ނިރުބަވެރި ޔަހޫދީ އިޒްރޭލުގެ ސިފައިން އަނެއްކާވެސް އިންސާނީ އެހީ ފޯރުކޮށްދޭ ތަނަކަށް އަމާޒުކޮށް ދިން ހަމަލާތަކެއްގައި ފަލަސްޠީނުގެ 70 މީހުން ޝަހީދުވެއްޖެއެވެ.

މީޑިޔާތަކުގައި ރިޕޯޓްކޮށްފައިވާ ގޮތުގައި އިޒްރޭލުގެ ސިފައިން ވަނީ އިންސާނީ އެހީ ހޯދުމަށް މީހުން އެންމެ ގިނައިން އެސަރަހައްދަށް ޖަމާވި ވަގުތު ވައިގެ މަގުން ހަމަލާ ދީފައެވެ. މިހަމަލާގައި 70 މީހުން ޝަހީދުވެ 200އަށްވުރެ ގިނަ މީހުން ވަނީ ޒަހަމްވެފައެވެ. ފާހަގަކޮށްލަންޖެހޭ ގޮތުގައި އިންސާނީ އެހީ ފޯރުކޮށްދޭ ތަންތަނަކީ "އިންސާނުން ކަތިލާ" ތަންތަނުގެ ގޮތުގައި ފަލަސްޠީނުގެ ރައްޔިތުން ދަނީ ސިފަކުރަމުންނެވެ. ސަބަބަކީ ކޮންމެ ދުވަހަކު އެސަރަހައްދުތަކަށް އެހީ ހޯދުމަށްދާ ފަރާތްތަކަށް އަމާޒުކޮށް އިޒްރޭލުން އެތަކެއް ލާއިންސާނީ ހަމަލާތަކެއް ދެމުންދާތީއެވެ.

މިދިޔަ މެއި މަހުގެ 27 ވަނަ ދުވަހުން ފެށިގެން މިހާތަނަށް 150 އަށް ވުރެ ގިނަ ފަލަސްޠީނުގެ ރައްޔިތުން ވަނީ އިންސާނީ އެހީ ފޯރުކޮށްދޭ ހިސާބުތަކަށް ދެވުނު ހަމަލާތަކުގައި ޝަހީދުކޮށްލެވިފައެވެ.

ޣައްޒާގެ ހެލްތް މިނިސްޓުރީން ބުނެފައިވާ ގޮތުގައި 2023 ވަނަ އަހަރުގެ އޮކްޓޫބަރު 7 ވަނަ ދުވަހުން ފެށިގެން އިޒްރޭލުން ޣައްޒާއަށް ދެމުންދާ ހަމަލާތަކުގައި ޖުމުލަ 54،677 މީހުން ވަނީ ޝަޙީދުވެފައެވެ. އަދި 125،530 މީހުން ވަނީ މިހަމަލާތަކުގައި ޒަހަމްވެފައެވެ. ކަމާބެހޭ ފަރާތްތަކުން ބުނާގޮތުގައި މިއަދަދު މިއަށްވުރެ އިތުރުވުމަކީ އެކަށީގެންވާ ކަމެކެވެ. ސަބަބަކީ ސުންނާފަތިވެފައިވާ އިމާރަތްތަކުގެ ދަށުގައި ވެސް އެތަކެއް ބަޔަކު ތާށިވެފައިވުމާއެކު އެމީހުން ދުނިޔޭގައި ހުރުމުގެ ފުރުސަތު މިހާރު ނެތުމުންނެވެ.