މިދިޔަ މަހުގެ 13 ވަނަ ދުވަހު ފަލަސްޠީނުގެ ޣައްޒާގެ ހޮސްޕިޓަލަކަށް ޔަހޫދީ އިޒުރޭލުން ދިން ހަމަލާއެއްގައި ޝަހީދުުވެފައިވާ ޣައްޒާގައި ވެރިކަންކުރާ ޙަމާސް ޖަމާޢާތުގެ އިސް ކޮމާންޑަރެއް ކަމަށްވާ މުޙައްމަދު ސިންވާރުގެ ހަށިގަނޑު ހޯދާފައިވާ ކަމަށް އިޒުރޭލުން ބުނެފިއެވެ.

ފާހަގަކޮށްލެވޭ ގޮތުގައި މިދިޔަ އަހަރުގެ އޮކްޓޯބަރު މަހުގެ ތެރޭގައި އިޒްރޭލުން ދިން ހަމަލާއެއްގައި ޔަޙްޔާ ސިންވާރު ޝަހީދުވުމުގެ ސަބަބުން އޭނާގެ މަސައްކަތްތަކާ ޙަވާލުވެވަޑައިގެންފައި ވަނީ ކޮއްކޯފުޅު މުޙައްމަދު ސިންވާރެވެ.

ޔަހޫދީންގެ އަސްކަރިއްޔާ (އައިޑީއެފް) އިން ބުނެފައިވާ ގޮތުގައި މުޙައްމަދު ސިންވާރުގެ ހަށިގަނޑު ފެނިފައި މިވަނީ ޣައްޒާގެ ދެކުނުގެ ސިޓީއެއް ކަމަށްވާ ޚާން ޔޫނިސްގައި ހުންނަ ޔޫރަޕިއަން ހަޮސްޕިޓަލުގެ އަޑީގައިވާ ބިންގަރާހެއްގެ ތެރެއިންނެވެ. މުޙައްމަދު ސިންވާރުގެ ހަށިގަނޑުގެ އިތުރުން އިތުރު އެހެންބައެއްގެ ހަށިތައް ވެސް އެތަނުން ފެނިފައިވާ ކަމަށް ޔަހޫދީންގެ އަސްކަރިއްޔާއިން ވަނީ ބުނެފައެވެ.

މުޙައްމަދު ސިންވާރު ޝަހީދުވެފައިވާ ކަމަށް ޙަމާސް އިން ޔަޤީން ކޮށްދީފައި އަދި ނުވިނަމަވެސް ޔަހޫދީ އިޒްރޭލުން ވަނީ ޙަމާސްއަށް ނިސްބަތްވާ އެޖަމާޢަތުގެ ގިނަ އަދަދެއްގެ އިސްވެރިން ޝަހީދު ކޮށްލާފައެވެ.

2023 ވަނަ އަަހަރުގެ އޮކްޓޯބަރު މަހުގެ 7ވަނަ ދުވަހުން ފެށިގެން، ޣައްޒާގެ ރައްޔިތުންގެ ނަސްލު ނައްތާލުމުގެ ގޮތުން ޔަހޫދީން ހިންގަމުންދާ ލާއިންސާނީ ހަމަލާތަކުގައި އިޒްރޭލުން ވަނީ ޙަމާސްއަށް ނިސްބަތްވާ އެޖަމާޢަތުގެ ގިނަ އަދަދެއްގެ އިސްވެރިން ޝަހީދު ކޮށްލާފައިކަން ފާހަގަކޮށްލަން ޖެހެއެވެ.

އެގޮތުން އެ ޖަމާޢަތުގެ ކުރީގެ އަސްކަރީ ކޮމާންޑަރު ކަމަށްވާ މުޙައްމަދު ޟައިފު އާއި ޙަމާސްގެ ސިޔާސީ ލީޑަރު ކަމަށްވާ އިސްމާޢީލް ޙަނިއްޔާ ވަނީ ޝަހީދުކޮށްލާފައެވެ. އިސްމާޢީލް ޙަނިއްޔާ ޝަހީދުކޮށްލާފައިވަނީ އީރާނުގައި ހުންނަވަނިކޮށް ދިން ޙަމަލާއެއްގައި މިދިޔަ އަހަރުގެ ޖުލައި މަހުގެ ތެރޭގައެވެ.