ޙާފިޒުންނަށް ދޭ އެލަވަންސް ޖުލައި މަހުން ފެށިގެން ދެގުނައަށް ބޮޑު ކުރަން ވަޒީރުންގެ މަޖިލީހުން ނިންމައިފިއެވެ.
ރައީސް ޑރ މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައިވާ ގޮތުން މި ނިންމުން ނިންމާފައިވަނީ މި ހަފްތާގައި އޮތް ވަޒީރުންގެ މަޖިލީހުގެ ޖަލްސާގައެވެ.
ރައީސް މުޢިއްޒު ވިދާޅުވީ، ހާފިޒުން ތަމްރީނު ކުރުމާއި ހާފިޒުންނަށް ދޭ އަހައްމިއްޔަތުކަން އިތުރު ކުރުމަކީ ކީރިތި ޤުރުއާނަށް އޮންނަ ލޯބި އިތުރު ކުރުމުގައި ނުހަނު މުހިއްމު ކަމެއް ކަމުގައެވެ.
ރިޔާސީ އިންތިޚާބުގެ ކެންޕެއިންގެ ތެރެއިން، ފުވައްމުލަކު ސިޓީގައި ބޭއްވުނު ޖަލްސާގައެއްގައި ވާހަކަ ދައްކަވަމުން ރައީސް މުޢިއްޒު ވަނީ ހާފިޒުންގެ އަގު ބޮޑަށް ވަޒަންކުރުމުގެ ގޮތުން އެމަނިކުފާނު ވެރިކަމެއްގައި ހާފިޒުންނަށް ދެވޭ އެލަވަންސް ދެގުނައަށް ބޮޑު ކުރައްވާނެކަން އިއުލާން ކުރައްވާފައެވެ.
އެގޮތުން، މިހާރު ސަރުކާރުން ހާފިޒުންނަށް ދެމުން އަންނަ 2000 ރުފިޔާގެ އެލަވަންސް 4000 ރުފިޔާއަށް ބޮޑު ކުރައްވަން ވަނީ ވަޢުދުވެވަޑައިގެންފައެވެ.
އެފަހުން މިދިޔަ އަހަރު ބޭއްވުނު ޤައުމީ ގުރުއާން މުބާރާތް ނިންމުމުގެ ރަސްމިއްޔާތުގައި ވާހަކަދައްކަވަމުންވެސް މުޢިއްޒު ވަނީ، ޤުރުއާން ހިތުދަސް ޙާފިޒުން އުފެއްދެވުމަށް އަދި އެކަމަށް ހިތްވަރުދީ މަގުކޮށައި ދިނުމަށް މި ސަރުކާރުން ވަރަށް ބޮޑު ސަމާލުކަމެއް ދެއްވާނެކަން ފާހަގަކުރައްވާފައެވެ.
އެގޮތުން، އެ މަސައްކަތުގައި އެމަނިކުފާނު ގެންގުޅުއްވާނެ ސިޔާސަތަކީ، ކީރިތި ޤުރްއާން ހިތުދަސް ޙާފިޒުން އުފެއްދެވުމަށް ސަރުކާރުން ޚާއްޞަ ހޭދައެއް ކުރެއްވުން ކަމަށާއި، އެކަމަށްޓަކައި ވަސީލަތްތައް އިތުރުކުރައްވައި ޙާފިޒުންނަށް ދެއްވާ އިނާޔަތް ދެ ގުނަޔަށް ބޮޑުކުރެއްވުންކަމުގައި ވިދާޅުވިއެވެ.
Advertisement
This content is created and paid for by advertisers and does not involve Voice Journalists
