މޯލްޑިވްސް މާކެޓިން ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ރާއްޖެ އިސްތިހާރުކުރުމަށް މިދިޔަ އަހަރު ކުރި ހޭދަ، ދަށަށް ގޮސްފައިވާކަމަށް އޮޑިޓް ރިޕޯޓުން ދައްކައިފިއެވެ.

ރާއްޖޭގެ ޓޫރިޒަމް އިސްތިހާރުކުރުމަށް ދޭ ބަޖެޓް ކުޑަވުމުގެ މައްސަލައަކީ ފަތުރުވެރިކަމުގެ ސިނާއަތުގައި ހަރަކާތްތެރިވާ ވިޔަފާރިތަކުން އަބަދުވެސް ފާހަގަކުރާ މައްސަލައެކެވެ. އޮޑިޓަރ ޖެނެރަލްގެ އޮފީހުން ނެރެފައިވާ އެމްއެމްޕީއާރުސީގެ 2024 ވަނަ އަހަރުގެ މާލީ އޮޑިޓް ރިޕޯޓްގައި ވާގޮތުން 2023 ވަނަ އަހަރު ރާއްޖެއިން ބޭރުގައި ރާއްޖޭގެ ޓޫރިޒަމް އިސްތިހާރުކުރުމަށް ބޭއްވި ހަރަކާތްތަކަށް 128.2 މިލިއަން ރުފިޔާ ވަނީ ހަރަދުކޮށްފައެވެ. ނަމަވެސް މިދިޔަ އަހަރު ރާއްޖެ އިސްތިހާރުކުރުމަށް ހޭދަކޮށްފައިވަނީ، 110.6 މިލިއަން ރުފިޔާއެވެ.

ސަރުކާރުން މިދިޔަ އަހަރު އެމްއެމްޕީއާރުސީއަށް އެހީގެ ގޮތުގައި 154،200،000 ރުފިޔާ ވަނީ ދީފައެވެ. މި ފައިސާއިން މިދިޔަ އަހަރު އެމްއެމްޕީއާރުސިން އެންމެ ބޮޑު ހޭދައެއް ކޮށްފައިވަނީ، ރާއްޖެއިން ބޭރުގައި ފެއާތަކުގައި ބައިވެރިވުމަށެވެ.

- ފެއާތަކަށް: 89،284،768 

- ޕީއާރު އެންޑް ފެމް ޓްރިޕްސް: 10،443،818

- އިވެންޓްތަކަށް: 3،840،016

- އިންތިހާރުޖެހުމަށް: 3،562،600

- ޕްރޮމޯޝަނަލް މެޓީރިއަލް: 3،269،289

ސަރުކާރުން މިދިޔަ އަހަރު އެމްއެމްޕީއާރުސީއަށް ދިން އެހީގެ އިތުރުން އެ ކޯޕަރޭޝަނަށް ލިބުނު އާމްދަނީއަށް ބަލާއިރު، 22.4 މިލިއަން ރުފިޔާ ވަނީ ލިބިފައެވެ. އާމްދަނީގެ ގޮތުގައި އެންމެގިނައިން ފައިސާ ލިބިފައިވަނީ ފެއާތަކުގައި ބައިވެރިވުމަށް ޓޫރިޒަމް ކުންފުނިތަކުން ދިން ފައިސާއިންނެވެ. ފެއާތަކުގައި ބައިވެރިވުމަށް ދޭ ފީގެ ގޮތުގައި 19.2 މިލިއަން ރުފިޔާ ލިބިފައިވާއިރު، މެމްބަރޝިޕް ފީގެ ގޮތުގައި ވަނީ 2.5 މިލިއަން ރުފިޔާ ލިބިފައެވެ.