އަނބިންނަށް އެހީތެރިވުމުގައި ފިރިމީހާގެ ވަގުތުތައް ތަރުތީބުކުރަންވާނޭކަމަށް މިއަދުގެ އަރަފާތު ހުތުބާ (ހައްޖު ހުތުބާ) ގައި ވިދާޅުވެއްޖެއެވެ.

މަސްޖިދުއްނަމިރާގައި މިއަދު ދެއްވި ޙައްޖު ޚުތުބާ ގައި ޝައިޚު ޑޮކްޓަރު ސާލިހު ބިން އަބްދުﷲ ބިން ހަމީދު ވަނީ އިސްލާމްދީނުގައި އަންހެނުންގެ ހައްޤުތައް އަދާކުރުމުގެ މުހިއްމުކަމުގެ މައްޗަށް އަލިއަޅުއްވާލައްވައި އަގުހުރި ނަސޭހަތްތަކެއް ދެއްވާފައެވެ. ޝެއިހްގެ ހުތުބާ ދެއްވަމުން ވިދާޅުވިއެވެ. އަންހެނުންގެ ހައްޤުތަކާ ގުޅޭގޮތުން ކީރިތި ރަސޫލާ ހަދީސްކުރެއްވި ބަސްފުޅެއްގައި ވެއެވެ. "ތިޔަބައިމީހުންގެ އަންހެނުންތަކާމެދު ތިޔަބައިމީހުން ﷲ އަށް ބިރުވެތިވާށެވެ"

ފިރިހެނުންގެ މައްޗަށް އެމީހުންގެ ބެލުމުގެ ދަށުގައިވާ އަންހެނުން ޒިންމާދާރުކަމާއެކީ ބެލުމަކީ ﷲ ލާޒިމްކުރައްވާފައިވާ ކަމެއްކަން ފާހަގަކުރަމުން ހުތުބާގައި ވިދާޅުވެފައިވަނީ، އެއީ ފިރިހެނުންގެ މައްޗަށް އޮތް ޒިންމާއެއްކަމަށާއި އެ ޒިންމާ އަދާނުކުރާ ކަމުގައި ވަނީނަމަ، ﷲ ތައާލާގެ ދަރުބާރުގައި ޖަވާބުދާރީވާން ޖެހޭނޭކަމަށެވެ. ސީދާ އަނބިމީހާގެ ވާހަކައާ ގުޅޭގޮތުން މާތް ނަބިއްޔާގެ ހަދީސް ބަސްފުޅެއްގެ މާނައިގައި ވަނީ ތިޔަބައިމީހުން އެކަނބަލުން ހޯދައިގެންފައިވަނީ ﷲގެ ތައާލާ ދެއްވި އަމާނާތްތެރިކަމާ އެކުގައެވެ.

މި ހަދީސްއާ ގުޅޭގޮތުން ހުތުބާގައި އިތުރަށް ވިދާޅުވެފައިވަނީ، އެބަހީ ތިޔަބައިމީހުން މީހަކާ ކައިވެނިކުރުމަށް ފަހުގައި އޭނާޔަށް ގެއްލުމެއް ދީގެން ނުވާނެކަމަށާއި، އަދި އޭނާ އެކަނިވެރިކޮށްގެން ނުވާނޭ ކަމަށެވެ. ފިރިމީހާގެ ހައްގުތައް ވާފަދައިން އަނބިމީހާގެ ހައްގުތަކެއް ވެއެވެ. އަނބިންގެ ހައްގުތައް އަދާކޮށްދޭން ވާނެއެވެ އެމީހުންނަށް ވަގުތު ދޭންވާނެއެވެ، ދަރިން ތަރުބިއްޔަތުކުރުމަށްޓަކައި އަނބިންކުރާ ބުރަ މަސައްކަތުގައި ފިރިމީހާ ބައިވެރިވާން ވާނެއެވެ. އެގޮތުން އަނބިންނަށް އެހީތެރިވުމުގައި ފިރިމީހާގެ ވަގުތުތައްް ތަރުތީބުކުރަން ވާނޭކަމަށްވެސް ހުތުބާގައި ވިދާޅުވިއެވެ.

މިއީ އަޅުގަނޑުމެންނަށް ނުކުރެވޭނޭކަމެއް ނޫންކަން ފާހަގަ ކުރައްވަމުން ހުތުބާގައި ވިދާޅުވީ، މާތް ނަބިއްޔާ ވަނީ, އަޅުގަނޑުމެންނަށް މިކަމަށް ވަސިއްޔަތް ކުރައްވާފައި ކަމަށެވެ.

މިއަދުގެ ހައްޖު ހުތުބާގައި ވަނީ ތަގުވާވެރިވުމާ ގުޅޭގޮތުންވެސް އަގުހުރި ދަރުސްތަކެއް ދެއްވާފައެވެ. އެގޮތުން ﷲގެ ހަޒްރަތުގައި އެންމެ ހެޔޮކަންބޮޑުވެގެންވާ މީހާއަކީ އެންމެ ތަގުވާވެރި މީހާކަމަށާއި، މިކަމުގައި މީހެއްގެ ހައިސިއްޔަތަކަށް ބެލުމެއް ނެތްކަަށްވެސް ހުތުބާގައި ވަނީ ވިދާޅުވެފައެވެ.

ހައްޖުވެރިން އަރަފާތު ބިމުގައި ތިބުމަށްފަހު އިރުއޮއްސެން ފެށުމާއެކު ދެން ދާނީ މުޒްދަލިފާ އަށެވެ.