މި އަހަރުގެ ޙައްޖުގެ އަޅުކަމަށް ސަޢުދީ ޢަރަބިއްޔާއަށް މިލިއަނަކަށްވުރެ ގިނަ ޙައްޖުވެރިން ދަތުރުކުރުމަށް ހަމަޖެހިފައިވާއިރު، ޙާޖީންނަށް ޙައްޖުގެ ކަންކަން ފަސޭހަކޮށް ދިނުމަށްޓަކައި އޭއައި އަދި ސްމާޓް ޓެކްނޮލޮޖީގެ ހިދުމަތް ދިނުމަށް ސަޢުދީ ޢަރަބިއްޔާއިން ނިންމައިފިއެވެ.

ފާހަަގަކޮށްލަން ޖެހޭ ކަމަކީ މިއީ ޙައްޖުގެ އަޅުކަމުގެ ކަންތަށް އިތުރަށް ފަސޭހަ ކުރުމަށްޓަކައި މި ފަދަ އާލާތްތައް ބޭނުން ކުރާ ފުރަތަމަ ފަހަރެވެ. މީގެ ތެރޭގައި އޭއައި ރޮބޮޓެއް ވެސް ހިމެނެއެވެ. މި ރޮބޮޓަކީ ޙައްޖުވެރިންނަށް ބޭނުންވާ މަޢުލޫމާތު ފޯރުޮކޮށް ދިނުމުގެ ގާބިލިއްޔަތުކަން ލިބިފައިވާ ރޮބޮޓެކެވެ. މި ރޮބޮޓުގައި ތަޗް ސްކްރީނެއް ހަރުކޮށްފައި ވާއިރު، 5ޖީ ނެޓުވޯކު އެ ރޮބޮޓަށް ލިބެއެވެ. އަދިހަމައެހެންމެ، އެރޮބޮޓުގައި ކެމެރާ ވެސް ހަރުކޮށްފައި ހުރެއެވެ.

މީގެއިތުރުން ތަފާތު އެކި ސެންސަރުތަކާއި ގޭޓް ރީޑަރުތަކާއި އަދި ސާވައިލެންސް ނިޒާމު ބޭނުން ކޮށްގެން ޙާޖީންގެ ހަރަކާތްތަށް ކަމާގުޅޭ އިދާރާތަކުން ވަގުތުން ބަލަމުން ފާހަގަ ކޮށްލެވެއެވެ. މި ފަދަ ޓެކްނޮލޮޖީގެ އާލާތްތަށް ބޭނުން ކޮށްގެން މީހުން ގިނަ ސަރަޙައްދުތައް ފާހަގަ ކުރުމަށް ފަސޭހަވެގެންދިޔުމުގެ ފުރުސަތު ބޮޑުވާނެއެވެ.

މި ހުރިހާ މަޢުލޫމާތެއް ލިބެމުންދާ ވަރަކުން އޭއައި ސޮފްޓްވެއަރތަށް ބޭނުން ކޮށްގެން މުހިންމު ކަންކަން ކަމާބެހޭ އިދާރާތަކުން ދެނެގަންނަމުން ދާނެއެވެ. މި މަޢުލޫމާތުތަކުގެ ބޭނުން ކޮށްގެން، ފިތިބާރުވުން ފަދަ ހިތާމަވެރި ހާދިސާތަކުން ރައްކާތެރިވުމަށްޓަކައި ވަގުތުން ފިޔަވަޅު އަޅަން ފަސޭހަވެގެން ދާނެއެވެ.

އަދިހަމައެހެންމެ، ޙައްޖުވެރިންނަށް މަޢުލޫމާތާއި އެހީތެރިކަން ފޯރުކޮށްދިނުމުގެ ގޮތުން މައި ތަންތަނުގައި އެކި ޤަައުމުތަކުގެ ބަސްބަހުން ލިޔެފައިވާ ސްމާޓް ސްކްރީންތައް ވެސް ކަމާބެހޭ ފަރާތްތަކުން ޤާއިމުކުރުމަށް ވަނީ ނިންމާފައެވެ. އަދި ކީރިތި ޤުރުއާން އުނގެނުމަށް އެހީތެރިވެދޭ ޑިޖިޓަލް ޕްލެޓްފޯމެއް ވެސް ޤާއިމު ކޮށްފައި ހުންނާނެއެވެ.

އެހެންކަމުން މިއަހަރުގެ ޙައްޖު ވެގެންދާނީ ޙާޖީންނަށް އެންމެ ލުއިފަސޭހަ އަދި އެންމެފަހުގެ ޓެކޮނޮލޮޖީ ހިދުމަތްތަށް ލިބޭނޭ ޙައްޖަކަށް ވެގެންދާނެއެވެ.