އިންޑިއާގެ އެންމެ ބޮޑު އެއަރލައިން އިންޑިގޯއިން އެ އެއަރލައިންގެ ނެޓްވޯކް ފުޅާކުރުމަށް ބޭރުގެ ބޮޑެތި ބައެއް އެއަރލައިންތަކާއެކު އެއްބަސްވުމަކަށް އަތުވެއްޖެއެވެ.

އިންޑިގޯގެ ދިގުރާސްތާ ފްލައިޓްތައް އުތުރު އެމެރިކާއާއި ޔޫރަޕަށް އިތުރުކުރުމަށް އެ އެއަރލައިނުން އެއްބަސްވުންތަކަށް އައިސްފައިވަނީ އެއަރފްރާންސް – ކޭ.އެލް.އެމް ގްރޫޕާއި، ވަރޖިން އެޓްލާންޓިކް އަދި ޑެލްޓާ އެއަރލައިންއާއެކުއެވެ. އިންޑިގޯއަކީ މިހާރުވެސް ދުނިޔޭގެ ތިންވަނައަށް އެންމެ ބޮޑު ވައިގެ ދަތުރުފަތުރުގެ މާކެޓްކަމަށްވާ އިންޑިއާގައި އެންމެ ފުޅާ ޑޮމެސްޓިކް ނެޓްވޯކް އޮތް އެއަރލައިނެވެ. އަދި އެކުންފުނިން ދަނީ ބައިނަލްއަޤްވާމީ މާކެޓްގެ ނެޓްވޯކް އިތުރަށް ފުޅާކުރުމަށް މަސައްކަތްކުރަމުންނެވެ.

އެއަރލައިންތަކާއެކު ހެދުނު އެއްބަސްވުމާއެކު ކޯޑް ޝެއަރ އުސޫލުން އިންޑިގޯގެ ނަމުގައި މި އެއަރލައިންތަކުން އިންޑިގޯއަށް ސީޓް ވިއްކޭނެއެވެ. އަދި އެމްސްޓަޑަމް އަދި މެންޗެސްޓަރފަދަ މަންޒިލްތަކުން ޔޫރަޕާއި އުތުރު އެމެރިކާގެ އެހެން މަންޒިލްތައް އެއެއަރލައިންތައް މެދުވެރިކޮށް އިންޑިގޯގެ ދަތުރުވެރިންނަށް ހުޅުވާލެވޭނެއެވެ.

އިންޑިގޯގެ ޑޮމެސްޓިކް ފްލައިޓްތަކުގައި މިހާރުވެސް ވަރޖިން އެޓްލާއިންޓިކް އަދި އެއަރފްރާންސް – ކޭ.އެލް.އެމް އާއެކު ކޯޑް ޝެއަރ ކުރެއެވެ.

އިންޑިގޯގެ ފްލައިޓެއް... ފޮޓޯ: ވޮއިސް

އިންޑިގޯގައި މިހާރުވެސް 400 މަތިންދާބޯޓު އޮތް އިރު، އެކުންފުނީގެ އަމާޒަކީ ފްލައިޓްތަކާއި ރޫޓްތައް އިތުރުކޮށް، 2030 ގެ ނިޔަލަށް ފްލީޓް ސައިޒް 600 އަށް އިތުރުކުރުމަށެވެ. އިންޑިގޯގެ ބައިނަލްއަޤްވާމީ ނެޓްވޯކް ފުޅާކުރަމުންދާ މިންވަރާއި ގާތަށްވެސް މަތިންދާބޯޓު އުފައްދާ ކުންފުނިތަކަށް މަތިންދާބޯޓު ޑެލިވަރކޮށް ނުދެވޭތީ، އެ އެއަރލައިނުން މިހާރުވެސް ގެންދަނީ ކުއްޔަށް މަތިންދާބޯޓު ނަގައިގެން ދުއްވަމުންނެވެ. އެގޮތުން އަންނަ އަހަރު ކުރީކޮޅު ނޯޒް އެޓްލާންޓިކް އެއަރލައިނުގެ ބޮއިން 787 މަރުކާގެ 6 މަތިންދާބޯޓު ކުއްޔަށް ނަގާނެއެވެ.

އަނެއްކޮޅުން، އިންޑިއާއާއި ތުރުކީވިލާތާއި ދެމެދު އުފެދިފައިވާ ނުތަނަވަސްކަމުގައި، ޓަރކިޝް އެއަރލައިނުން އިންޑިގޯއަށް ކުއްޔަށް ދޫކޮށްފައިވާ މަތިންދާބޯޓުތަކުގެ އެއްބަސްވުން އަންނަ އޮގަސްޓް މަހަށްފަހު އިތުރުކޮށް ނުދޭނެކަމަށް އިންޑިއާގެ ސިވިލް އޭވިއޭޝަނާއި ބެހޭ އިދާރާއިން ވަނީ އަންގާފައެވެ. އިންޑިއާއާއި ތުރުކީވިލާތާ ދެމެދު މަސްރަހު ގޯސްވީ، ދާދިފަހުން ހަނގުރާމަވެރިންގެ ބަޔަކު ކަޝްމީރުގެ އިންޑިއާ ފަޅީގައި ހަމަލާދީ ބަޔަކު މަރާލި ހާދިސާގެ ބަދަލުހިފުމުގެ ގޮތުން އިންޑިއާއިން ޕާކިސްތާނަށް ހަމަލާދިނުމުން، ތުރުކީވިލާތުން ޕާކިސްތާނުކޮޅަށް އެރުމާއި ގުޅިގެންނެވެ.

އިންޑިގޯގެ ނެޓްވޯކް އެކުންފުނިން ފުޅާކުރަމުން އަންނައިރު، އިންޑިއާގެ ފްލެގް ކެރިއަރ، އެއަރ އިންޑިއާއިން ސިންގަލް އައިލް 200 މަތިންދާބޯޓު ގަތުމަށް ބޮއިން އަދި އެއަރބަސްއާއެކު މަޝްވަރާކުރަމުން އަންނަކަން ވަނީ ހާމަކޮށްފައެވެ.