މީގެ މަހެއްހާ ދުވަސްކުރިން ޣައްޒާގައި ހިންގަން ފެށި ހިއުމަނިޓޭރިއަން ފައުންޑޭޝަން (ޖީ.އެޗް.އެފް)އަށް އެހީ ހޯދުމަށް ދިޔަ ފަލަސްޠީނުގެ 549 މީހުން އިޒުރޭލުގެ ހަމަލާތަކުގައި ޝަހީދުވެފައިވާ ކަމަށް ފަލަސްތީނު ސަރުކާރުގެ މީޑިއާ އޮފީހުން ބުނެފިއެވެ.

މީޑިއާ އޮފީހުން ނެރުނު ބަޔާނެއްގައި ބުނެފައިވަނީ، ޣައްޒާގައި ހުންނަ އިންސާނީ އެހީ ފޯރުކޮށްދޭ މަރުކަޒުތަކަށް އިޒުރޭލުން ދިން ހަމަލާތަކުގައި މިހާތަނަށް ފަލަސްޠީނުގެ 549 މީހުން ޝަހީދުވެ، 4،066 މީހަކަށް އެކިވަރުގެ އަނިޔާ ވަނީ ލިބިފައެވެ. އަދި ބަނޑުހައިހޫނުކަމުގައި ތިބި ފަލަސްޠީނުގެ އާންމުންގެ ތެރެއިން 39 މީހުން ގެއްލިފައިވާ ކަމަށްވެސް އެ އިދާރާއިން ނެރުނު ބަޔާނުގައި ބުނެފައިވެއެވެ.

މިފަދަ މީހުން ގިނައިން އެއްވެއުޅޭ ސަރަހައްދުތަކަށް އަމާޒުކޮށް އިޒުރޭލުން ހިންގަމުންދާ ޖަރީމާތަކަކީ އިޒުރޭލުން ސީދާ ފުރިހަމަ ޒިންމާ އުފުލަންޖެހޭ ކަމެއްކަމަށާއި ބަނޑުހައިހޫނުކަމުގެ ތެރޭގައި ތިބި އާއްމުނަށް އަމާޒުކޮށް ދުރާލާ ރޭވިގެން ކޮންމެ ދުވަހަކު ގަސްތުގައި ވައިގެ މަގުންނާއި އެއްގަމުން އެތައް ބަޔަކު ޝަހީދުކުރަމުންދާކަމަށް އެ ބަޔާނުގައި ބުންޏެވެ.  

އިޒުރޭލުގެ ސިފައިން ދަނީ ކޮންމެ ދުވަހަކުހެން ޣައްޒާގައި ހުންނަ އިންސާނީ އެހީ ފޯރުކޮށްދޭ މަރުކަޒުތަކާއި މީހުން އެއްވެއުޅޭ ސަރަހައްދުތަކަށް އަމާޒުކޮށް ވައިގެ މަގުންނާއި އެއްގަމުން ބަޑީގެ ހަމަލާތަށް ދެމުންނެވެ. މިކަމާ ގުޅިގެން ޔުނިސެފުންވެސް ވަނީ ކަންބޮޑުވުން ފާޅުކޮށްފައެވެ.

އިޒްރާއީލުން 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން މިހާތަނަށް ފަލަސްޠީނުގެ ޣައްޒާއަށް ދެމުން އަންނަ ހަމަލާތަކުގައި އެކަނިވެސް ފަލަސްޠީނުގެ ކުށެއްނެތް 56،000 އަށްވުރެ ގިނަ މީހުން ވަނީ ޝަހީދު ކޮށްލާފައެވެ.