ނިރުބަވެރި އިޒުރޭލުގެ ސިފައިން ފަލަސްޠީނުގެ ޣައްޒާއަށް ވައިގެ މަގުންނާއި އެއްގަމުން ދެމުންދާ ސިލްސިލާ ހަމަލާތަކުގެ ތެރެއިން މިއަދު އެކަނިވެސް ފަލަސްޠީނުގެ 50 މީހުން ޝަހީދުކޮށްލައިފިއެވެ.

މިފަހަރުވެސް ހަމަލާދީފައިމިވަނީ ޣައްޒާގައި ހުރި އިންސާނީ އެހީ ފޯރުކޮށްދޭ މަރުކަޒަކަށް އަމާޒުކޮށްކަން ފާހަގަކޮށްލަންޖެހެއެވެ. މިހަމަލާތަކުގައި އެތަނުގައި ތިބި 140 އަށްވުރެ ގިނަ މީހުން ޒަހަމްވެފައިވާކަމަށާއި 62 މީހެއްގެ ހާލު ސީރިއަސް ކަމަށް މީޑިޔާތަކުން ރިޕޯޓްކޮށްފައިވެއެވެ. 

އިޒުރޭލުގެ ސިފައިން ދަނީ ކޮންމެ ދުވަހަކު ޣައްޒާގައި ހުންނަ އިންސާނީ އެހީ ފޯރުކޮށްދޭ ތަންތަނަށާއި މީހުން އެއްވެއުޅޭ ސަރަހައްދުތަކަށް އަމާޒުކޮށް ވައިގެ މަގުންނާއި އެއްގަމުން ބަޑީގެ ހަމަލާތަށް ދެމުންނެވެ. މިކަމުގެ ސަބަބުން ފަލަސްޠީނުގެ ރައްޔިތުންދަނީ އެތަންތަނަކީ އިންސާނުން ކަތިލާ ތަންތަނުގެ ގޮތުގައި ސިފަކުރަމުންނެވެ.

ޣައްޒާގެ ރައްޔިތުން ފާހަގަކުރާ ގޮތުގައި މިހަމަލާތަކަކީ 2023 ވަނަ އަހަރުގެ އޮކްޓޫބަރު 7 ކުން ފެށިގެން އިޒުރޭލުން ޣައްޒާއަށް ދެމުން އަންނަ އެންމެ ވަރުގަދަ ހަމަލާތަކެވެ.

ފާހަގަކޮށްލަންޖެހޭ ގޮތުގައި 2023 ވަނަ އަހަރުގެ އޮކްޓޫބަރު 7 ވަނަ ދުވަހުން ފެށިގެން މިހާތަނަށް އިޒުރޭލުން ވަނީ ފަލަސްޠީނުގެ ކުށެއްނެތް 55،000 އަށްވުރެ ގިނަ މީހުން ޝަހީދު ކޮށްލާފައެވެ. އަދި މިހަމަލާތަކުގައި 127،000 މީހުން ވަނީ މި ހަމަލާތަކުގައި ޒަހަމްވެފައެވެ.