކޮޅަށް ހިންގަނީ ނަސްލު ނައްތާލުމަށް ހިންގާ ލާއިންސާނީ ޤަތުލުއާންމުތަކެވެ.
އިޒްރޭލުން ދަނީ ޢައްޒާގެ އިތުރުން ހުޅަނގު އައްސޭރީގައިވެސް ފަލަސްޠީނުގެ ރައްޔިތުންނާ ދެކޮޅަށް ދަނީ ލާއިންސަނީ ހަމަލާތަށް ދެމުންނެވެ. އެގޮތުން ޢައްޒާއަށް ކާބޯތަކެއްޗާއި ބޭސް ފަރުވާއަށް ބޭނުންވާ ތަކެތި ވެއްދުމަށް ދަނީ ހުރަސް އަޅަމުންނެވެ.
އިޒްރޭލުން ޢައްޒާއަށް ހަމަލާދެމުންދާތާ މިހާރު އެއް އަހަރާއި 6 މަސް ވަނީ ވެފައެވެ. 2023 ވަނަ އަހަރުގެ އޮކްޓޫބަރު 7 ކުން ފެށިގެން އިޒްރޭލުން ޢައްޒާއަށް ދަނީ ހަމަލާދެމުންނެވެ. މި ހަމަލާތަކުގައި ފަލަސްޠީނުގެ 54،000 މީހުންވަނީ ޝަހީދުވެފައެވެ. ޢައްޒާގެ މީޑިޔާ އޮފީހުން ރިޕޯޓް ކޮށްފައިވާ ގޮތުގައި މި އަދަދު 61،700 އަށްވުރެ ގިނަވާނެއެވެ.
Advertisement
This content is created and paid for by advertisers and does not involve Voice Journalists
