ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދަށްވެލާފައި އޮތުމަށްފަހު އެ އަދަދު އިތުރުވާން ފަށައިފިއެވެ.

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިދިޔަ ޓޫރިޒަމް ސީޒަން ނިމުމަށްފަހު ހުސްވި މެއިމަހުގެ ތެރޭގައި ރާއްޖެއަށް ދުވާލެއްގެ މައްޗަށް ޒިޔާރަތްކުރި ފަތުރުވެރިންގެ އަދަދު ވަނީ ވަރަށްބޮޑަށް ދަށަށް ގޮސްފައެވެ. މެއިމަސް ފެށުނުއިރު ދުވާލެއްގެ މައްޗަށް ހަތް ހާހެއްހާ ފަތުރުވެރިން ޒިޔާރަތްކުރިނަމަވެސް މެއިމަސް ނިމުނުއިރު އެއަދަދު ވަނީ ހަތަރުހާހުން ދަށަށް ވެއްޓިފައެވެ. ނަމަވެސް މިހިގާ ޖޫންމަހުން ފެށިގެން ރާއްޖެ އަންނަ ޓޫރިސްޓުންގެ އަދަދު އިތުރުވެ، މިހާރު ދުވާލެއްގެ މައްޗަށް ރާއްޖެއަށް ޒިޔާަރަތްކުރާ ފަތުރުވެރިްނގެ އަދަދު ވަނީ 5 ހާހުގައި ހިފެހެއްޓިފައެވެ.

ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، އިއްޔެގެ ނިޔަލަށް ރާއްޖެއަށް ވަނީ 1,011,972 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 9.4 އިންސައްތައިގެ ކުރިއެރުމެކެވެ. މިދިޔަ އަހަރުގެ ޖޫންމަހުގެ 9 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ، 925,239 ގައެވެ. 

ނިމިގެންދިޔަ ޓޫރިޒަމް ހައި ސީޒަނުގައި ރާއްޖެއަށް ވަނީ ރެކޯޑް އަދަދަކަށް ފަތުރުވެރިން ޒިޔާރަތްކޮށްފައެވެ. އެގޮތުން ފެބުރުއަރީމަހު އެކަނިވެސް 217,392 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.

ކުރިއަށް މިއޮތް ހޫނު މޫސުމުގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކުރުމުގެ ގޮތުން މޯލްޑިވްސް މާކެޓިން ޕީއާރު ކޯޕަރޭޝަނުން އަންނަނީ ބައިނަލްއަޤްވާމީ މާކެޓްތަކަށް އަމާޒުކޮށްގެން ކެމްޕެއިންތަކެއް ހިންގަމުންނެވެ. ސަރުކާރުގެ އަމާޒު ހިފާފައިވަނީ  މިއަހަރު ނިމުމުގެ ކުރިން 2.3 މިލިޔަން ފަތުރުވެރިން ރާއްޖެ ގެނައުމަށެވެ.