ވެލާނާ އިންޓަރނޭޝަނަލް އެއާޕޯޓް ބޭނުންކުރާ 36 އެއާލައިނެއްގެ އިތުރުން، އެ އެއާޕޯޓްގައި ހަރަކާތްތެރިވާ އެކި އިދާރާތަކަށް އައު ޓާމިނަލާ ގުޅޭ މައުލޫމާތު ދީފިއެވެ.

ވީއައިއޭ ހިންގާ މޯލްޑިވްސް އެއާޕޯޓްސް ކޮމްޕެނީން ބުނީ، 36 އެއާލައިން އަކާއެކު 45 ފަރާތަކަށް އެއާޕޯޓްގެ އާ ޓާމިނަލްއާ ގުޅޭ ހާއްސަ ޓުއާތަކެއް ކުރިއަށް ގެންގޮސްފައިވާކަމަށެވެ. މި ޓުއާތަކަކީ އާ ޓާމިނަލްގެ ފެސިލިޓީތަކާއި އޮޕަރޭޝަންތަކަށް އެއާލައިންތަކުގެ މުވައްޒަފުން އަހުލުވެރިކޮށް، އެއްވެސް ބުރޫއެރުމެއް ނެތި ހިދުމަތް ދިނުމަތްދީ އެފަރާތްތައް އަހުލުވެރިކުރުވުމުގެ ގޮތުން ކުރިއަށް ގެންދަންފެށި ޓުއާތަކެކެވެ. މިއީ އާ ޓާމިނަލް ހުޅުވުމުގެ ކުރިން ކުރިއަށް ގެންދާ އޮރާޓް ޕްރޮސެސްގެ ތެރެއިން، ކޮންމެހެން ކުރިއަށްގެންދަންޖެހޭ ޓުއާތަކެއްކަމަށް އެމްއޭސީއެލުން ބުންނެވެ.

އެމްއޭސީއެލުން ބުނީ ރާއްޖެއަށް އޮޕަރޭޓްކުރާ އެއާލައިންތަކާއި ޖެނެރަލް އޭވިއޭޝަން އެޖެންޓުންނާއި ސަރުކާރުގެ ކަމާބެހޭ އެޖެންސީތަކާއި ރިސޯޓް ރެޕުންނާއި ޓެކްސީ އޮޕަރޭޓަރުންނާއި ފެރީގެ ހިދުމަތް ދޭ ފަރާތްތަކާއި ގެސްޓްހައުސް އެސޯސިއޭޝަން އަދި އެމްއޭސީއެލްގެ މުވައްޒަފުންނަށްވެސް މި ޓުއާތައް ކުރިއަށްގެންދާކަމަށެވެ.

އެމްއޭސީއެލްއިން ކުރިއަށްގެންދިޔަ ވިއައިއޭ ޓްއާގެ ތެރެއިން... ފޮޓޯ: އެމްއޭސީއެލް

އެގޮތުން މިހާތަނަށް 36 އެއާލައިނަކަށާއި ހަތް ޖެނެރަލް އޭވިއޭޝަން އެޖެންޓުންނަށާއި މޯލްޑިވްސް އިމިގްރޭޝަން އަދި މޯލްޑިވްސް ނެޝަނަލް އެއާ ޓްރެފިކް ސާވިސްގެ އިތުރުން އެމްއޭސީއެލްގެ ހާހަކަށްވުރެ ގިނަ މުވައްޒަފުންނަށް މި ޓުއާ ވަނީ ކުރިއަށް ގެންގޮސްފައެވެ. އެމްއޭސީއެލުން ބުނީ އިތުރު ތިން އެއާލައިނަކާއި ޖެނެރަލް އޭވިއޭޝަންގެ ދެ އެޖެންޓަކާއި، 10 ސްޓޭކްހޯލްޑަރުންނަށް މި ޓުއާތައް ކުރިއަށް ގެންދިއުމަށް ހަމަޖެހިފައިވާކަމަށެވެ.

އައު ޓާމިނަލް ހުޅުވުމަށް ހަމަޖެހިފައިވަނީ، އަންނަ ޖުލައިމަހުގެ 26 ވަނަ ދުވަހެވެ. އެމްއޭސީލުން ވަނީ އަލަށް ހުޅުވަން ތައްޔާރުވަމުންދާ އައު ޓާމިނަލް ބޭނުންކުރާ ފަސިންޖަރުންނަށް މަތީ ފަންތީގެ ހިދުމަތް ފޯރުކޮށްދިނުމަށްޓަކައި ޒަމާނީ ވަސީލަތްތައް ޓާމިނަލުގައި ގާއިމްކޮށްފައެވެ. އޭގެ ތެރޭގައި ސެލްފް ސާވިސް ހަ ކިއޮސްކް އާ ޓާމިނަލްގައި ހުންނާނޭކަމަށް އެމްއޭސީއެލުން ބުނެއެވެ. މި ކިއޮސްކްތަކުން ފަސެންޖަރުން އަމިއްލައަށް ފްލައިޓަށް ޗެކިންވެ، ބޯޑިން ޕާސް ޕްރިންޓް ކޮށްލެވޭނެއެވެ. އެމްއޭސީއެލުން ބުނީ މިކަމުގެ ސަބަބުން، ޗެކިން ކައުންޓަރާއި މުޅި ޗެކިން ޕްރޮސެސްގައި ހޭދަކުރަންޖެހޭ ވަގުތު ކުޑަ ކުރެވިގެންދާނޭކަމަށެވެ.