އިންޑިއާއާއި ތުރުކީވިލާތާއި ދެމެދު ގުޅުން ގޯސްވެފައިވާ މިދަނޑިވަޅުގައި ތުރުކީވިލާތާއި ވާދަވެރި ސައިޕްރަސްއަށް އިންޑިއާގެ ބޮޑުވަޒީރު ނަރެންދްރަ މޯދީ ވަޑައިގަންނަވާ ގޮތަށް ހަމަޖެހިއްޖެއެވެ.

މޯދީ ސައިޕްރަސްއަށް ވަޑައިގަންނަވާނީ ޖީ 7 ގެ ބައްދަލުވުމުގައި ބައިވެރިވެވަޑައިގަތުމަށް ކެނެޑާއަށް ވަޑައިގަންނަވާ މަގުމަތީގައެވެ. އަދި ކްރޮއޭޝިއާއަށް ވަޑައިގަންނަވާނީ ސަމިޓުން ނިމިވަޑައިގެން، އެނބުރި އިންޑިއާއަށް ވަޑައިގަންނަވާ މަގުމަތީގައެވެ. ކްރޮއޭޝިއާއަކީ މޯދީ އެންމެ ފަހުން ޔޫރަޕަށް ކުރެއްވި ދަތުރުފުޅުގައިވެސް ވަޑައިގަންނަވާ ގޮތަށް ހަމަޖެހިފައވާ ދަތުރުފުޅެކެވެ. އެހެންނަމަވެސް އެފަހަރު ނޯވޭ އާއި ނެދަލެންޑްސްއަށް ވަޑައިގަތުމަށްފަހު، ކްރޮއޭޝިއާއަށް ވަޑައިނުގެން މޯދީ އެނބުރި އިންޑިއާއަށް ވަޑައިގަތީ އިންޑިއާއާއި ޕާކިސްތާނާ ދެމެދު ހިނގި ކުރިމަތިލުންތަކާއި ގުޅިގެންނެވެ.

ސައިޕްރަސްއަކީ ތުރުކީވިލާތާއި ވާދަވެރި ގައުމެކެވެ. ސައިޕްރަސްގެ ގްރީކް ދަރިކޮޅާއި ތުރުކީ ދަރިކޮޅާއި ދެމެދު ހިނގަމުންދާ ނުތަނަސްކަމުގައި، ތުރުކީގެ މަދަދުވެރިކަމާއެކު ތުރުކީދަރިކޮޅުން ވަނީ ވަކި ދައުލެއްވެސް ގާއިމްކޮށްފައެވެ. އެހެންނަމަވެސް މިއީ ބައިނަލްއަގްވާމީ މުޖްތަމައުގެ ބޮޑު ބަޔަކުން ބަލައިގަންނަ ދައުލަތެއް ނޫނެވެ. ތުރުކީވިލާތާއި އިންޑިއާއާއި ދެމެދު މައްސަލަ ގޯސްވީ، ދާދިފަހުން އިންޑިއާއާއި ޕާކިސްތާނާއި ދެމެދު ހިނގި ކުރިމަތިލުންތަކުގައި ތުރުކީވިލާތުން ޕާކިސްތާނަށް ތާއީދުކުރުމާއި ގުޅިގެންނެވެ. އަދި މޯދީ ސައިޕްރަސްއަށް ކުރައްވާ މި ދަތުރުފުޅަކީ ތުރުކީވިލާތަށް ދެއްވާ ވަރުގަދަ މެސެޖަކަށް ވާނެކަމަށް އިންޑިއާގެ ނޫސްވެރިން ދެކެއެވެ.

މިއީ އިންޑިއާގެ ބޮޑުވަޒީރަކު ސައިޕްރަސްއަށް ކުރައްވާ 3 ވަނަ ދަތުރުފުޅެވެ. 1983 ވަނަ އަހަރު ބޮޑުވަޒީރު އިންދިރާ ގާންދީ، އަދި 2002 ވަނަ އަހަރު ބޮޑުވަޒީރު އަތަލް ބިހާރީ ވާޖްޕާއީ ސައިޕްރަސްއަށް ވަޑައިގަތެވެ.