އިޒްރޭލުން ޣައްޒާގެ ހޮސްޕިޓަލެއް ކަމުގައިވާ އަލް-އަހްލި ހޮސްޕިޓަލް ނުވަތަ ބެޕްޓިސްޓް ހޮސްޕިޓަލަށް އަމާޒުކޮށްދިން ބޮމުގެ ހަމަލާއެއްގައި 4 ނޫސްވެރިއަކު ޝަހީދުކޮށްލައިފިއެވެ.

އިޒްރޭލުން ފަލަސްޠީނުގެ ޣައްޒާއަށް ދެމުންދާ ސިލްސިލާ ހަނގުރާމައިގެ ތެރެއިން މިއަދު އެކަނިވެސް ވަނީ، ފަލަސްޠީނުގެ 23 ރައްޔިތަކު ޝަހީދު ކޮށްލައިފައެވެ. މީގެ ތެރެއިން އަލް-އަހްލި ހޮސްޕިޓަލަށް ދިން ބޮމުގެ ހަމަލާގައި 4 ނޫސްވެރިއަކު ވަނީ ޝަހީދުކޮށްލާފައެވެ. އިޒްރާއީލްގެ ހަމަލާގައި ޝަހީދުވި ނޫސްވެރިންގެ ތެރޭގައި ފަލަސްތީނުގެ ނޫސްވެރިޔާ، އިސްމާއީލް ބަދާހް ހިމެނޭކަމަށް މީޑިއާގެ ރިޕޯޓްތައް ބުނެއެވެ.

އިންސާނީ ހައްޤުތަކަށް މަސައްކަތްކުރާ ޖަމުއިއްޔާ ޖަމާއަތްތަކުން ދަނީ އިޒްރޭލްގެ އަނިޔާވެރިކަން ހުއްޓާލުމަށް ގޮވާލަމުންނެވެ. އެހެންނަމަވެސް ހައްދުފަހަނައެޅި ޔަހޫދީ އިޒްރޭލުގެ ސިފައިންދަނީ ދުވަހަކަށްވުރެ ދުވަހެއް ފަލަސްޠީނުގެ ރައްޔިތުންނާއި ދެކޮޅަށް ދެމުންދާ ހަމަލާތަށް އިތުރުކުރަމުންނެވެ.

އިޒްރޭލުގެ ސިފައިންދަނީ ޣައްޒާގެ އިންސާނީ އެހީ ފޯރުކޮށްދޭ ތަންތަނަށް އަމާޒުކޮށްގެން އެތަކެއް ހަމަލާތަކެއް ދެމުންނެވެ. އެގޮތުން އިއްޔެ އެކަނިވެސް 95 ފަލަސްޠީނުގެ ރައްޔިތުން އިޒްރޭލުގެ ސިފައިންވަނީ ޝަހީދުކޮށްލާފައެވެ.

2023 ވަނަ އަހަރުގެ އޮކްޓޫބަރު 7 ކުން ފެށިގެން ދެފަރާތުންވެސް ހަމަލާތަށް ބަދަލުކުރަމުންދާއިރު، މިހަމަލާތަކުގައި ފަލަސްޠީނުގެ 55،000 އަށްވުރެ ގިނަ މީހުން ވަނީ ޝަހީދުވެފައެވެ. އަދި 12،6000 އެއްހާ މީހުން ވަނީ ޒަހަމްވެފައެވެ.