ޙައްޖާއި ޢުމްރާއިން އެނބުރި އައުމަށްފަހު ބަލިތަކުން ރައްކާތެރިވުމަށް އެޅިދާނެ ފިޔަވަޅުތައް ހެލްތު އެންޑް ޕްރޮޓެކްޝަން އެޖެންސީ (އެޗްޕީއޭ) އިން ކިޔައިދީފިއެވެ.
ޙައްޖުގެ މަތިވެރި އަޅުކަން އަދާކުރުމަށް ސައުދީ އަރަބިއްޔާއަށް ދިޔަ މީހުން، މާދަމާގެ ވަގުތެއްގައި އެނބުރި އަންނަން ފަށާއިރު، އެމީހުންނާއި އަދި ޢާއިލާގެ މީހުން ބަލިތަކުން ސަލާމަތް ވުމަށާ، ބަލި ޖެހިއްޖެ ނަމަ ދެން ކަންކަން ކުރަންވީ ގޮތުގެ އިރުޝާދު އެޗްޕީއޭއިން ވަނީ ދީފައެވެ.
އެގޮތުން، އަރިދަފުސް ރޯގާޖެހި ކެއްސާ ކިނބިހި އެޅޭނަމަ، މީހުން އެއްވެ އުޅޭ ތަންތަނަށް ނުދިޔުމަށް ވަނީ އެދިފައެވެ. ޚާއްސަކޮށް ކުޑަކުދިންނާއި އުމުރުން ދުވަސްވީ މީހުން، ބަލިމީހުންނަށް ޒިޔާރަތް ނުކުރުމަށް ވަނީ އެދިފައެވެ.
އަދި ހައްޖުވެރިން ހައްޖުން އަންނަތާ 14 ދުވަސް ތެރޭ ހުންއައިސް، ކެއްސާ، ނޭވާލާން އުނދަގޫވެ، މޭގައި ރިއްސުން ފަދަ އަލާމާތެއް ފެންނަނަމަ ލަސްނުކޮށް ޑޮކްޓަރަކަށް ދެއްކުމަށް އެ އޭޖެންސީން ވަނީ އިލްތިމާސް ކޮށްފައެވެ. ހަމައެހެންމެ، ޑޮކްޓަރަށް ދައްކާއިރު އެމީހަކީ ހައްޖުން ނުވަތަ އުމުރާއިން އެނބުރި އައި މީހެއްކަމުގެ މައުލޫމާތު ދިނުމަށްވެސް ވަނީ އެދިފައެވެ.
އަރިދަފުސް ރޯގާއާއި ވައިރަލް ހުމުން ރައއކާތެރިވުމަށް އެޅިދާނެ ބައެއް ފިޔަވަޅުތައް؛
ކެއްސައި ކިނބިހި އަަޅާއިރު އަނގަމައްޗާއި ނޭފަތް ނިވާ ކުރުން،
ޓިޝޫފަދަ ތަކެތި ބޭނުން ކުރުމަށްފަހު ރައްކާތެރި ގޮތުގައި ނައްތާލުން
ސައިބޯނި ލައިގެން ގިނައިން އަތް ދޮވުން
ދަތުރުމަތީގައި އާއި ހައްޖު/އުމްރާ އަދާ ކުރުމުގައި އުޅޭއިރު މާސްކް އަޅައިގެން އުޅުން
ހުން އައިސް ރޯފާ ޖެހިއްޖެ ނަމަ ގޭގައި ދެވިދާނެ ފަރުވާ
ގިނަގިނައިން ދިޔާތަކެތި ބޭނުންކުރުން
އަރާމު ކުރުން
ހުން ގަދަނަމަ ގައިގައި ފެން ހޭކުން
ފެރެސެޓްމޯލް ފިޔަވައި އެހެން ބޭހެއް ޑޮކްޓަރުގެ ލަފާނެތި ބޭނުން ނުކުރުން
Advertisement
This content is created and paid for by advertisers and does not involve Voice Journalists
