ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީގެ ޑިރެކްޓަރުްނގެ ބޯޑުގައި ހިމެނޭ 4 މެމްބަރެއްގެ ދައުރު ހަމަވާތީވެ، ބޯޑު މެމްބަރުކަމަށް ކުރިމަތިލުމަށް ހުޅުވާލައިފިއެވެ.

ރައީސުލްޖުމްހޫރިއްޔާގެ އޮފީހުން އާއްމުކުރި އިއުލާނުގައި ބުނެފައިވާގޮތުން މީރާ ބޯޑަށް ކުރިމަތިލުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލާފައިވަނީ، ޖުލައިމަހުގެ 6 ވަނަ ދުވަހުގެ ނިޔަލަށެވެ. މަޤާމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، މިކަމަށް ކުރިމަތިލުމަށް ދީފައިވާ މުއްދަތުގައި، ރަސްމީ ދުވަސްދުވަހު ހެނދުނު 08:30 އިން 12:00 އަށް ރައީސުލްޖުމްހޫރިއްޔާގެ އޮފީހަށެވެ.

ޓެކްސް އިދާރާ، މީރާ ބޯޑުގެ ދައުރަކީ 5 އަހަރެވެ. ބޯޑު އެކުލެވިގެންވަނީ، 7 މެމްބަރުންގެ މައްޗަށެވެ.

- އަހުމަދު ސާއިދު - ޗެއާޕާސަން

- ލީނާ މުހައްމަދު ޒާހިރު: ޑެޕިއުޓީ ޗެއާޕާސަން

- ހަސަން ޒަރީރު: ކޮމިޝަނަރ ޖެނެރަލް

- އައިޝަތު އަޝާ އަލީ: ބޯޑު މެމްބަރު

- މުމްތާޒް ޢަބްދުއްރަޝީދު: ބޯޑު މެމްބަރު

- ދަހާ ޝުޢައިބު: ބޯޑު މެމްބަރު

- ހުޝާމް ވަޙީދު: ބޯޑު މެމްބަރު

މީގެ ތެރެއިން ބޯޑު މެމްބަރުކަމުގެ ދައުރު ހަމަވަނީ، ލީނާ މުހައްމަދު ޒާހިރު ހުސެއިން، އައިޝަތު އާޝާ އަލީ، މުމްތާޒް އަބްދުލް ރަޝީދުގެ އިތުރުން ހުޝާމް ވަޙީދު އެވެ. 

މީރާ ބޯޑުގެ މެމްބަރުކަމަށް ކުރިމަތިލާ ފަރާތަކީ ވިޔަފާރިއާއި އިގްތިސާދުގެ އިތުރުން މާލީ އަދި ޓެކުހުގެ ދާއިރާއިން ގާބިލް ފަރާތަކަށްވާން ޖެހެއެވެ. އަދި ސަރުކާރާއި އަމިއްލަ އެއްވެސް ކުންފުންޏެއްގެ ބޯޑުގައި ހިމެނިގެން ނުވާނެއެވެ.