މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) އިން އަންނަ އަހަރު އޭޖީއެމް ބާއްވާނީ އެކުންފުނިން މިހާރު ހުޅުމާލޭގައި ހަދަމުން އަންނަ އަމިއްލަ އިމާރާތުގައިކަމަށް މެނޭޖިންގ ޑިރެކްޓަރު އަހުމަދު ނިޔާޒް ވިދާޅުވެއްޖެއެވެ.

އެމްޓީޑީސީގެ ިމިދިޔަ އަހަރުގެ އަހަރީ އާއްމު ޖަލްސާގައި ވާހަކަދައްކަވަމުން ނިޔާޒް ވިދާޅުވީ އެކުންފުނިން ހުޅުމާލޭ ސެންޓްރަލް ޕާކް ކައިރީ ތަރައްޤީކުރަމުން އަންނަ ހެޑް އޮފީހުެގ މަސައްކަތް މިއަހަރުގެ ތެރޭގައި ނިންމާލެވޭނޭކަމަށެވެ. އޭނާ ވިދާޅުވީ މިހާރުވެސް އެމްޓީޑީސީ ޓަވަރުގެ ސްޓްރަކްޗަރ މަސައްކަތުގެ 60 އިންސައްތަ ނިމިފައިވާކަމަށެވެ. އެކަމުގެ ހުރިހާ މަސައްކަތެއް ފަހުކޮޅު ނިންމާލެވޭނޭކަމަށް ނިޔާޒް ވިދާޅުވިއެވެ.

އެމްޓީޑީސީ ޓަވަރުގައި 10 ފަންގިފިލާ ހިމެނޭއިރު، އެ ޓަވަރު ތަރައްޤީކުރަނީ ވިޔަފާރީގެ އުސޫލުން ފަންގިފިލާތައް ކުއްޔަށްދޭ ގޮތަށެވެ. ނިޔާޒް ވިދާޅުވީ މިހާުވެސް ޓަވަރުގެ އެކި އެކި ފަންގިފިލާތައް ކުއްޔަށް ދޫކުރުމުގެ ކަންކަން ގާތްގަނޑަކަށް ނިމިފައިވާ ކަމަށެވެ. 

އެމްޓީޑީސީ އިމާރާތް ހުންނާނޭ ގޮތުގެ ކުރެހުމެއް

އެމްޓީޑީސީއަކީ ޓޫރިޒަމްގެ މަންފާ ދިވެހި ރައްޔިތުންނަށް ސީދާ ގޮތެއްގައި ހޯދައިދިނުމަށްޓަކައި ރައީސް މައުމޫނުގެ ވެރިކަމުގައި އުފެއްދި ކުންފުންޏެކެވެ. އެމްޓީޑީސީއަށް 19 އަހަރު ވެގެންދިޔައިރު، އެކުންފުނިން ވަނީ އައްޑޫސިޓީގައި ހެރެތެރެ ނަމުގައި ރިސޯޓެއްވެސް ހިންގުމަށް މަސައްކަތްކޮށްފައެވެ. ނަމަވެސް އެ މަޝްރޫޢު ފްލޮޕްވެގެން ދިޔައިރު، ދެން އެކުންފުނިން މަސައްކަތްކުރީ އުލިގަމުގައި ސިޓީ ހޮޓަލެއް ތަރައްޤީކުރާށެވެ. ނަމަވެސް އެ މަޝްރޫޢުގެ ދަށުން އިމާރާތުގެ ސްޓްރަކްޗަރގެ މަސައްކަތް ވަކި ހިސާބަކުން ހުއްޓި، އެ ޕްރޮެކްޓްވެސް ވަނީ ފްލޮޕްވެފައެވެ.

ސަރުކާރުން އެމްޓީޑީސީއަށް ރިސޯޓް ތަރައްޤީކުރުމަށް ގިނަ ރަށްތަކެއް ދިންނަމަވެސް އޭގެ ތެރެއިން ރިސޯޓް ތަރައްޤީކޮށް ހިންގަމުން އަންނަނީ ދެ ރަށެއްގައެވެ. ނަމަވެސް އެއީ އަޔާޑާ މޯލްޑިވްސް އާއި އަނަންތަރާ ހިހަވަށް ވިލާސް އެވެ. ނަމަވެސް އެ ދެ ރިސޯޓްވެސް ހިންގަމުން އަންނަނީ އެހެން ކުންފުނިތަކުންނެވެ. އެހެންކަމުން އެ ދެ ރިސޯޓުންވެސް އެމްޓީޑީސީއަށް ލިބެންވާ ވިޔަފާރީގެ ނަފާ ނުލިބޭކަމަށް ހިއްސާދާރުން ފާހަގަކުރެއެވެ.

އެމްޓީޑީސީގެ މިހާރުގެ މެނޭޖްމަންޓުން ބުނާގޮތުގައި އެކުންފުނި ހިންގުމަށް 2012 ވަނަ އަހަރުން ފެށިގެން 2018 ވަނަ އަހަރާ ހަމަޔަށް މާލީގޮތުން ގޮންޖެހުންތައް ދިމާވިނަމަވެސް މިހާރު އެކުންފުނި އޮތީ ވަރަށް ރަނގަޅު ހާލަތެއްގައެވެ. އެގޮތުން ހދ.ނާގޯށި މަސައްކަތް ފެށި އެރަށް ހުޅުވިގެން ދިއުމާއެއެކު އެމްޓީޑީސީއަށް ބޮޑެތި ކުރިއެރުންތަކެއް ލިބިގެންދާނޭކަމަށް އެމްޓީޑީސީގެ މިހާރުގެ މެނޭޖްމަންޓުން ބުނެއެވެ.