ފަލަސްޠީނުގެ ޣައްޒާގައި ނިރުބަވެރި އިޒުރޭލުން ހިންގަމުންދާ ގަތުލު އާންމުތަކުގައި ހުކުރު ދުވަހު އެކަނިވެސް ފަލަސްޠީނުގެ 100 މީހުން ޝަހީދުކޮށްލައިފިއެވެ.

އަނެއްކާވެސް އިޒުރޭލުން ހަމަލާ ދީފައިމިވަނީ އިންސާނީ އެހީ ފޯރުކޮށްދޭ މަރުކަޒަކަށް ގޮސްތިބި ފަލަސްޠީނުގެ އާންމުންނަށާއި ޓެންޓުތަކުގައި ހިޔާވަހިކަން ހޯދަމުންދިޔަ ފަލަސްޠީނުގެ އާންމުންނަށް އަމާޒުކޮށެވެ. ފާހަގަކޮށްލަންޖެހޭ ގޮތުގައި އިޒުރޭލުން ދަނީ ދުރާލާ ރޭވިގެން މިފަދަ މީހުން އެއްވެއުޅޭ ބައިބޯ ސަރަހައްދުތަކަށް އަމާޒުކޮށް ބަނޑުހައިހޫނުކަމުގެ ތެރޭގައި ތިބި އާއްމުނަށް ކޮންމެ ދުވަހަކު ވައިގެ މަގުންނާއި އެއްގަމުން ހަމަލާދީ އެތަކެއް ބަޔަކު ޝަހީދުކުރަމުންނެވެ.

އިޒުރޭލުން ފަލަސްޠީނުގެ އާންމުންނާ ދެކޮޅަން ހިންގާ ޖަރީމާތަށް ދުވަހެއް ދުވަހަކަށް އިތުރުކޮށް ފަލަސްތީނުގެ އާންމުން ޝަހީދުކުރަމުން ދިޔުމުގެ ސަބަބުން މުޅި ދުނިޔޭގެ ނުރުހުން އިޒުރޭލަށް ވަނީ އަމާޒުވެފައެވެ. އަދި ހަމައެހެންމެ، ބައިނަލްއަގުވާމީ ޖަމުއިއްޔާ ޖަމާއަތްތަކުންވެސް ދަނީ އިޒުރޭލުގެ ނިރުބަވެރި އަމަލުތަށް ކުށްވެރިކޮށް ބަޔާންތަށް ނެރެމުންނެވެ. އިޒުރޭލުގެ މި ނިރުބަވެރި އަމަލުތަކާއި ގުޅިގެން ދުނިޔޭގެ ގިނަ ޤައުމުތަކުގެ ފިއްތުންތައް އިޒުރޭލަށް ވަނީ ކުރިމަތިވެފައެވެ.

ފާހަގަކޮށްލަންޖެހޭ ގޮތުގައި އިޒުރޭލުން ވަނީ ޣައްޒާގައި ހުންނަ ހިއުމަނިޓޭރިއަން ފައުންޑޭޝަން (ޖީ.އެޗް.އެފް)އަށް އެހީ ހޯދުމަށް ދިޔަ ފަލަސްޠީނުގެ 500 އަށް ވުރެ ގިނަ މީހުން އެންމެ މަހެއްގެ ތެރޭގައި ޝަހީދުކޮށްލައިފައިވާ ކަމަށާއި މިހަމަލާތަކުގައި 4،066 މީހަކަށް އެކިވަރުގެ އަނިޔާ ލިބިފައިވާ ކަމަށް މީޑިޔާތަކުގައި ރިޕޯޓްކޮށްފައިވެއެވެ.

މި މައްސަލައާ ގުޅިގެން ބައިނަލްއަގުވާމީ އިދާރާތަކާއި ޖަމުއިއްޔާ ޖަމާއަތްތަކުން ވަނީ ކަންބޮޑުވުން ފާޅުކޮށްފައެވެ. އެފަރާތްތަކުން ބުނާގޮތުގައި ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ދެމުންގެންދާ މި ހަމަލާތަަކަކީ ފަލަސްޠީނު ރައްޔިތުންގެ ނަސްލު ނައްތާލުމުގެ ގޮތުން ހިންގަމުނަދާ ޖަރީމާއެއް ކަމަށާއި މިކަމުގެ ފުރިހަމަ ޒިންމާ އިޒުރޭލުން ފުރިހަމައަށް އުފުލަންޖެހޭނެކަމަށެވެ.

އިޒުރޭލުން އިންސާނީ އެހީ ފޯރުކޮށްދޭ މަރުކަޒުތަކަށް އަމާޒުކޮށް ސިލްސިލާކޮށް ހަމަލާ ދެމުން ގެންދިއުމުގެ ސަބަބުން ފަލަސްޠީނުގެ ރައްޔިތުންދަނީ އިންސާނީ އެހީ ފޯރުކޮށްދޭ މަރުކަޒުތަކަކީ އިންސާނުން ކަތިލާ ތަންތަނުގެ ގޮތުގައި ސިފަ ކުރަމުންނެވެ.

އިޒުރޭލުން ޣައްޒާއަށް ދެމުންއަންނަ ހަމަލާތަށް އިތުރުވެފައިވާ މިދަނޑިވަޅުގައި އެމެރިކާގެ ރައީސް ޑޮނަލްޑް ޓްރަމްޕް ބުނެފައިވަނީ  ޣައްޒާ ހަނގުރާމަ ހުއްޓާލުމުގެ އެއްބަސްވުމާއި ހަމައަށް މިހާރު އާދެވިފައިވާ ކަމަށާއި، ކުރިއަށް އޮތް ހަފްތާއެއްހާ ދުވަހުގެ ތެރޭގައި މިކަމާ ގުޅޭ މަޝްވަރާ ފެށުމަށް ހަމަޖެހިފައިވާކަމަށް ވެސް އޭނާ ވަނީ ބުނެފައެވެ.

އިޒުރޭލުން ބައިނަލްއަގުވާމީ މުއާހަދާތަކާއި ހިލާފުވެ، ބޮޑު ގަތުލުއާންމެއް ހިންގަމުންދާއިރު، ޔަހޫދީ ދައުލަތަށް މިކަމުގައި އެންމެ ބޮޑަށް އެހީތެރިވަމުން އަންނަނީ އެމެރިކާއިންކަން ފާހަގަކޮށްލަންޖެހެއެވެ. އެ ގޮތުން އިޒުރޭލަށް ނިއުކުލިއަރ ހަތިޔާރު ފޯރުކޮށްދީ ޣައްޒާގައި ނަސްލު ނައްތާލުމުގެ ގޮތުން ޖަރީމާތަށް ހިންގުމުގެ އެންމެ އަޑިގައިވެސް ވަނީ އެމެރިކާއެވެ.

ނިރުބަވެރި އިޒްރޭލުން، 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ފަލަސްޠީނުގެ ޣައްޒާއަށް ދެމުން އަންނަ ހަމަލާތަކުގައި މިހާތަނަށް އެކަނިވެސް ފަލަސްޠީނުގެ ކުށެއްނެތް 56،331 އަށްވުރެ ގިނަ މީހުން ވަނީ ޝަހީދުކޮށްލައިފައެވެ. އަދި މި ހަމަލާތަކުގައި ފަލަސްޠީނުގެ 132،632 މީހުން ޒަޚަމްވެފައިވާ ކަމަށް ވެސް ޣައްޒާގެ ހެލްތު މިނިސްޓްރީން ނެރުނު ރިޕޯޓެއްގައި ބުނެފައިވެއެވެ.