އިޒްރާއީލުން ޢައްޒާގެ ހޮސްޕިޓަލްތަކުގެ އިންޖީނުގެތަކަށް ތެއޮ ފޯރުކޮށްދިނުމަށް ކުރަމުންގެންދާ މަސައްކަތަށް ހުރަސްއަޅަމުންގެންދާކަމަށް ޢައްޒާގެ އަލް ޝިފާ ހޮސްޕިޓަލުން ބުނެފިއެވެ.

އަލްޖަޒީރާއަށް ދެއްވި ބަސްދީގަތުމެއްގައި މިއަދު އަލް ޝިފާ ހޮސްޕިޓަލުގެ ޑިރެކްޓަރަކު ވިދާޅުވީ، އެ ހޮސްޕިޓަލުގެ ޑައިލަސިސް ޔުނިޓްގެ ހިދުމަތްތައް ކުރިއަށްއޮތް މަދު ގަޑިއިރެއްގެ ތެރޭގައި ހުއްޓުމަކަށް އަންނާނޭކަމަށެވެ. އޭނާ ވިދާޅުވީ އިސްރާއީލް ސިފައިން އެ ހޮސްޕިޓަލުގެ އިންޖީނުގެއަށް ތެއޮ ފޯރުކޮށްދިނުމަށް ހުރަސްއަޅާފައިވާކަމަށެވެ. 

މިހާރުވެސް އެ ހޮސްޕިޓަލުގައި 300 ކިޑްނީ ބަލިމީހުން ޑައިލަސިސް ހަދަމުން އަންނަ ކަމަށާއި، ތެއޮ ނުލިބިއްޖެނަމަ ޖަނަރޭޓަރުތައް ނިވި، ހޮސްޕިޓަލުން ކަރަންޓް ކެނޑެން ދެން މާގިނަ ގަޑިއިރުތަކެއް ނުނަގާނޭކަމަށެވެ. މި މައްސަލަ ހައްލުކުރުމަށް ދުނިޔޭގެ ސިއްހަތު ޖަމިއްޔާއާ ގުޅިގެން މަސައްކަތްކުރަމުން އަންނަކަމަށާއި، މިހާތަނަށް ކުރެވުނު މަސައްކަތުން އެއްވެސްކަހަލަ ނަތީޖާއެއް ލިބިފައިނުވާކަމަށްވެސް ހޮސްޕިޓަލުގެ އޮފިޝަލް ފާހަގަކުރެއްވިއެވެ.

އިޒްރާއީލް ސިފައިން ފަލަސްތީނު ނަސްލު ނައްތާލުމަށް ހިންގަމުންގެންދާ ޖަރީމާތަކުގައި މިހާރު އެންމެބޮޑަށް ހަމަލާތައް އަމާޒުކުރަމުންގެންދަނީ، އެހީދޭ ފަރާތްތަކަށާއި، ހޮސްޕިޓަލްތަކުގެ އިތުރުން ރެފިއުޖީ ކޭމްޕްތަކަށެވެ. 

އިޒްރޭލުން ޣައްޒާއަށް ދެމުންދާ ހަމަލާތަށް ހުއްޓާލުމަށް ބައިނަލްއަގުވާމީ ޖަމުޢިއްޔާ ޖަމާއަތްތަކުންނާއި އިންސާނީ ހައްޤުތަކަށް ވަކާލާތުކުރާ ފަރާތްތަކުން ދަނީ ގޮވާލަމުންނެވެ.

އިޒްރޭލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި ފަލަސްތީނުގެ 54،772 މީހުން ޝަހީދުވެފައިވާއިރު، 125،834 އަށްވުރެ ގިަނ މީހުން ވަނީ ޒަހަމްވެފައެވެ.