އާމްދަނީއާ ހިލޭއެހީގެ ގޮތުގައި މިހިނގާ ޖޫންމަހުގެ 12 ވަނަ ދުވަހުގެ ނިޔަލަށް ދައުލަތުގެ ބައިތުލްމާލަށް 17 ބިލިއަނަށްވުރެ ގިނަ ރުފިޔާ ލިބިއްޖެއެވެ.

ފިނޭންސް މިނިސްޓްރީން އާއްމުކޮށްފައިވާ ދައުލަތުގެ ހަރަދުބަރަދު ހުރިގޮތް ދައްކުވައިދޭ ތަފާސްހިސާބުތަކުން ދައްކާގޮތުން ބައިތުލްމާލަށް 17 ބިލިއަނަށްވުރެ ގިނަ ރުފިޔާ ލިބިފައިވާއިރު، މިއީ މިދިޔަ އަހަރާ އަޅާބަލާއިރު 6 އިންސައްތައިގެ އިތުރުވުމެކެވެ. 

މާލީ ވުޒާރާއިން ބުނީ ދައުލަތުން ތަންފީޛުކުރަމުންދާ ޚަރަދު ހިފެހެއްޓުމުގެ ސިޔާސަތުތަކާއިއެކު، ހަރަދުތައް 8.7 އިންސައްތަ ކުޑަކުރެވިފައިވާކަމަށެވެ. އަހަރުގެ މިހާތަނަށް 20.3 ބިލިއަން ރުފިޔާ ހޭދަކުރެވިފައިވާއިރު، މިދިޔަ އަހަރުގެ މިހާތަނަށް ކުރެވުނު ހަރަދުތައް އުޅެނީ 15.8 ބިލިއަން ރުފިޔާގައެވެ. ދައުލަތުގެ ޚަރަދު ކުޑަކުރުމާއި އާމްދަނީ އިތުރުކުރުމަށް އެޅި ފިޔަވަޅުތަކުން އައި އެދެވޭ ނަތީޖާއެއް ލިބިފައިވާކަމަށެވެ. އެގޮތުން ދަރަނިތައް ކުޑަކުރުމަށް އެޅުނު ފިޔަވަޅުތަކުގެ ސަބަބުން ކުރިން ނަގާފައިވާ ދަރަނިތައް އަދާކުރުމަށް ކުރަންޖެހުނު ހޭދަ ބޮޑުވިކަމުގައި ވީނަމަވެސް، ދައުލަތުގެ ބަޖެޓުގެ އޯވަރއޯލް ބެލެންސް 1.3 ބިލިއަން ރުފިޔާގެ ސަރޕްލަސްއަކަށް އަރައިވާކަން މާލީ ވުޒާރާއިން ވަނީ ފާހަގަކޮށްފައެވެ.

ހިނގަމުންމިދާ ދައުލަތުގެ ބަޖެޓްގެ ގޮތުގައި ރައްޔިތުންގެ މަޖިލީހުން ފާސްކޮށްފައިވަނީ، 56.6 ބިލިއަން ރުފިޔާގެ ބަޖެޓެކެވެ. ބަޖެޓުގެ ޖުމުލަ ޚަރަދަކީ 49.2 ބިލިއަން ރުފިޔާއެވެ. އެއީ، ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާއެވެ. އަންނަ އަހަރުގެ ޖުމުލަ އާމްދަނީއާއި ހިލޭ އެހީ 39.8 ބިލިއަން ރުފިޔާއަށް އަރާނެ ކަމަށްވަނީ އަންދާޒާކޮށްފައެވެ. އެއީ، ހިލޭ އެހީގެ ގޮތުގައި 2.5 ބިލިއަން ރުފިޔާ ހިމަނައިގެންނެވެ.