ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، "މޯލްޑިވްސް ބްރޯޑްކާސްޓިންގ ކޮމިޝަން" ގެ މެންބަރުކަމަށް ޒަމްޢަތު އަޙްމަދު ވަޙީދު މިއަދު ޢައްޔަންކުރައްވައިފިއެވެ.

ބްރޯޑްކާސްޓިން ކޮމިޝަނަށް ކުރިމަތިލި ފަރާތްތަކާ މިނިވަން މުއައްސަސާތަކާ ބެހޭ ކޮމެޓީން ވަނީ މިދިޔަ ބުރާސްފަތި ދުވަހު އިންޓަވިއު ކޮށްފަ އެވެ. އެއީ ޒަމްއަތު އަހްމަދު ވަހީދު، ޒީނާ ޒާހިރު، ޝިމްލާ އަހުމަދު، އަޝްރަފް އަލީގެ އިތުރޔުން އަލީ ޔޫސުފެވެ.

މީގެ ތެރެއިން 3 ކެނޑިޑޭޓުންގެ ޝަރުތު ހަމަވިއިރު، ކޮމެޓީގެ ނިންމުމުގައި ކުރީގައި އޮތީ ޒަމްއަތު އެވެ. ޒަމްއަތަށް 89.29 މާކުސް ލިބިފައިވެ އެވެ. 

އަދި ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ޒަމްއަތު ބްރޯޑްކޮމްގެ މެމްބަރުކަމަށް އައްޔަނުކުރަން ވޯޓަށް އަހާފައިވާއިރު، އޭނާ މަގާމަށް އައްޔަންކުރަން ފެންނަ ކަމަށް 56 މެމްބަރުން ވަނީ ވޯޓް ދެއްވާފައެވެ. ނުފެންނަކަމަށް އެއްވެސް މެމްބަރަކު ވޯޓް ދެއްވާފައެއް ނުވެއެވެ.

ޒަމްޢަތު އަޙްމަދު ވަޙީދު ވަނީ 2022 ވަނަ އަހަރު އިސްލާމިކް ޔުނިވަރސިޓީ އޮފް މޯލްޑިވްސް އިން މާސްޓަރ އޮފް އާޓްސް އިން ޖަރނަލިޒަމް ޙާޞިލްކުރައްވާފައެވެ.