އަނިޔާވެރި އިޒްރޭލުގެ ސިފައިން އަނެއްކާވެސް ޣައްޒާގައި ހުރި އިންސާނީ އެހީ ފޯރުކޮށްދޭ ތަނަކަށް އަމާޒުކޮށް ހަމަލާތަކެއްދީފިއެވެ. 

މިހަމަލާ ދީފައިވަނީ މިއަދުގެ ހެނދުނުގެ ވަގުތެއްގައި ޣައްޒާގެ ދެކުނުގައި ހުރި އިންސާނީ އެހީ ފޯރުކޮށްދޭ ތަނަކަށް އަމާޒުކޮށެވެ. މިހަމަލާގައި ފަލަސްޠީނުގެ 6 މީހުން ވަނީ ޝަހީދުވެފައެވެ. އިޒްރޭލުންދަނީ ޣައްޒާގައި ހުންނަ މިފަދަ އިންސާނީ އެހީ ފޯރުކޮށްދޭތަންތަނަށް އަމާޒުކޮށް ހުއްޓުމެއްނެތި ކޮންމެ ދުވަހަކުވެސް ހަމަލާދީ އެތަކެއް ލާއިންސާނީ ޢުދުވާންތަކެއް ފަލަސްޠީނު ރައްޔިތުންނާ ދެކޮޅަށް ހިންގަމުންނެވެ.

އިޒްރޭލުން މިފަދަ ހަމަލާތަށް ހުއްޓުމެއްނެތި އިންސާނީ އެހީ ފޯރުކޮށްދޭ ތަންތަނަށް އަމާޒުކޮށްގެން ދިނުމުގެ ސަބަބުން، ޣައްޒާގެ ހިއުމަނިޓޭރިއަން ފައުންޑޭޝަނުން ވަނީ ޣައްޒާގައި ހުރި އިންސާނީ އެހީ ފޯރުކޮށްދޭ ތަންތަން ބަންދުކުރުމަށް ނިންމާފައެވެ.

ޣައްޒާގައި މިހާރު އިންސާނީ ކާރިސާއެއްގެ ހާލަތު ކުރިމަތިވެފައިވާ ކަމަށް ބައިނަލްއަގުވާމީ ޖަމުޢިއްޔާ ޖަމާއަތްތަކުންނާއި އިންސާނީ ޙައްޤުތަކަށް ވަކާލާތުކުރާ ފަރާތްތަކުން ދަނީ ބުނަމުންނެވެ. ފާހަގަކޮށްލަންޖެހޭ ގޮތުގައި މިހަމަލާތަކުގައި ޝަހީދުވެފައިވާ ގިނަ މީހުންނަކީ އަންހެނުންނާއި ކުޑަކުދިންނެވެ. 

ޣައްޒާގެ ހެލްތް މިނިސްޓުރީން ބުނެފައިވާ ގޮތުގައި 2023 ވަނަ އަހަރުގެ އޮކްޓޫބަރު 7 ވަނަ ދުވަހުންފެށިގެން އިޒްރޭލުން ޣައްޒާއަށް ދެމުންދާ ހަމަލާތަކުގައި ޖުމުލަ 54،677 މީހުން ވަނީ ޝަޙީދުވެފައެވެ. އަދި 125،530 މީހުން ވަނީ މިހަމަލާތަކުގައި ޒަހަމްވެފައެވެ. ކަމާބެހޭ ފަރާތްތަކުން ބުނާގޮތުގައި މިއަދަދު މިއަށްވުރެ އިތުރުވުމަކީ އެކަށީގެންވާ ކަމެކެވެ. ސަބަބަކީ ސުންނާފަތިވެފައިވާ އިމާރަތްތަކުގެ ދަށުގައި ވެސް އެތަކެއް ބަޔަކު ތާށިވެފައިވުމާއެކު އެމީހުން މިހާރު ދުނިޔޭގައި ހުރުމުގެ ފުރުސަތު މިހާރު ނެތުމުންނެވެ.