އަލް ޖަޒީރާ ނިއުސް ޗެނަލްތަކުގެ ސަބަބުން އިޒްރާއީލްގެ ޤައުމީ ސަލާމަތަށް ގެއްލުންވާކަމަށްބުނެ، އެޤައުމުގެ ނެޝަނަލް ސެކިއުރެޓީ މިނިސްޓްރީން އަލް ޖަޒީރާ ހަބަރުތައް ބަލާމީހުންނާ ދެކޮޅަށް ނިކުމެއްޖެއެވެ.

މިކަމާ ގުޅޭގޮތުން އިޒްރާއީލްގެ ޤައުމުގެ ގައުމީ ސަލާމަތާ ބެހޭ ވަޒީރު އިޓަމާރ ބެން-ގަވިއަރ ބުނީ، އަލް ޖަޒީރާއަކީ އޭރުވެސް މިހާރު އިޒްރާއީލަށް އޮތް ނުރައްކަލެއްކަމަށެވެ. އިޒްރާއީލްގައި އަލް ޖަޒީރާގެ ހަބަރު ޗެނަލްތައް ބްރޯޑްކާސްޓްކުރުމާއި އެއްވެސް ސިފައެއްގައި އެ ޗެނަލްތައް ދެއްކުން އޮންނަނީ މަނާކޮށްފައެވެ. އިޒްރާއީލްގައި އަލް ޖަޒީރާ މަނާކުރިނަމަވެސް އެޤައުމުގައި އުޅޭ މީހުން އަލް ޖަޒީރާގެ ޗެނަލްތައް ބަލައެވެ.

އިޒްރާއީލުން ވަނީ މިދިޔަ އަހަރުގެ މެއިމަހުގެ ކުރީކޮޅު އެޤައުމުގައި އަލް ޖަޒީރާ މަނާކޮށްފައެވެ. ސަބަބަކީ އިޒްރާއީލްގެ ސިފައިން އައްޒާގެ އާއްމުންނާ ދެކޮޅަށް ހިންގަމުންގެންދާ ޖަރީމާތަކުގެ ވާހަކަތައް ރިޕޯޓްކުރާތީއެވެ. މި މައްސަލާގައި އިޒްރާއީލުން ވަނީ މީގެ ކުރިން އަލް ޖަޒީރާގެ މެމްބަރުން ޑީޕޯޓްވެސް ކޮށްފައެވެ، އިޒްރާއީލުން ޢައްޒާއަށް ދެމުންދާ އިންސާނިއްޔަތާ ހިލާފް ހަމަލާތައް ގެނެސްދިނުމުގައި އަލްޖަޒީރާގެ ނޫސްވެރިންނާއި ވީޑިއޯ ގްރާފަރުން ދައްކާފައިވަނީ އާދަޔާ ހިލާފް ހިތްވަރެކެވެ. ނޫސްވެރިންގެ އާއިލާތަކުގެ މެމްބަރުން ޝަހީދުކުރަމުންދިޔަ ނަމަވެސް އަލް ޖަޒީރާއިން އަބަދުވެސް ބުނަމުން އަންނަނީ ފަހަތަށް ނުޖެހޭނޭ ކަމަށެވެ.

އިޒްރާއީލުން މިފަހަރު ގޯސްވީ އަލް ޖަޒީރާގެ ޗެނަލްތަކުން އީރާން/އިޒްރާއީލް ހަނގުރާމައިގެ ހަބަރުތައް ރިޕޯޓްކުރާތީއެވެ. މީގެ އިތުރުން އިޒުރޭލުގައި އަލް ޖަޒީރާ މަނާކޮށްފައި އޮންނައިރުވެސް އަލް ޖަޒީރާގެ ނިއުސް ޗެނަލްތައް ބަލާ މައްސަލައިގަވެސް އިޒްރާއީލްގެ ނެޝަނަލް ސެކިއުރެޓީ މިނިސްޓްރީން ވަނީ ރުޅިގަދަވެފައެވެ. އެ މިނިސްޓްރީން ވަނީ އަލް ޖަޒީރާގެ ޗެނަލްތައް ބަލާ އަދި ދެއްކުމުގައި ބައިވެރިވާ މީހުންނަށް ފިޔަވަޅު އަޅައިދިނުމަށް ފުލުހުންގެ ކިބައިން އެދިފައެވެ.

އިޒްރޭލުން އީރާނާ ދެކޮޅަށް ދޭން ފެށި ހަމަލާތަކުގައި އިޒްރޭލުން ހީކުރިވަރަށްވުރެ ބޮޑެތި ގެއްލުންތައް އެޤައުމަށް ދަނީ ލިބެމުންނެވެ. މީގެ ތެރެއިން އެންމެ ފާހަގަކޮށްލެވެނީ އިޒްރާއީލްގެ ޓެކްނޮލޮޖީއާ މެދު މިހާތަނަށް ކުރެވެމުން އައި އިތުބާރު، އީރާނުންދިން ރައްދު ހަމަލާތަކުގައި ގެއްލުވާލުމެވެ. މި ހަބަރުތައް ގެނެސްދިނުމުގައި އަލް ޖަޒީރާ އަދި ޓީއާރުޓީ ނިއުސް އޭޖެންސީގެ ދައުރު ވަރަށް ބޮޑުކަމަށް އެކި ފަރާތްތަކުން ފާހަގަކުރެއެވެ.

އީރާނުން އިޒްރާއީލަށް ދެމުން އަންނަ ހަމަލާތައް ލައިވް ބްރޯޑްކާސްކުރާ މައްސަލާގައި އިޒްރާއީލް ފުލުހުން ވަނީ، މިއަދުވެސް ޓީއާރުޓީއަށް އިންޒާރުދީފައެވެ.