ޤައުމީ އެއާލައިން މޯލްޑިވިއަންގެ ފްލީޓަށް ގެނައުމަށް ނިންމި އޭޓިއާރު ބޯޓު ރާއްޖެ އައުމުގެ ދަތުރު ފަށައިފިއެވެ.

އޭޓީއާރް 600-42 މަރުކާގެ މި ބޯޓު ރާއްޖެ އައުމަށްޓަކައި ދަތުރު ފަށާފައިވަނީ ފަރަންސޭސިވިލާތުގެ ޓުލޫސުން އިއްޔެގެ ވަގުތެއްގައެވެ. މޯލްޑިވިއަނުން ބުނީ ރާއްޖެ އައުމުގެ ކުރިން ތިން މަންޒިލަކަށް މި ބޯޓު ޖައްސާނޭކަމަށެވެ. އެއީ ތެއޮ އެޅުމަށާއި އެނޫންވެސް ބަލަންޖެހޭ ކަންކަން ބެލުމަށެވެ. ނަމަވެސް ބޯޓު ވެލާނާ އިންޓަރނޭޝަނަލް އެއާޕޯޓަށް ޖައްސާނޭ ދުވަހެއް މޯލްޑިވިއަނުން ބުނެފައެއް ނުވެއެވެ.

މޯލްޑިވިއަނުން ގެންނަ އޭޓީއާރް 600-42 މަރުކާގެ މި ބޯޓަކީ ޑޮމަސްޓިކް ދަތުރުތައް ފުޅާކުރުމުގެ ގޮތުން ގެންނަ ބޯޓެކެވެ. މޯލްޑިވިއަން ހިންގާ އައިލެންޑް އޭވިއޭވިއޭޝަނުން ވަނީ އެ އެއާލައިނުން ބޭނުންކުރަމުން އަންނަ ޑޭޝް މަރުކާގެ ބޯޓުތައް އޭޓީއާރަށް ބަދަލުކުރުމުގެ މަސައްކަތް މިދިޔަ އަހަރުތަކުގައި ފަށާފައެވެ. އެގޮތުން އޭޓީއާރު ތިން ބޯޓު ހޯދުމަށް މިދިޔަ އަހަރު އިއުލާނުކޮށްފައިވާއިރު، އެއަހަރުގެ ތެރޭގައިވެސް ވަނީ އޭޓިއާރު މަރުކާގެ ބޯޓެއް ގެނެސްފައެވެ. އެއާއެކު މޯލްޑިވިއަންގެ އޮޕަރޭޗަންތަކުގައި މިހާރުވެސް އޭޓީއާރު މަރުކާގެ 4 ބޯޓު ބޭނުންކުރެއެވެ. 

މޯލްޑިވިއަންގެ ފްލީޓްގައި 25 ހަށްވުރެ ގިނަ ބޯޓު ބޭނުންކުރަމުން އަންނައިރު މީގެ ތެރޭގައި އެއާބަސް މަރުކާގެ ދެ ބޯޓާއި، ޑޭޝް އަދި ޓްވިން އޮޓަރ މަރުކާގެ ބޯޓުތައް ހިމެނެއެވެ.