އިޒުރޭލު-ޣައްޒާ ހަނގުރާމަ ފެށުނުފަހުން ކާބޯތަކެތި ނުލިބި، ބަނޑުހައިހޫނުކަމުއި ޣައްޒާއިން 66 ކުޑަކުދިން ޝަހީދުވެފައިވާ ކަމަށް ޣައްޒާގެ ސަރުކާރުގެ މީޑިޔާ އޮފީހުން ބުނެފިއެވެ.

ޣައްޒާގެ ސަރުކާރުގެ މީޑިޔާ އޮފީހުން ނެރެފައިވާ ބަޔާނެއްގައި ބުނެފައިވަނީ އިޒުރޭލުން ފަލަސްޠީނުގެ އާންމުންނާ ދެކޮޅަށް ކޮންމެ ދުވަހަކު އެތަކެއް ޖަރީމާތަކެއް ހިންގަމުންދާ ކަމަށާ، އިޒުރޭލުން ޣައްޒާގެ ބޯޑަރުތަށް ބަންދުކޮށް އެހީގެ ޓްރަކުތަކަށް ވަނަނުދީ ހިފަހައްޓާފައިވާކަމަށެވެ. އަދި ނަސްލު ހޭދަކުރުމުގެ ގޮތުން ބަނޑުހައިހޫނުކަން ހަތިޔާރެއްގެ ގޮތުގައި އިޒުރޭލުން ބޭނުންކުރަމުން އަންނަ ކަމަށް ވެސް އެބަޔާނުގައި ވަނީ ފާހަގަކޮށްފައެވެ.

ޣައްޒާގެ ކުޑަކުދިންނާ ދެކޮޅަށް ހިންގާ މިފަދަ ޖަރީމާތަށް ކުއްވެރިކޮށް އެބަޔާނުގައި ބުނެފައިވަނީ މިފަދަ ޖަރީމާތަށް އިޒުރޭލުން ޣައްޒާގެ ކުޑަކުދިންނާމެދު ހިންގި ނަމަވެސް މުޅި ދުނިޔެ އޮތީ ހިމޭންވެފައިކަމަށާއި އެއްވެސް ބަޔަކު މިކަމާ ދެކޮޅަށް އަޑު ނުއުފުލާކަމަށެވެ.

އަދިހަމައެހެންމެ، އިޒުރޭލުގެ މަދަދުގާރުން ކަމަށްވާ އިނގިރޭސި ވިލާތާއި، އެމެރިކާއާއި، ޖަރުމަން ވިލާތުގެ އިތުރުން ފަރަންސޭސި ވިލާތުން މިކަމަށް އެންމެ ފުރިހަމައަށް ޒިންމާނަގަން ޖެހޭނެކަމަށް އެބަޔާނުގައި ބުނެފައިވެއެވެ. އަދިހަމައެހެންމެ އދ އިން ވެސް ޣައްޒާގެ ބޯޑަރުތަށް ހުޅުވުމަށް އިޒުރޭލަށް ފިއްތުންތަށް ކުރިމަތި ކުރަން ޖެހޭ ވަގުތު އައިސްފައިވާކަމަށް އެބަޔާނުގައި އިތުރަށް ފާހަގަކޮށްފައިވެއެވެ.

ފާހަގަކޮށްލަންޖެހޭ ގޮތުގައި ޣައްޒާގެ ސަރުކާރުގެ މީޑިޔާ އޮފީހުން މިފަދަ ބަޔާނެއް ނެރެފައިމިވަނީ ޣައްޒާގައި ބަނޑުހައިހޫނުކަން ތަހައްމަލްކުރާ ކުޑަކުދިންގެ އަދަދު ނުރައްކާ ހާލަތަކަށް އިތުރުވެފައިވާކަމަށް ޔުނިސެފް އިން ބުނެފައިވާ ދަނޑިވަޅެއްގައެވެ. އެގޮތުން ހުސްވި މެއި މަހު އެކަނިވެސް 6 މަހާއި 5 އަހަރާއި ދެމެދުގެ 5,119 ކުދިން ޣައްޒާގައި ބަނޑުހައިހޫނުކަން ތަހައްމަލްކުރަމުންދިޔުމުގެ ސަބަބުން އެނދުމަތިކޮށްފައިވާ ކަމަށް ޔުނިސެފްއިން ނެރުނު ބަޔާނުގައި ބުނެފައިވެއެވެ.

ޣައްޒާގައި ބަނޑުހައިހޫނުކަން ތަހައްމަލްކުރާ ކުޑަކުދިންގެ އަދަދު ކުރިއަށް އޮތްތަނުގައި އިތުރުވުމުގެ ފުރުސަތު ބޮޑުކަމަށް ކަމާ ގުޅުންހުރި ފަރާތްތަކުން ދަނީ ބުނަމުންނެވެ.