އަޔަލެންޑާއި ޔޫކްރޭނަށް ރާއްޖޭން ކަނޑައަޅުއްވާ ސަފީރުންނަށް ރައްޔިތުންގެ މަޖިލީހުން ރުހުން ދީފިއެވެ.
އަޔަލެންޑާއި ޔޫކްރޭނަށް ނޮން ރެސިޑެންޓް ސަފީރުން ކަނޑައެޅުމަށް މަޖިލީހުގެ ރުހުން ހޯދުމަށް ނަންތައް ފޮނުއްވާފައި ވަނީ މި މަހުގެ ދެވަނަ ދުވަހުއެވެ.
އެގޮތުން، އަޔަލެންޑަށް ކަނޑައަޅުއްވަން ފޮނުއްވީ މިހާރު އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު އިރުތިޝާމް އާދަމްގެ ނަމެވެ. އަދި ޔުކްރެއިންއަށް ކަނޑައަޅުއްވަން ފޮނުއްވީ ޔޫރަޕިއަން ޔޫނިއަންއަށް ކަނޑައަޅުއްވާފައި ހުންނަވާ ސަފީރު ގީލާ އަލީގެ ނަމެވެ.
މި ބޭފުޅުން ސަފީރުކަމަށް އައްޔަނުކުރުމާއިމެދު މިއަދުގެ ޖަލްސާގައި ވޯޓަށް އަހާފައިވާއިރު ވޯޓުގައި ބައިވެރިވެވަޑައިގަތް ހުރިހާ މެންބަރުންގެ އިއްތިފާގުން ވަނީ މި ބޭފުޅުންނަށް ރުހުން ދީފައެވެ.
އެކި ޤައުމުތަކަށް ސަފީރުންނާއި ނޮން-ރެޒިޑެންޓް ސަފީރުން އައްޔަން ކުރައްވާނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ. ނޮން ރެޒިޑެންޓް ސަފީރުން އައްޔަން ކުރައްވަނީ ސަފީރުންގެ ގޮތުގައި މިހާރުވެސް ތިއްބަވާ ބޭފުޅުންގެ ތެރެއިންނެވެ.
Advertisement
This content is created and paid for by advertisers and does not involve Voice Journalists
